შოთა რუსთაველი

ვიკიპედია ხასჷლაშე
გეგნორთი: ნავიგაცია, გორუა
შოთა რუსთაველი
Shota rustaveli qartuli.jpg
შოთა რუსთაველი, c. 1905
დაბადებაშ თარიღი:

ოეგ. 1160-65

ღურაშ აბანი:

პალესტინა

ერუანობა:

ქორთუ

საქვარუა:

პოეტი, მოაზირე, მეჭურჭლეთუხუცესი

პერიოდი :

შქა ოშწანურეფი

Magnum opus:

ჸილოშტყებამი

ჟანრი:

პოემა

შოთა რუსთაველი, რუსთველი (*დოხოლ. 1160/65 – ? ) — XII ოშწანურაშ დიდი ქორთუ პოეტი დო მოაზირე, ავტორი საქიანოთ ჩინებული პოემაშ „ჸილოშტყებამი“. მოსოფელიშ მიარე ლიტერატურაშმარჩქენჯეფიშით მირჩქინუაფუ შქაოშწანურეფიშ მოსოფელიშ ლიტერატურაშ ართ-ართი უშანულამაშ წჷმმარინაფალო.

გამნარყალა[რედაქტირაფა]

შოთა რუსთაველიშ ფრესკა იერუსალიმიშ ჯვარიშ მოსანტერს

შოთა რუსთაველიშ რინაშ დო მოღალობაშ გეშა ჩქინშახ დახე მუთუნინერი ჩინებას ვა მოუჭირინუაფჷ. ანდა ისტორიული, ლიტერატურული დო ფოლკლორული წყუეფიშ ოსხირშა აკმიქიმინუ დიდი პოეტიშ შურდგჷმაშ დო მოღალობაშ მიარე ვერსია. რუსთაველიშ ბიოგრაფიული მუნაჩემეფიშ დადგინალო ართ-ართი ჯინჯიერი წყუ თვითან მუში პოემა რე.

რუსთაველიშ ავტორობას მიდასურენა ჸილოშტყებამიშ პროლოგი („მა რუსთველქჷ,თიში ანბე ბლექსე გური ჭყოლირ მაფუ“, „მა, რუსთველი, ხელუათუ ათეს ვორთუქ ათეშენი“), ეპოლოგი, თაშნეშე XV-XVIII ოშწანურეფიშ ქორთული ჭარუობა (ათეშე უმოსი ორდოშიანი ჩინებეფი ვა მაპალუნა). ჯოხოდვალა რუსთაველი (რუსთველი) მიარსხუაფუ გეოგრაფიულ პუნქტის რუსთავს დო შანენს რუსთავიშ მახორუს ვარა რუსთავიშ ჯიხა-ნოღაშ მადუდეს, მინჯეს. თიჟამიშიან საქორთუოშ სოციალურ-პოლიტიკური სინანდულე მოფირქებაფუანა, ნამუდა მაჟირა შანულობა ოკო რდას თინინ. რუსთაველიშ ჯოხოშ გეშა კონდაკი ჩინებას მოჭირინუანა თეიმურაზ I (თინა ჸილოშტყებამიშ პერსონაჟეფიშ გეშა რაგადანს:„ათენეფი შოთა რუსთველქჷ გასქვამჷ ორთაშ სქვამებათია“) დო XVII-XVIII ოშწანურეფს შხვა ქორთუ ჭარუეფი. თესჷნე ადასურენს რუსთაველიშ ფრესკული პორტრეტი XIII ოშწანურაშ I გვერდიშ მუკნაჭარათ, ნამუთ რესტავრირაფილი სახეთ რე წჷმოჩუალირი იერუსალიმიშ ჯვარიშ მონასტერიშ სჷმეტის (ტ. გაბაშვილიშით 1757-1758 ძირაფილი დო უკულნეშის ზეთიშ ოღაფულეფიშ ფსქელი ფინათ ფორილი ფრესკა კილარჩქინჷ იერუსალიმიშ ომენცარე ექსპედიციაქ) დო თე ოშწანურასჷნე მონასტერიშ სააღაპო წინგის მოსაშინე „შოთაჲსა ჲ“, ნამუთ იგივე რუსთაველი ოკო ორდას. ფრესკაშ მუკნაჭარაშ მეჯინათ, რუსთაველს გოუნწყუ დო გუახალებჷ ჯვარიშ მონასტერი.

ჸილოშტყებამიშ მანუსკრიპტი

საორჩანო რე, ნამუდა პოეტი ჸოფე ომაფე კარიშ დიდი მეხელე, ვაზირი, თამარ მაფაწკჷმა დახოლობური პიჯი. თაშნეშე, თის ნოვალუე ქორთულ ოკულტე ობიექტეფიშ, თე შვანს ჯვარიშ მონასტერიშ მუკოლუფა. გჷმოთქუალირი რე სარზება, ნამუდა პოეტიქ შურდგჷმაშ ლიას იდჷ იერუსალიმშა, ქოგედირთჷ ბერო, თექინეშეს დოღურჷ დო თექინეშეს რე ნთხორილინ. ვემართებუ გინოჩამა პოეტიშ ბერო ულაშენ: ფრესკას გიმოხანტილ ქორთუ ჟინოსქუა ერიშკოჩიშ მუკოქვენჯის რე გიმონწყილი. თეწკჷმა რუსთაველს, მუჭოთ ვაზირსჷნ, შეულებუდჷ საქორთუოშენო უჸონაფუდჷკო მონასტერიშ გონწყუალა-გოახალაფაშო ოხვილური საქვარუა. რუსთაველიშ ბიოგრაფიულ ჩინებეფიშ მაკათაფუ შხვა ჭარალუობურ წყუეფს ჩქინშახ ვა მოუჭირინუაფჷ. კათური გჷნოჩამათ, პოეტი მესხი ოკო ორდას. მესხო კოროცხუნს თის პოეტი არჩილ II. ჸილოშტყებამიშ გოგინძორაფეფი ხოლო მიმოწურუანა შოთაშ მესხურ გამნარყალაშა. შელებუანი რე ჯოხოდვალა რუსთაველი არსხუაფუდას მესხეთიშ რუსთავს, ნამუთ იდვალუაფუ ახალციხე-ასპინძაშ შარაშ გოხოლუას.

