კომპიუტერი
კომპიუტერი (ინგლ. computer) ინგლისური ზიტყვა რე დო გჷშმაკოროცხალს შანენს. თენა რე ელექტრონული გჷშმაკოროცხალი მანქანა, ნამუშ ჯინჯიერი კილადანი ინფორმაციაშ სწრაფას დამუშება რე; კომპიუტერი, თეშნეშიშე მუჭოთ არძონერი მანქანა, ადამიერიშ ალობა-კორინს, ზოჯუას ომორჩილუ. კერძოთ, თინა მუშენს ადამიერიშხეშე ოწმახუშე აკოდგუმილი პროგრამაშ მეჯინათ. დამუშებული ინფორმაციაქ ბრელნერქ შილებე იჸუას — რიცხვეფი, ტექსტი, გჷმოსახულაფა ვარა ხონარი.
კომპიუტერიშ კილადანქ დასაბაღო ბრელნერქ შილებე იჸუას. ფაქტობრივო, თენეფიე უნივერსალური ინფორმაციაშ გინმამუშებელი მანქანეფი. თეხანური ელექტრონული კომპიუტერეფს ინფორმაციაშ გინომუშებაშ ქვერსემი სისწრაფე დო ქანცეფი უღუ ორდოამი ართმურთეფწკუმა ალაზიმაფათ, დო თინეფი ირწანურო უმოსო დო უმოსო ძალიერო გინმირთუნა.
კომპიუტერი მუზმარენერი ფიზიკური ფორმათ არსებენს. დოჭყაფუ კომპიუტერეფი დიდი ოთახუშ ზჷმაშ რდეს. თეცალი კომპიუტერეფი ამდღა ხოლო არსებენა სპეციალიზებული ომენცარე გიმოკოროცხებუშო; თინეფს სუპერკომპიუტერეფს უძახუნა. მორჩილი კომპიუტერეფს პირადი გიმორინაფაშო პერსონალური კომპიუტერეფს უძახუნა, დო თინეფიშ პორტაბელური ექვივალენტის ხოლო ნოუთბუქ კომპიუტერეფს (ვარა ლეპტოპის პოპულარულ ხვარებას); თე კომპიუტერეფი რინაშ დახე არძა ოფირჩას აკმოფხვადუნა, მუჭოთ ინფორმაციაშ დამუშებაშ დო კომუნიკაციაშ გაბრა დო, მუჭოთ წესი, ვა-ექსპერტეფიშ უმენტაშობა თინო თინეფს უძახუ „კომპიუტერს“. მარა, კომპიუტერიშ არძაშე უმოს გოფაჩილი ფორმა ამდღანერიშო თ.გ. აშაკიდილი კომპიუტერიე — მორჩილი ზჷმაშ კომპიუტერეფი, ნამუეფიშ ღანკი შხვა მუდგარენი ხენწყილობაშ დუდობა ვარა კონტროლიე. მუშითფურინჯეფშე დოჭყაფილი მოჸოროფულეფიშ ციფრული ფოტოკამერათ თებული არძა ათეშნერი ხენწყილობა თინეფს აშაკიდილი კომპიუტერით იმართუ.
