ბესარიონ ქებურია

ვიკიპედიაშე
ბესარიონ ქებურია

ბესარიონ ქებურია
ბიოგრაფიული ჩინებეფი
დაბადებაშ თარიღი

15 ფურთუთა, 1870

დაბადებაშ აბანი

ჩხოროწყუშ რაიონი, საქორთუო

ღურაშ თარიღი

1957

ღურაშ აბანი

ქართი

ნთხორუაშ აბანი

ჩხოროწყუშ რაიონი

ერუანობა

ქორთუ


ბესარიონ ქებურია (დ. 15 ფურთუთა, 1870, ჩხოროწყუშ რაიონიშ ოფუტე თუდოლენი ჩხოროწყუ — ღ. ნ. ქართი, 1957) — მაართა ქორთუ მაფურინალ-კონსტრუქტორი, საქორთუოშ ომენოღალე ავიაციაშ დჷმარსხუაფალი.

ბიოგრაფია[რედაქტირაფა | წყუშ რედაქტირაფა]

დებადჷ 1870 წანაშ 15 ფურთუთას ჩხოროწყუშ რაიონიშ ოფუტე თუდოლენი ჩხოროწყუს, ხურო სავლე ქებურიაშ ფანიას. მუში ოფუტეს ჟირი წანაშ გურაფაშ უკული, დეკანოზ ანტონ ვეკუაწკჷმა გაგჷნძორჷ. 14 წანერი რდჷნ ჩხოროწყუშე ჭყიშეფს მიდაჸუნჷ ფუთიშა. თექ დინულირქ მაართათ ძირჷ მატარებელი, მუქჷთ თინერი ნძალიერი ინოჩამა მახვამილუ ბაღანაშა, ნამუდა რკინაშარაშ კიდანჯუას დოსქილადა გეგნოჭყვიდჷ. ინჟინერ სლივიცკიშ მოხვარათ, ნამუთ ელდარ დო გიორგი შენგელაიეფიშ ჯიმადი რდჷნ, ახალი პროფესიაშ დოგურაფას ქიგეუდირთჷ. 1898 წანას პეტერბურგის ექსტერნას ჩაბარჷ გამორსეფი დო ქიმეჩეს რკინაშარაშ უნჩაში ტექნიკოსიშ ჯოხოდვალა. თე პერიოდის ჩილო მიჸონჷ უსქვამაში გორალი ცირა – სოფიო შიუკაშვილიშა, ნამუეფსჷთ აშის სუმი ქომოლ-სქუაქ.

ოავიაციე კარიერა[რედაქტირაფა | წყუშ რედაქტირაფა]

1908 წანას მუში ხეთ ეთმიოგანს პლანერს დო ეფურინუაშ მორსებეფს ამანჯენს საბურთალოშ გვალეფშე. 1909 წანას, მუჟამცჷთ მოსოფელს გისიმჷ სენსაციაშ ხონარქ, ნამუდა ფრანგი ავიატორი ლუი ბლერიოქ, დორხველი კონსტრუქციაშ მონოპლანით გჷნოფურინჷ საფრანგეთიშე ინგლისიშან, ბესარიონქ გეგმოჩჷ ირფელი, მუთუნი ქოუღუდჷ-და დო აკოშაყარელი თანხათ პარიზშა მიდეშარჷ. უსქვამაშ ალმასქუ დო სუმი ქომოლ-სქუა ხვალე ქოდუტებჷ. 1909 წანას ოავიაციე სკოლა გვალო 16 კოჩქ ათუ დო 1910 წანაშ მარაშინათუთას, ბესარიონ ქებურიაქ გჷნირთჷ 209-ა მაფურინალი ავიატორო. ზოხორინელი ფურინუეფშო უციო რდჷ ოფურინჯაშე სკოლაშ თება. პარიზიშ ლუი ბლერიოშ ოფურინჯაშე სკოლას გურაფას დიდი თანხა (2600 ფრანკი) ოკოდჷ. თეწკჷმა ირი ავარიაშ შვანს მოგურაფუეფს აჯარიმენდეს. თეშ მოხ, თინეფს აეროპლანიშ ოჸიდე თანხა ხოლო ოკო დოსქილადჷდესკონ, ოდო ავარიეფი შხირას მუთმოხვადუდჷ. ბესარიონქ პრობლემა ათაშ გამანჯჷ: დუდშეშე ქიჸიდჷ ბლერიოშ X-ტიპიშ მონოპლანი (25 ცხენიშნძალამი მატორით. უმოსი ნძალიერი ქვარქვანტიშო ფარაქ ვა უბაღჷ) დო რსულაშო უმუხაზირებუო ამანჯჷ პროგრამა — ბრუოშა აკოფურინჷ აეროდრომი დო აიწორო ოში მეტრა დიამეტრიშ წირეს ქოდაფურინჷ.

ფსუაჩანაფილ ბლერიოქ თის ქვარქვანტიშ ომათირე ნორთეფი ქაჩუქჷ. ხოლო უმოსი, თიქ კურსთებული ქაწურინუ საფრანგეთიშ პრეზიდენტ ფალიერს, მიქჷთ ქებურიას შარა დოუხვამჷ.

ბესარიონ ქებურიას ჟირხოლო მასქერიშ ხელუაქ გაგმადირთჷ — პროპელერს მუში ხეთ ეთმიოგანდჷ დო მიარე კატასტროფას მონახვამილა ტრავმასჷთ მუშით ისქილიდუანდჷ.

1913 წანაშ დაჭყაფუს, ქებურიაქ ეკონიათ მანწყუ ოძირაფალი ფურინუა ბათუმს. დიდ სიმაღალას ქვარქვანტიქ გაჩენდჷ დო ბესარიონქ პლანირაფათ ზუღას ქაშადოხოდჷ. მუჟამს მაზუღალეფქ მიოჭიშესჷნ, ქებურია უკვე იშქვიდუდჷ, მარა ფურინჯის ხეს ვა უტალენდჷ. თიშო თარი რდჷ ქვარქვანტიშ გინოსქილადა. თის შურდგჷმა ფურინუაშ უმუშო ვა აფუდჷ აწორინაფილი თოლშა, მარა ლჷმაშ დოჭყაფაქ თიში გეგმეფს ხე დუნჩალჷ. რე ვერსია, ნამუდა ბესარიონ ქებურიაქ გამორსაშ ბარებაშ ბორჯის მაართაქ აკოფურინჷ ეიფელიშ ჸორშინ... 20-იან წანეფს, ქებურია არსხუაფუ ეიფელიშ ფირმას დო თინეფშე რკინაშ ეიოკოროფალი ხინჯიშ კონსტრუქციას ჸიდულენს. ცემს დო ლიკანს რკინაშ ხინჯეფქ, საფრანგეთიშე მოჯღონელი კონსტრუქციათ, ქებურიაშ ჭყოლოფათ იჸუ ეგაფილქ. ბესარიონ ქებურიაშ უკული ლუი ბლერიოშ ოფურინჯაშე სკოლა, ხოლო მუსხირენი ქორთუქ ათუ.

1923 წანას ქებურია ოჰეერე ფლოტიშ დუდმახვენჯო გეგშაგორეს. დაჯილდოებული რე ლენინიშ ორდენით. მოგვიანაფილო ქართიშ ართ-ართ შოშეს თიში ჯოხო გიოდვეს. ქებურიაშ ძეგლეფი გედგჷ ჩხოროწყუს დო ქართიშ აეროპორტის.

ღურჷ 1957 წანას 88 წანაშ ხანს, ქართის. ნთხორილი რე ოდაბადურ რაიონს.

რესურსეფი ინტერნეტის[რედაქტირაფა | წყუშ რედაქტირაფა]