ვენსან კასელი

ვენსან კასელი
ვენსან კასელი 2011 წანას
დაბადებაშ ჯოხო	ვენსან კროშონი
დაბადებაშ აბანი	პარიზი, საფრანგეთი
დებადჷ	23 გერგობათუთა, 1966 (1966-11-23)
საქვარუა	არტისტი
აკოქიმინჯალაშ წანეფი	1989-ამდღარშახ
ალმასქუ(ეფი)	მონიკა ბელუჩი (1999-2013)
ოფიციალური ვებხასჷლა	ოფიციალური ხასჷლა

აკადემიაშ ჯილდოეფი
სეზარი

ვენსან კასელი (ფრანგ. Vincent Cassel; დ. 23 გერგობათუთა, 1966, პარიზი, საფრანგეთი) — ფრანგი კინოარტისტი, პროდიუსერი დო სცენარისტი. მუამუში ჟან-პიერ კასელი ხოლო არტისტი რე. ვენსან კასელიშ ალმასქუ რე იტალიარი არტისტი დო ფოტომოდელი მონიკა ბელუჩი. 2009 წანას კასელს მიაჩჷ სეზარიშ პრემიაქ ქომოლკოჩიშ როლიშ საუჯგუშო რსულებაშო ფილმის „მერინი“.

ბიოგრაფია

ვენსან კასელქ დებადჷ 1966 წანაშ 23 გერგობათუთას საფრანგეთიშ ნანანოღა პარიზის, ფრანგი არტისტიშ ჟან-პიერ კასელიშ ფანიას. მუჭოთ არტისტიქ კარიერა ნიუ-იორკის დიჭყჷ, უკული დირთჷ საფრანგეთის, სოდეთ მუსხირენ წანა იმიშუ ჩინებული ფრანგი არტისტიშ ჟან-ლუი ბაროშ თეატრის.

თიში დებიუტიქ კინოს 1989 წანას იჸუ. მაართა წუმოძინეფს 1990-იან წანეფს მიოჭირინუ, მუჟამსჷთ მუდარენ ჩინებულ ფილმის ქაკათჷ. შანულამი რდჷ ფილმეფი „დობერმანი“ დო „ჟანა დ'არკი“, სოდეთ არტისტიქ ოარტისტე ნიჭი გუმარჩქინუ. ფილმის „დინცხფერიში წყარმალუეფი“ ფრანგ მურიცხწკჷმა ჟან რენოწკჷმა დო მუამუშწკჷმა ჟან-პიერ კასელწკჷმა აჸუ ლაჸაფიქ. 2001 წანას გინიღესჷ ფილმის „გერიშ ოჯიმალე“, ნამუთ გვარიანო მაღალმიშმალუამ კინოთ გინირთჷ. 2005 წანას ილაჸაფჷ ფილმის „ღალატიშ ფასი“, ნამჷთ შვედი რეჟისორქ – მიკაელ ჰეფსტრემიქ გინიღჷ. ათე ფილმის კასელი აბრაგიშ როლს არსულენს, ნამჷთ მუში ალმასქუწკჷმა ართო მოღორებათ დიდ ფარეფს მიდუღანს რაგვის გობუნილ ნოსირს.

2006 წანას მონიკა ბელუჩიწკჷმა ართო ილაჸაფჷ ფილმის „შაიტანი“. 2010 წანას თარი როლი არსულჷ რომან გავრასიშ დრამას „ჩქინი დღა დოდირთუ“, ხოლო რდჷ ფილმიშ პროდიუსერი. ართ-ართი ბოლო როლი მიღჷ ფილმის „უჩა ოლორი“, სოდეთ თიში პარტნიორი რდჷ ნატალი პორტმანი.

ფილმოგრაფია

წანა		მარგალურო	ოდაბადური ჯოხოდვალა	როლი
1993	ფ	მეტისი	Métisse	მაქსი
1995	ფ	ჯეფერსონი პარიზის	Jefferson in Paris	კამილ დესმულინი
1995	ფ	ჯოგება	La Haine	ვინცი
1997	ფ	დობერმანი	Dobermann	დობერმანი
1998	ფ	ელისაბედი	Elizabeth	ანრი III ვალუა
1999	ფ	ჟანა დ`არკი	The Messenger: The Story of Joan of Arc	ჟილ დე რე
1999	ფ	ოტელი „პარადიზო“	Guest House Paradiso	ჯინო ბოლონეზე
2000	ფ	დინცხფერიში წყარმალუეფი	Crimson Rivers	მაქს კერკერიანი
2001	ფ	გერიშ ოჯიმალე	Brotherhood of the Wolf	ჟან-ფრანსუა დე მორანჟი
2003	ფ	დღანარკვანი	The Reckoning	ლორდ დე გი
2004	ფ	ოუშენიშ ვითოჟირი მაჸალე	Ocean's Twelve	ფრანსუა ტულუ
2006	ფ	შაიტანი	Sheitan	ჯოზეფი
2007	ფ	ოუშენიშ ვითოსუმი მაჸალე	Ocean's Thirteen	ფრანსუა ტულუ
2007	ფ	ბჟაეიოლური დაპიჯეფეფი	Eastern Promises	კირილი
2008	ფ	მერინი	Mesrine	ჟაკ მერინი
2010	ფ	უჩა ოლორი	Black Swan	თომას ლეროი
2011	ფ	ჩქინი დღა დოდირთუ	Our Day Will Come	პატრიკი
2011	ფ	ოშქურანჯი მეთოდი	A Dangerous Method	ოტო გროსი

ოინტერესე ფაქტეფი

• ვენსან კასელი მოღალენს ხოლო მუჭოთ რეჟისორი;
• უჩქუ აფრო-ბრაზილიურ ოლჷმერი ხელუანობაშ – კაპოეირას;
• თიში სიმაღალა 1.87 სმ;

ფანია

ვენსან კასელს ჸუნს და – სესილ კასელი, ნამჷთ ხოლო არტისტი რე. ვენსან კასელი გურგინელი რე იტალიარ არტისტი – მონიკა ბელუჩიშა, ნამუშეთ ჟირი ცირასქუა ჸუნს: დევა (დ. 12 ეკენია, 2004) და ლეონი (დ. 21 მაისი, 2010).

რესურსეფი ინტერნეტის

• თარგი:ოფიციალური ხასჷლა
• ვენსან კასელი — კინოფილმეფიშ ინტერნეტ მუნაჩემეფიშ ბაზას (ინგლისური)
• ვენსან კასელი (ინგლისური)
• ვენსან კასელი Archived 2011-05-21 ვებ-ხასჷლას Wayback Machine. (ინგლისური)