იოჰანეს ფიბიგერი

იოჰანეს ფიბიგერი
დან. Johannes Fibiger
დაბადებაშ თარიღი:	23 პირელი, 1867
დაბადებაშ აბანი:	სილკებორგი, დანია
ღურაშ თარიღი:	ღურთუთა 30, 1928 (60 წანერი)
ღურაშ აბანი:	კოპენჰაგენი, დანია
მენოღალობა:	დანია
ომენცარე სფერო:	მედიცინა პარაზიტოლოგია
სამუშაშ აბანი :	კოპენჰაგენიშ უნივერსიტეტი
ალმა-მატერი:	კოპენჰაგენიშ უნივერსიტეტი
ჯილდოეფი დო პრემიეფი:	ნობელიშ პრემია ფიზიოლოგიას დო მედიცინას (1926)

იოჰანეს ანდრეას გრიბ ფიბიგერი (დან. Johannes Andreas Grib Fibiger; დ. 23 პირელი, 1867, სილკებორგი, დანია — ღ. 30 ღურთუთა, 1928, კოპენჰაგენი, დანია) — დანიარი ექიმი, პათოლოგიური ანატომიაშ პროფესორი კოპენჰაგენიშ უნივერსიტეტის, ნობელიშ პრემიაშ ლაურეატი ფიზიოლოგიაშ დო მედიცინაშ დარგის, 1926 წანას.

ბიოგრაფია

იოჰანეს ფიბიგერი გურაფულენდჷ ზოოლოგიას დო ბოტანიკას კოპენჰაგენიშ უნივერსიტეტის. გურაფაშ თებაშ უკულ მუშენდჷ შხვადოშხვა ჰოსპიტალეფს. ართ პერიოდის მუშენდჷ ბერლინს ხოლო. 1891-1894 წანეფს ფიბიგერი მუშენდჷ კოპენჰაგენიშ უნივერსიტეტიშ ბაქტერიოლოგიაშ დეპარტამენტის, ასისტენტო. 1894 წანას ფიბიგერქ ქაკათჷ დანიაშ არმიაშ სამედიცინო კორპუსის, სოდეთ ქუდოსკიდჷ 1897 წანაშა. ჸათე ბორჯის გათუ ოდოქტორე დისერტაციაშ "დიფტერიაშ ბაქტერიოლოგიაშ რკვიება"-შ ჭარუა. 1895 წანას ფიბიგერქ მიპალუ მედიცინაშ დოქტორიშ ხარისხი კოპენჰაგენიშ უნივერსიტეტიშე. 1897 წანაშე მუშენდჷ კოპენჰაგენიშ უნივერსიტეტიშ პათოლოგიური ანატომიაშ ინსტიტუტის, სოდეთ გინირთჷ პროფესორო დო 1900 წანაშე რდჷ ინსტიტუტიშ დირექტორი. იოჰანეს ფიბიგერიშ მენცარული ინტერესეფიშ სფერო რდჷ დიფტერია, კიბო, ტუბერკულოზი დო შხვა პათოლოგიეფი. ფიბიგერქ ძირუ ნამდა არსებენს დიფტერიაშ ჟირი ბაცილა დო თინეფს უღჷნა შხვადოშხვა სიმპტომეფი. ტუბერკულოზიშ რკვიებაშ ბორჯის ფიბიგერქ კიბოთ დალახებურ ჭუკეფიშ კუჭის ძირუ ჭიეფი: ნემატოდეფი. ფიბიგერიშ აზრით შილებედჷ ნემატოდეფით კიბოშ გჷმოჭანაფა დო ანტკიცენდჷ ნამდა ნემატოდი Gongylonema neoplasticum (თაშნეშე შინელი რე Spiroptera carcinoma-შ ჯოხოთ) რდჷ კუჭიშ კიბოშ ბაძაძი. ფიბიგერქ მუშ ექსპერიმენტეფიშ მენცარული ნახანდი გჷმაბჟინუ 1913 წანას. ჸათე ექსპერიმენტიშ დო მენცარული რკვიებეფიშ გეშა ფიბიგერს 1926 წანას გინოჩეს ნობელიშ პრემია ფიზიოლოგიაშ დო მედიცინაშ დარგის. უკულიან მენცარულ რკვიებეფქ დანტკიცჷ ნამდა ნემატოდეფი კარცენოგენული ვარდჷ დო თინეფს ვეშულებუდჷ კიბოშ გჷმოჭანაფა. შვედეთიშ მენცარობაშ ომაფე აკადემიაშ პრეზიდენტიქ დო კაროლინსკაშ ინსტიტუტიშ (შვედეთიშ ომაფე ინსტიტუტი) ვირუსოლოგიქ ერლინგ ნორბიქ თქუ ნამდა ფიბიგერშა ნობელიშ პრემიაშ გინოჩამა რდჷ შვედეთიშ ომაფე ინსტიტუტიშ ართ-ართი უდიდაში ჩილათა.

პერსონალური რინა

იოჰანეს ფიბიგერიშ ოსური რდჷ მატილდა ფიბიგერი. ჸუნდეს ჟირი სკუა. იოჰანეს ფიბიგერქ ღურუ კიბოთ, 1928 წანაშ 30 ღურთუთას.

ლიტერატურა

• Nobel Lectures, Physiology or Medicine 1922–1941, Elsevier Publishing Company, Amsterdam, 1965.
• Stolley, P D; Lasky, T (1992). "Johannes Fibiger and his Nobel Prize for the hypothesis that a worm causes stomach cancer". Ann. Intern. Med. (published 1 May 1992). 116 (9): 765–9. doi:10.7326/0003-4819-116-9-765. PMID 1558350.

რესურსეფი ინტერნეტის

• Biography from WhoNamedIt
• Biography from YourDictionary Archived 2014-02-01 ვებ-ხასჷლას Wayback Machine.