ერლ უილბურ საზერლენდი

ვიკიპედიაშე
ერლ უილბურ საზერლენდი
ინგლ. Earl Wilbur Sutherland Jr.
დაბადებაშ თარიღი:

19 გერგობათუთა, 1915

დაბადებაშ აბანი:

ბერლინგეიმი, კანზასი, ააშ

ღურაშ თარიღი:

მელახი 9, 1974 (58 წანერი)

ღურაშ აბანი:

მაიამი, ფლორიდა, ააშ

მენოღალობა:

ამერიკაშ აკოართაფილი შტატეფიშ შილა ააშ

ომენცარე სფერო:

ბიოქიმია

სამუშაშ აბანი :

ვანდერბილტიშ უნივერსიტეტი
კეისიშ ბჟადალი ორეზერვე უნივერსიტეტი
ვაშინგტონიშ უნივერსიტეტიშ მედიცინაშ სკოლა

ალმა-მატერი:

ვაშინგტონიშ უნივერსიტეტი (სენტ-ლუისი)
ვოშბერნიშ უნივერსიტეტი

ჯოხოშინელი მოგურაფეეფი:

ფერიდ მურადი

ჯილდოეფი დო პრემიეფი:

გაირდნერიშ პრემია (1969)
ალბერტ ლასკერიშ პრემია (1970)
დიკსონიშ პრემია (1971)
ნობელიშ პრემია ფიზიოლოგიაშ დო მედიცინაშ დარგის (1971)
მენცარობაშ ერუანული მენდალი (1973)

ერლ უილბურ საზერლენდი უკულაში (ინგლ. Earl Wilbur Sutherland Jr.; დ. 19 გერგობათუთა, 1915, ბერლინგეიმი, კანზასი, ააშ — ღ. 9 მელახი, 1974, მაიამი, ფლორიდა, ააშ) — ამერიკალი ფარმაკოლოგი დო ბიოქიმიკოსი, ჰორმონეფიშ მოქმედალაშ მექანიზმიშ მენცარული რკვიებაშ გეშა გინოჩეს ნობელიშ პრემია ფიზიოლოგიაშ დო მედიცინაშ დარგის 1971 წანას.

ბიოგრაფია[რედაქტირაფა | წყუშ რედაქტირაფა]

ერლ უილბურ საზერლენდიქ დებადჷ 1915 წანაშ 19 გერგობათუთას, კანზასიშ ნოღა ბერლინგეიმს. გურაფულენდჷ ვოშბერნიშ კოლეჯის, სოდეთ მიპალუ მენცარობაშ ბაკალავრიშ ხარისხი 1937 წანას. საზერლენდიქ უკულ გურაფა გაგინძორჷ ვაშინგტონიშ უნივერსიტეტიშ მედიცინაშ სკოლას. ჸათაქ გეჩინებაფუ გიშარჩქინელი მენცარი კარლ ფერდინანდ კორი. საზერლენდიქ 1942 წანას მიპალუ მედიცინაშ დოქტორიშ ხარისხი. გურაფაშ თებაშ უკული საზერლენდი მონაწილენდჷ მაჟირა მოსოფელიშ ლჷმას. რდჷ ამერიკაშ არმიაშ ართ-ართი ჰოსპიტალიშ ექიმი. ლჷმაშ თებაშ უკულ ვაშინგტონიშ უნივერსიტეტიშა დირთჷ, სოდეთ ორთუდჷ ექაპერიმენტეფს კორიშ ლაბორატორიას. საზერლენდის, ვაშინგტონიშ უნივერსიტეტიშ მედიცინაშ სკოლას შხვადოშხვა პოზიციეფ უკინებუდჷ: რდჷ ფარმაკოლოგიაშ ინსტრუქტორი 1945-1946 წანეფს, ბიოქიმიაშ ინსტრუქტორი 1946-1950 წანეფს, ბიოქიმიაშ ასისტენტ-პროფესორი 1950-1952 წანეფს დო ბიოქიმიაშ ასოცირებული პროფესორი 1952-1953 წანეფს. 1953 წანას ერლ საზერლენდიქ კლივლენდიშა (ოჰაიო) გინილჷ დო მუშობა ქიდიჭყჷ კეისიშ ბჟადალი ორეზერვე უნივერსიტეტის, ფარმაკოლოგიაშ პროფესორო დო ფარმაკოლოგიაშ დეპარტამენტიშ დირექტორო. 1963 წანაშე საზერლენდი რე ვანდერბილტიშ უნივერსიტეტიშ მედიცინაშ სკოლაშ ანატომიაშ პროფესორი. საზერლენდი ვანდერბილტიშ უნივერსიტეტიშ მუშენდჷ 1973 წანაშა.

ჯილდოეფი დო პრემიეფი[რედაქტირაფა | წყუშ რედაქტირაფა]

ერლ საზერლენდი რდჷ შხვადოშხვა პრესტიჟული პრემიეფიშ დო ჯილდოეფიშ ლაურეატი. 1969 წანას საზერლენდის გინოჩეს გაირდნერიშ პრემია, 1970 წანას ალბერტ ლასკერიშ პრემია, 1971 წანას ნობელიშ პრემია ფიზიოლოგიაშ დო მედიცინაშ დარგის დო 1973 წანას საზერლენდიქ მიპალუ მენცარობაშ ერუანული მენდალი. 1952 წანას საზერლენდიქ მიპალუ ბანტინგიშ მემორიალური ლექციაშ პრემია. 1973 წანაშე საზერლენდი რდჷ ამერიკაშ მენცარობაშ ერუანული აკადემიაშ მაკათური. საზერლენდი რდჷ ამერიკაშ ქიმიაშ საზოგადოებაშ დო ამერიკაშ ფარმაკოლოგიაშ საზოგადოებაშ მაკათური. 1951-1956 წანეფს ერლ საზერლენდი რდჷ ბიოქიმიური ჟურნალიშ ორედაქციე სხუნუშ მაკათური. 1974 წანას, საზერლენდიშ ღურაშ უკულ, მილერიშ მედიცინაშ სკოლაქ დარსხუ საზერლენდიშ ჯოხონობაშ პრემია დო 1976 წანას ვანდერბილტიშ უნივერსიტეტიქ დარსხუ საზერლენდიშ პრემია, ნამუთ ირწანას გინაჩამუ გიშარჩქინელ მენცარეფს.

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ: