თოფური

ვიდეო თოფურიშ გეშა

თოფური, სკაშ თოფური — ანდაღებულ ოჭკომალ პროდუქტი. არძაშე შხირას რაგადანა ნატურალურ, ე.ი. სკაშ თოფურშენ, ნამუთ რე გემუანი, სიროფიშობურ ღვანდი, ნამუსჷთ პეულიშ ნექტარშე ვარ-და მანანაშე შაყარანს მოხანდე სკა, ჩიყვაყვის გინმამუშენს დო ოჭკომალო გჷმირინუანს; ბუკიშა მითოღალირ ნექტარიშე სკა ორთჷ აქტიურ ვენტილაციას დო ზედმეტ წყარ ჭიე-ჭიეთ იორქებუ, მუთმოხვადჷ რთულ შანქარეფიშ ინვერსია. ათე პროცესის თოფურიშ მონდინაფა ჯოხო. საბოლათ თოფურს სქიდჷ 18-22% წყარი, უკაჭულ შანქარეფი, ჯიმუეფი, ვიტამინეფი, არომატული, საღაფლა ღვანდეფ დო შხვა, ნამუშ აკოდგინალუას დოჸუნს თოფურიშ ფიზიკურ დო ქიმიურ მუშობურობეფი. თიშ ქიმიურ აკოდგინალუა დოჸუნს ჩანარეფიშ გვარობას, კლიმატურ პიჯალეფს დო შხვა. თოფურიშ აკოდგინალუაშა მიშმურს 13-20% წყარი, 80%-შე უმოს ნოშქერწყარეფი (გლუკოზა, ფრუქტოზა, საქაროზა, მალტოზა), 0,4% ცილა, 0,3% ტუტა, თაშნეშე ორგანულ ბჟეფი, ფერმენტეფი, ასკორბინიშ ბჟე დო შხვ. თოფურს უღუ ანდანერ ოსქილადე, დამაკონსერვაფალი, ფოკვაშ სოკოეფიშ სააწმარენჯო დო შხვა მუშობურობეფი.^[1]

გოჭყაფაშ მეჯინათ თოფურ შილებე ორდას მონო- ვარ-და პოლიფლორული. პირველს ორხველჷ ლაკაციაშ, ცხვაცხვიშ, ჭუბურიშ, ბჟამაჯინუშ ვარ-და შხვა ნამდგა ჩანარშე მენაღებჷ თოფური, მაჟირას — დოლოშ ანდანერი პეულიშე ვარ-და ტყაშ მათოფურე ნექტარშე მენაღებჷ თოფური. ნატურალურ თოფურს მუში გლუკოზაშ ვარ-და ფრუქტოზაშ მაღალი კონცენტრაციაშ გეშა ახასიათენს კრისტალიზაცია. თე პროცესი უწაიათ მეურს 13-14 °C ტემპერატურას. სკაშ თოფური შილებე ორდას სარანჯამი ვარ-და გიშაწირილი. მუჭოთ ართი, თეშ მაჟირა მაღალი ოჭკომური ღებათ დო სამკურნალე მუშობურობეფით გიშეგორუაფუ.^[2] თიში მაღალი ოჭკომური ღება დო სამკურნალე მუშობურობეფი გჷთმითანჯუ ვა ხვალე ლექინას ასათვისაფალი შანქარეფიშ კაბეტი მუდანობათ, თაშნეშე ფიზიოლოგიურო რსულფასამი მინერალური ღვანდეფიშ, ფერმენტეფიშ, ვიტამინეფიშ დო ანტიმიკრობული ღვანდეფიშ აკოდგინალუათ. ნატურალური თოფური აჭყანიერენს ღვანდეფიშ თირუას, უღჷ ბაქტერიოციდული, ანთებაშ სააწმარენჯო დო მატონიზაფალი მუშობურობა, აბიწორენს ნორშვეფიშ აკოდგინალუას, ჭკანტუნს ოჭკომალიშ მარცუაფალი სისტემაშ მუშობას, ასტიმულირენს დინოხოლენი ორგანოეფიშ დო იმუნური სისტემაშ მუშობას.^[3]

თაშნეშე რე ხელუანური თოფური, ნამუსჷთ მუთუნნერი რსხუ ვაუღუ ნატურალურ თოფურწკჷმა. თის აწარმენა საქაროზაშ ინვერსიათ ლიმონიშ ბჟეშ გეძინათ. კანკალეშა გეთმუძინანა სინთეთიკურ არომატიზატორეფს. ხელუანური თოფური შილებე გჷმორინაფილ ორდას მუჭოთ ოჭკომალი ღვანდი, მარა თის, ვაუღჷ მარგებელი დო სამკურნალე მუშობურობეფი. თოფურიშ ფალსიფიკაცია ფართოთ რე მოდვალირი. თოფურიშ ფალსიფიცირაფაშ არძაშე ლექინი მოხუჯა: შანქარიშ სიროპის გეთმუძინანა ძმარს დო საღაფლას; თეჯგურა „თოფურშა“ ჩაჩანური უჯოხონა.^[4]

თოფურიშ ნერგვარობეფი:^[5]