ნოღა
| შილა |
გერბი |
 |
 |
|
ბოლონია (იტალ. Bologna, ემილ. Bulåggna, ლათ. Bononia) — ნოღა ოორუე იტალიას, ემილია-რომანიაშ რეგიონიშ უკაბეტაში ნოღა დო ბოლონიაშ პროვინციიაშ ადმინისტრაციული ცენტრი. იტალიაშ ნოღეფს შქას, მახორობაშ მუდანობაშ მეჯინათ მა-7 აბანს რე, იდვალუაფუ 1-მილიონიანი მეტროპოლიური ოფირჩაშ ცენტრის. ნოღას ოხორანს დოხოლაფირო 394,843 მენმოღალე (2020). რე რკინაშარაშ, ოავტომობილე დო ოჰეერე რზეფიშ ნოსქვი.
ბოლონია შანულამი კულტურული დო ჸოფური ცენტრი რე, ნოღაშ ოქინაფური შანულამობა შილებე მეჭარილქ იჸუას მუჭოთ მონუმენტეფიშ დო არქიტექტურული ნოდგჷმეფიშ (შქა ოშწანურეეფიშ ყორშეფიშ, ანტიკური დგჷმილეფიშ, ოზვამეეფიშ) ჰომოგენურ აკნაკათას, თაშნეშე ხელუანობაშ მუნუშეფს, ნამუეფჷთ პირველი კლასიშ არქიტექტურული დო ხელუანობური ისტორიაშ დოინალაფა რე. ბოლონია შანულამი ოტრანსპორტე ოკართუ შარა რდჷ ოორუე იტალიაშ რზეფიშ დო ორკინაშარე ღოზეფშო, ბოლონიას თაშნეშე ანდა მექანიკური, ელექტრონული დო ოჭკომალიშ ინდუსტრიაშ დუდ ოფისი რე. არძაშე ბოლო 2009 წანაშ ევროპაშ რეგიონული ეკონომიკაშ ძინაშ ინდექსიშ (E-REGI) მეჯინათ, ბოლონია იტალიას პირველი დო ევროპას 47-ა ნოღა რე თიში ეკონომიკური ძინაშ ინდექსიშ მეჯინათ.
ბოლონია პრესტიჟული კულტურული, ეკონომიკური დო პოლიტიკური ინსტიტუტეფიშ ოდაბადე რე, თაშნეშე, მუჭოთ ევროპაშ ართ-ართი არძაშე ოსქვაფური ოვაჭარე გჷმოფინუეფიშ რაიონი.
