ადამიერიშ ჩხვინდი
ტაპირიშ ნიჩვი ჩხვინდწკჷმა ართო
ჩხვინდი — პირამიდაშ ფორმაშ რთული ძვალამ-ხინტკირამი ამაღალაფა ადამიერიშ სახეშ შქა აბანს. ჩხვინდი წჷმარინუანს შუროღალი შარაშ დაჭყაფურს დო აკმოდირთუ გალენური ჩხვინდიშ დო ჩხვინდიშ ღრუშე. ჩხვინდიშ ჩონჩხის აკმოქიმინუნს ჩხვინდიშ ძვალეფი დო ხინტკირეფი. ხინტკირეფს შქას აშახე ჩხვინდიშ ღრუშ მარძგვანი დო კვარჩხანი გვერდეფო გჷმართალი ძგიდე, ნამუშ აკოდგინალუაშა მიშმურს ძვალამი, ხინტკირამი დო მიმარსხუაფალ-ნორშვამი ნორთეფი. გალეშე ჩხვინდი ფორილი რე ტყებით. ტყებგიმენი მიმარსხუაფალი შრე მორკებული რე ციმუს, სამანგათ ტყები დიდარი რე ციმუშ ჯარკვალეფით. ჩხვინდიშ სიგანაშ დო სიგჷრძაშ შეფარდაფაშ მეჯინათ გიშმაგორუნა მაღალ დო ინწრო, ოშქაშე, დაბალ დო განიერ ჩხვინდის, ჩხვინდიშ ოჭიშიშ მოჸონაფიობაშ მეჯინათ — თინი, არწიშობური (კეხიანს), ქირიშობურ, ხოფე, უნანგირა ფორმაშ დო თაშ ჯოხოდვალირი რომაულ დო ბერძენულ ჩხვინდის. ჩხვინდიშ სიგჷრძა ოშქაშეთ ოკო ომანგუდას სახეშ სიგჷრძაშ 1/3-ს. ჩხვინდიშ ოჭიშიშ ღოზი ჸვაშ ღოზიშე ონდეთ წჷმი ოკო მიშას, თეშ ნამჷ-და ჩხვინდიშ ჯინჯწკჷმა განივ ღარქ აკიქიმინასინ. ჩხვინდიშ ლახარეფს გურაფულენს ოტორინოლარინგოლოგია.
შეგილებუნა ქოძირათ მედიაფაილეფი თემაშე „ჩხვინდი“ ვიკიოწკარუეს.