ნეიტრალიტეტი
██ ნეიტრალური ქიანეფი აღიარაფილი კონსტიტუციათ დო ოერეფოშქაშე ჯარალუათ
██ ნეიტრალური პოზიცია ვა რე აღიარაფილი ოერეფოშქაშე ჯარალუათ
██ ჸოფილი ნეიტრალური ქიანეფი
ნეიტრალიტეტი (გერმ. Neutralität, ლათ. neuter — ვართ ართი, ვართ მაჟირა) — ოერეფოშქაშე სამართალს — ლჷმას ვაკათაფა, თინჩალაშ პერიოდის ოლჷმე ბლოკეფს კათაფაშე ვარიშ რაგადი.
ნეიტრალური სახენწჷფოეფი დუდს იკენა, აკორინაფილი ოერეფოშქაშე სამართლიშ სუბიექტეფშე ნამდგაინიშ ხუჯიშ დოკინაშე. ქიანეფი, ნამუეფჷთ ნეიტრალურ სახენწჷფოეფო რენა აღიარაფილეფი, ვარ-და კინე მუნეფი აცხადენა თეშ გეშა, მუჭოთ წესი, ოურდუმე ალიანსეფშა კათაფაშ ვარს რაგადანა.
ნეიტრალიტეტიშ ოერეფოშქაშე სამართალი იკათუანს სუმ გოხურგუას ლჷმაშ პერიოდის ნეიტრაულური ქიანაშ ქიმინჯალაშე შხვა სახენწჷფოეფს შქას:
- ვამიოჭირინუას დორხველი აკოანჯარაფა მალიმორ კუნთხუეფს;
- ვემიარზუას დორხველი ტერიტორია მალიმორ კუნთხუეფს (ბაზირაფა, ტრანზიტი, გჷნოფუეინუა დო თიჯგ.);
- ვაგუწუას დისკრიმინაცია ნამდგაინ კუნთხუს ოურდუმე დოშანაფაშ ანჯარიშ დო მეკონ-მოკონიშ მეჭირინაფაშ ბორჯის (ანუ გოხურგუა ვარ-და ართნერი ოკო რდას, ვარ-და შურო ვარდას ოკო).
ტრადიციულო ნეიტრალიტეტი ჟირი სახეშ რე: იროიანი დო ევენტუალური. იროიანი ნეიტრალიტეტიშ ბორჯის ოურდუმე ბლოკეფშე დო ქიმინეფშე ვარიშ რაგაწკჷმა ართო თეჯგურა ქიანაშ ტერიტორიას ვა რდას ოკო ართიანწკჷმა მალიმორი ქიანაშ ჯარეფი ვარ-და ოურდუმე ბაზეფი. ევენტუალური ნეიტრალიტეტიშ პოზიციაშ ბორჯის ქიანა გორკვიაფილი ოურდუმე-პოლიტიკური სიტუაციაშ ბორჯის დუდს იკენს. ნეიტრალიტეტიშ თოლწონუათ არძაშე „სტაჟიანი“ ქიანეფი რე შვეიცარია (1815 წანაშე) დო სან-მარინო (1862 წანაშე).
თეხანური ოერეფოშქაშე სამართალი, ვემშმიღანს ნეიტრალიტეტიშ ჩინებაშ კონწარ გოთანჯუას, ნამუთ რანწკი სახენწჷფოეფს, ლავირაფაშ შილებუას არზენს. სამანგათ, შვეიცარია ნეიტრალიტეტიშ უმკუჯინალო, ოურდუმე აკნასვარეფი ჸუნს, დო კოსტა-რიკა თაშნეშე ნეიტრალური სახენწჷფო, ედომუშამო დემილიტარიზაფილი რე. ნეიტრალიტეტიშ უმკუჯინალო, თიჯგურა სახენწჷფოეფი, მუჭოთ რე ავსტრია და ირლანდია, გოეროშ ოთინჩალე ქიმინჯეფს ოკათჷნა, ნამიეფჷთ მილიტარისტული ხასიათიშ რე. შხირი რე შვანეფი, მუჟამსჷთ ნეიტრალიტეტის ტრადიციულ ხასიათი უღუ დო ოერეფოშქაშე სამართალიშ სუბიექტიშო რჩქვალობათ რე გჷნორთელი, თეში ჯგირი სამანგა რე „სკანდინავიური ბალანსიშ“ პოლიტიკა, უახალაში ისტორიაშ გოძვენას, რეგიონიშ სახენწჷფოეფი, მაქსიმალურო ოცადუდეს ვაკათაფჷდესკო მიმალო კონფლიქტეფს. XX ოშწანურას, იუნგოსლავიაშით გჷმოცხადაფილ ნეიტრალიტეტის, სამართალმომძეთ სერბეთიქ გჷშართჷ, ნამუქჷთ უხუჯაფაშ კურსიშ გაგჷნძორაფა გეგნოჭყვიდჷ.