პოეტიშ დაბადებაშ თარიღო მირჩქინანა 1160-1165 წანეფს. თინა სქიდუდჷ საქორთუოშ მაფაშ თამარიშ დო თიში ალმასქუშ დავით სოსლანიშ ჟიობუაშ პერიოდის, ქორთული სახენწჷფოს დო თიში კათაშ მატერიალური დო შურიელი პიორუაშ პერიოდის.

1960 წანას პალესტინაშა იშარეს ქორთუ მენცარეფქ ი. აბაშიძექ, გ. წერეთელქ, ა. შანიძექ, ნამუეფქჷთ იერუსალიმიშ ჯვარიშ მონასტერს მიგორუეს დო გინიღეს სჷმეტის გჷმოხანტილ შოთა რუსთაველიშ პორტრეტი. თაქ მოპალაფირ მოღეთ იდასურებუ, ნამუდა თინა რდჷ მეჭურჭლეთუხუცესი თამარიშ კარს. ლეგენდაშ მეჯინათ, პოეტიქ ღურჷ ჯვარიშ მონასტერს, მორო თე ვერსია ოდებელი რე.

რე ხოლო ართი ვერსია პოეტიშ გამნაჭყანობაშ გეშა, ნამუთ პავლე ინგოროყვაქ გუმოთქჷ მუში მონოგრაფიას „რუსთაველიანა“. თიშ მეჯინათ, შოთა რუსთაველი ორხველუდჷ უმაღალაშ არისტოკრატიაშ წირეს. თენა იდასურებუ პოემაშ დინორეთ. თის ჯგირო არჩქილედჷ ოურდუმე საქვარი დო თიში თინერი ნიუანსეფი, ნამუეფით ხვალე ჩინებული დო გუნამორსი ნჯღვერს ქარჩქვენუდჷ—და. თაშნეშე ქიანაშ დუდალუაშ, ომაფე კარიშ ინტრიგეფიშ, მაჯჷნალაშ დო ზებედარი ჯარალუაშ ართუაფაშ შხვა ნერობეფიშ აიწორო ჯგირი რჩქინა თიშა მიოწურუანს, ნამუდა შოთა რუსთაველი მუში ნახანდის ბრელშა ისტორიულ სინანდულეს გინმობჩანა. თენერი ჟინოსქუალეფი დო მაღალი ფეოდალი ჯოხოთ შოთა მუში ალმახანური ეპოქაშ ისტორიულ წყუეფს მოშინაფილ დო მუში გვარიშ გენეოლოგია თაშიო, თეშიო ჩინებული ოკო ორდას.

ათენეფშე გიშულირი, შელებუანი რე, ნამუდა პოეტი რდას შოთა გრიგოლიშ სქი ჰერეთიშ ერიშდუდი, ისტორიულ წყუეფს მოშინაფილ შოთა კუპარო. თის ჟამეფიშემაჭარუ პოზიტიურო ვა ახასიათენს, მორო ვართ თის ივარანს, ნამუდა უდიდაშ სახენწჷფო მოღალე რდჷ დო თიჟამიშიან არძო გურგაჩამალ აქციას ოკათუდჷნ, თინეფ შქას კოხტასთავიშ აკორაგადაფას.

გონათაფა[რედაქტირაფა]

შოთა რუსთაველქ, მუჭოთ რჩქუნ, გოსოფური გონათაფა ეჭოფჷ დიო საქორთუოს, იყალთოშ აკადემიას, უკული – ბიზანტიას; ქოდიგურუ ბერძენული, არაბული დო სპარსული ნინეფი, იჩინენდჷ ქორთუ მოაზირეეფიშ ნახანდეფს ვარინ, ანტიკურ ფილოსოფიას, ემპედოკლეშ, ჰერაკლიტეშ, პლატონიშ ნახანდეფსჷთ, ელახურ ლიტერატურას (ფირდოუსი, გურგანი, ნიზამი დო შხვა). ირფელი თენა, თაშნეშე პოეტიშ გურაფილობა ასტრონომიას, ასტროლოგიას, გეოგრაფიას, მედიცინას, ფილოსოფიას, სამართალს, ისტორიას, ოურდუმე საქვარს დო შხვა, ეხანტილი რე მუში პოემას.

მონძალა[რედაქტირაფა]

საქორთუოშ რესპუბლიკაშ უმაღალაშ ჯილდოს ხელუანობაშ დო ლიტერატურაშ დარგის შოთა რუსთაველიშ ჯოხო გეძჷ (შოთა რუსთაველიშ სახენწჷფო პრემია). ქართიშ თარ პროსპექტისჷთ რუსთაველიშ ჯოხო გეძჷ. თაშნეშე რე შოთა რუსთაველიშ სახენწჷფო აკადემიური თეატრი, შოთა რუსთაველიშ ქორთული ლიტერატურაშ ინსტიტუტი საქორთუოშ მენცარობეფიშ აკადემიაწკჷმა, დო ა.უ.

ლიტერატურა[რედაქტირაფა]

რესურსეფი ინტერნეტის[რედაქტირაფა]

Commons-logo.svg
ვიკიოწკარუეს? რე ხასჷლა თემაშენ: