კამილო ხოსე სელა

ვიკიპედიაშე
კამილო ხოსე სელა
დაბადებაშ თარიღი:

11 მესი, 1916

დაბადებაშ აბანი:

ირია-ფლავია, გალისია, ესპანეთი

ღურაშ თარიღი:

ღურთუთა 17, 2002 (85 წანერი)

ღურაშ აბანი:

მადრიდი, ესპანეთი

ერუანობა:

ესპანარი

საქვარუა:

ჭარუ, ნოველისტი, ესსეისტი, პოეტი

Magnum opus:

პასკუალ დუარტეშ ფანია (1942)
სკა (1950)

ჟანრი:

პოეზია, რომანი

ნინა:

ესპანური ნინა

ჯილდოეფი:

ნობელიშ პრემია ლიტერატურაშ დარგის (1989)
სერვანტესიშ პრემია (1995)

ხეშმოჭარუა

კამილო ხოსე სელა (ესპ. Camilo José Cela; დ. 11 მესი, 1916, ირია-ფლავია, გალისია, ესპანეთი — ღ. 17 ღურთუთა, 2002, მადრიდი, ესპანეთი) — ესპანარი ჭარუ, ნოველისტი, ესსეისტი დო პოეტი, ნობელიშ პრემიაშ ლაურეატი ლიტერატურაშ დარგის 1989 წანას. შინელი რე რომანეფით "პასკუალ დუარტეშ ფანია" დო "სკა".

ბიოგრაფია[რედაქტირაფა | წყუშ რედაქტირაფა]

კამილო ხოსე სელაქ დებადჷ 1916 წანას 11 მესის, გალისიაშ ნოღა ირია-ფლავიას. 1921-1925 წანეფს კამილო ხოსე სელაშ ფანია ვიგოს ცხოვრენდჷ. 1925 წანას ოცხოვრებშა მადრიდიშა გეგნორთეს. 1931 წანას კამილოქ ტუბერკულოზით ქიდელახჷ დო ნოღა გვადარამაშ სანატორიუმს კურნალენდჷ. ჸათე პერიოდის დეინტერესჷ ხოსე ორტეგა-ი-გასეტიშ დო ანტონიო დე სოლის-ი-რივადენეირაშ ნაჭარეფით. კამილო მონაწილენდჷ ესპანეთიშ ომენოღალე ლჷმას, სოდეთ დიჭკირჷ. ლიტერატურული კარიერა 1940-იან წანეფს დიჭყჷ. კამილოშ მაართა რომანქ "პასკუალ დუარტეშ ფანია" გიშართჷ 1942 წანას. ჸათე წინგიქ ავტორს დიდი პოპულარობა მოუღჷ. ფრანცისკო ფრანკოშ ესპანეთიშ თარობაშა მულაშ უკული, კამილო ცენზორო მუშენდჷ. 1951 წანას არგენტინას გიშართჷ კამილოშ არძაშე უმოსო პოპულარულ დო ჩინებულ რომანქ "სკა". სკა იკათუანს დოხოლაფირო 300 პერსონაჟის. რომანს იძირე ესპანური რეალიზმიშ დო თიხანური ინგლისარი და ფრანგი ავტორეფიშ გოლინა. წინგიშ ეროტიკული თემეფიშ გურშენ, რომანი ესპანეთიშ ცენზურაქ ვემიღჷ. კამილო რომანეფიშ გარდა რე ავტორი კუნტა თხობელუეფიშ კრებულეფიშ, პიესეფიშ, ლერსეფიშ, პოემეფიშ, შარალუაშ წინგეფიშ, ესსეეფიშ დო მემუარეფიშ.

1957 წანაშე კამილო რდჷ ესპანეთიშ ომაფე აკადემიაშ მაკათური, სოდეთ უკებუდჷ არდგილი Q. 1987 წანას კამილოქ მიპალუ ასტურიაშ პრინციშ ლიტერატურული პრემია. 1989 წანას გინოჩეს ნობელიშ პრემია ლიტერატურაშ დარგის. 1994 წანას კამილოქ მიპალუ პრემია - პლანეტა დო 1995 წანას სერვანტესიშ პრემია. 1996 წანაშ 17 მესის ესპანეთიშ მაფა ხუან კარლოს I-ქ კამილოს გინოჩჷ ირია-ფლავიაშ მარკიზიშ ტიტული. 1977–1979 წანეფს კამილო ხოსე სელა რდჷ ესპანეთიშ პარლამენტიშ სენატორი.

კამილო ხოსე სელაქ ღურუ 2002 წანაშ 17 ღურთუთას, 85 წანერქ, გურიშ ლახარათ.

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ: