აუშვიციშ საკონცენტრაციე კარე

საკონცენტრაციე კარე დო ღურაშ კარე აუშვიცი (საკონცენტრაციე კარე დო ღურაშ კარე ოშვიენჩიმი: გერმ. Konzentrationslager Auschwitz, პოლ. Obóz Koncentracyjny Auschwitz; საკონცენტრაციე კარე დო ღურაშ კარე ბირკენაუ: გერმ. Konzentrationslager Birkenau, პოლ. Obóz Koncentracyjny Birkenau, საკონცენტრაციე კარე დო ღურაშ კარე აუშვიც-ბირკენაუ: გერმ. Konzentrationslager Auschwitz-Birkenau, პოლ. Obóz Koncentracyjny Auschwitz-Birkenau) — ნაცისტური საკონცენტრაციე დო ღურაშ კარეეფიშ კომპლექსი, ნამუთ იდვალუაფუდჷ 1940 —1945 წანეფს, ჟილენ სილეზიაშ გაუს (გერმ. Gau Oberschlesien), გენერალ-საგუბერნატოროშ ბჟადალშე, ნოღა ოშვიენჩიმიშ გოხოლუას, ნამუთ 1939 წანას, ჰიტლერიშ ზოჯუათ, მერსხუაფილქ იჸუ მასუმა რაიხიშ ტერიტორიაშა, კრაკოვიშ ბჟადალშე 60 კილომეტრიშ მეძენას. მოსოფელიშ პრაქტიკას მეღებული რე კარეშ გერმანული ჯოხოშ, „აუშვიციშ“ გჷმორინაფა^[1], დო ვართ პოლონური „ოშვიენჩიმი“ ვარ-და „ოსვენციმი“, ანდანე ზუსტას გერმანული ჯოხოდვალა გჷმირინუაფუდუ ნაცისტური ადმინისტრაციაშით. პოლონეთის დუდშე საკონცენტრაციე კარეს ჯოხოდჷ „ოშვიენჩიმი“, („ოსვენციმი“), მარა ასეშო გჷმირინუაფუ ხვალე ჯოხო „აუშვიცი“, თიშ გეშა, ნამჷ-და მაქსიმალურო კვათიერი გინორთი უღჷდას ნაცისტური საკონცენტრაციე კარეს დო ჯვეში პოლონური ნოღაშ ჯოხოდვალასჷნ.

1945 წანაშ 27 ღურთუთას კარე გადუდიშულჷ სხუნუეფიშ არმიაქ. კარეშ გოდუდიშლაფაშ დღა გოეროშით მერჩქინელი რე მუჭოთ ჰოლოკოსტიშ ნაკიბირეფიშ შვენაშ ერეფოშქაშე დღა.

დოხოლაფირო 1,1 მილიონი ადამიერი, ნამუეფშე მეხოლაფირო 1 მილიონს ურიეფი აკმადგინანდესჷნ, 1941—1945 წწ. ჸვილიქ იჸუ კარეს^[2]. აუშვიც-ბირკენაუ ნაცისტური ჭყვიდუაშ კარეეფშე ართ-ართი არძაშე უშხუაში დო განწე ხანს მოქიმინჯე რდჷ, თეშ გეშა თიქ ჰოლოკოსტიშ ართ-ართი სიმბოლოთ გჷნირთუ.

1947 წანას, კარეშ ტერიტორიას დორსხუაფილქ იჸუ მუზეუმქ, ნამუთ მიშმურს იუნესკოშ მოსოფელიშ მონძალაშ ერკებულშა. მუზეუმი რეგისტრირაფილი რე პოლონეთიშ მუზეუმეფიშ სახენწჷფო რეესტრის.