გურდვარა

ვიკიპედიაშე
ჰარმანდირ საჰიბი — სიქეფიშ თარი ოხვამე (გურდვარა)

გურდვარა (პენჯ. ਗੁਰਦੁਆਰਾ, gurduārā ვარდა ਗੁਰਦਵਾਰਾ, gurdwārā — გურუშ კარმინალი) — სიქური ღორონთიშონინალე არქიტექტურული დგჷმილი, სიქური ჯარალუაშ სოციალური რინაშ დო რელიგიური ცენტრი.

გუდვარეფი სიქეფშო ისტორიულო შანულამ აბანეფს აკმიგაფუდჷ, ნამუეფით ვითობათ სიქი გურუშ ჯოხოშა დო საქვარუაწკჷმა რდჷ მერსხილი.

გურუდვარაშე არძაშე უმოსო შანულამი იდვალუაფუ ნოღა ამრიტსარს — ჰარმანდირ საჰიბი („ორქოშ ოხიდა“). ირ გურუდვარას მილმედვალუ „ადი გრანთჰი“, ნამუშ მუკი-მუკი დო მეშქაშობათ სიქური რიტუალეფი ირსულებუ. გურდვარა — ჯარალუაშ საართო რინაშ ცენტრი, სოდე არძა შანულამი მოლინა იმანჯებუ. გურდვარას მუთმოხვადუ სიქეფიშ რინაშ უშანულამაში მოლინეფი: თექ ორგანიზაფას უწიენა სკოლეფს; მითმირზიებაფუ სერგათანაფალი დო ოდიარაფალი. გურდვარას ოჯარალე სამუშეფი — აკოგაფა, რემონტი, ოჯარალე საგესქუს (სატრაპეზო) მუშობა — სიქეფიშო სავალდვალო რე. გურდვარეფი შანულამი მატერიალური საშუალებეფიშ წყუ რე, ნამუეფით მორწუმეეფიშ შჷნაწირათ დო ოხიდაშ დიხაშ დორხველობაშე მიშნაველით იშაყარუ.

მაჟირა გურუ ანგადაშ (1539—1552) მართუალაშ ბორჯის, უფასო საგესქუეფი — ლანგარეფი მიშეღეს, სოდე შხვადოშხვა კასტაშ მაკათურეფს შეულებუდეს ოჭკომალი უგუხურგეთ მეუღებუდესკონ. თიმ ბორჯიშე ლანგარეფი გურდვარაშ უგურთუ ნორთი რე.

ათეჟამშო, ინდოეთის პრაქტიკულო არძა სიქური გურდვარაშ საქვარიშ კონტროლს გურდვარაშ მართუალაშ კომიტეტი ახორციელენს.


wikistub ათე სტატია მერკე რე.
თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ.