ვენეროლოგია
ვენეროლოგია რე მედიცინაშ დარგი, ნამუთ გურაფულენს ვენერიულ ლახარეფს დო თინეფიშ კურნალობა-სქილადაფაშ მეთოდეფს. ვენერიული ლახარეფი რე ინფექციეფი, ნამუთ გინმაჩამუ ართ ადამიერშე მაჟიას სქესობრივი აქტით, გიშაკერზაფილო ვაგინალური, ანალური დო ორალური სექსით. ვენერიული ლახარეფიშ შხვადოშხვა ტიპეფი არსებენს. ბაქტერიულ ინფექციეფო იკოროცხუ: ქლამიდიოზი, გონორეა, სიფილისი დო შხვეფი. ვირუსულო ინფექციეფი რე: გენიტალური ჰერპესი, შიდსი, გენიტალური კონდილომა. პარაზიტული ინფექცია რე ტრიქომონოზი. თენეფიშ გარდა არსებენს მიკოზეფი, მაგალთო კანდიდოზი. ვენერიულ ლახარეფშე დუდიშ თხილუა შილებე კონდომიშ გიმორინაფათ დო ვარდა ვაქცინაციათ. ვაქცინაციას შეულებჷ ადამიერი თხილუას ჰეპატიტი B-შ დო პაპილომავირუსიშ ინფექციეფშე. ვენერიული ლახარეფიშ კურნალობა დო სქილადაფა შილებე, მარა შიდსიშ სქილადაფა ამდღარ მედიცინას ვა რე. 2015 წანაშ მუნაჩემეფით მოსოფელს ვენერიული ლახარა უღუდჷ 1.1 მლრდ. ადამიერს. ჸათავრეშე 500 მილიონი ადამიერი დალახებური რდჷ სიფილისიშე, გონორეაშე, ტრიქომონოზიშე დო ქლამიდიოზიშე ართ-ართით. 530 მილიონ ადამიერი დალახებური რე გენიტალური ჰერპესით დო 290 მილიონ ოსურს უღჷ პაპილომავირუსი. ბრელ ქიანას ვენეროლოგიაშ დარგი მერსხილი რე დერმატოლოგიას. ტერმინი ვენეროლოგია მოურსჷ ჯვეში რომაული მითოლოგიაშ ჸოროფაშ დო სექსიშ ღორონთიშე ვენერა.