ლუგო
ლუგო (ესპ. Lugo) — ნოღა ოორუე-ბჟადალ ესპანეთის, გალისიაშ ავტონომიურ აკოართაფას, ლუგოშ პროვინციაშ ნანანოღა. 2010 წანაშ მუნაჩემეფით, ნოღაშ მუნიციპალიტეტიშ მახორობა აკმადგინანს 97 635 ადამიერს, მუშ გეშათ ლუგო გალისიაშ მაოთხა არძაშე მიარეკათამი ნოღა რე.
ისტორია [რედაქტირაფა]
ნოღა ჯვ.წ. I ოშწანურას კელტეფქ დარსხუეს. მოგვიანაფილო თინა რომალეფქ გეჭოფეს. თიშ უმკუჯინუო, ნამდა ლუგო ძალამი ჭიჭე რდჷ, რომაული მართუალაშ პერიოდის თინა გალისიაშ თარი ნოღას წჷმარინუანდჷ, მოგვიანაფილო მუში ნანანოღათ გინირთჷ. თი ბორჯიშო, თე რეგიონი ძალამი დიდარი რდჷ ორქოთ, მიშ მოპალაფაშ მუშობეფი.
XIX ოშწანურაშ დაჭყაფუს, ესპანური კამპანიაშ მიმალობაშ ბორჯის, ლუგო ნაპოლეონქ გეჭოფუ. 1976 წანას, ნოღაშ მახორუეფქ ლუგოს 2 000 წანაშ იუბილე მანწყუეს. თინეფს მიოჩქჷდეს, ნამდა ნოღაქ ჯვ. წ. 24 წანას დირსხუ.
მონძეობა [რედაქტირაფა]
ლუგო ართკაკაკლია ნოღა რე საგებიოს, ნამუსჷთ მუკი-მუკის ედომუშამო ხეუმუთხჷმუ, რომალეფიშ ბორჯიშ III ოშწანურაშ კჷდალა გოჸუნს. კჷდალაშ სიგჷნძა 2 117 მეტრი რე, სიმაღალა 10-15 მეტრი დო იკათუანს 71 ჸორშის დო 10 ოზეშხიბას. 2000 წანას, ლუგოშ კჷდალა იუნესკოქ საგებიო მონძეობაშ ერკებულშა გემშეღჷ.
