კრისტოფერ რენი

კრისტოფერ რენი
	კრისტოფერ რენი
	ინგლ. Christopher Wren
დაბადებაშ თარიღი:	30 გჷმათუთა, 1632
დაბადებაშ აბანი:	უილტშირი, ინგლისი
ღურაშ თარიღი:	მელახი 8, 1723 (90 წანერი)
ღურაშ აბანი:	ლონდონი, ინგლისი
მენოღალობა:	ინგლისიშ ომაფე; დიდი ბრიტანეთიშ ომაფე
ომენცარე სფერო:	არქიტექტურა, ფიზიკა, მათემატიკა, ასტრონომია, ანატომია
სამუშაშ აბანი :	ოქსფორდიშ უნივერსიტეტი; ლონდონიშ ომაფე ჯარალუა
ალმა-მატერი:	ოქსფორდიშ უნივერსიტეტი
ომენცარე ხემანჯღვერი:	უილიამ ოტრედი
ჯილდოეფი დო პრემიეფი:	ომაფე ჯარალუაშ მაკათური; რაინდი-ბაკალარი

სერ კრისტოფერ რენი (ინგლ. Sir Christopher Wren; დ. 30 გჷმათუთა [ჯვ. სტ. 20 გჷმათუთა], 1632, უილტშირი, ინგლისი — ღ. 8 მელახი [ჯვ. სტ. 25 ფურთუთა], 1723, ლონდონი, ინგლისი) — ინგლისარი არქიტექტორი, თაშნეშე ფიზიკოსი, მათემატიკოსი, ასტრონომი დო ანატომი. რენიშ არქიტექტურული პროექტეფი ორხველუდჷ ინგლისური ბაროკოშ სტილს. დიდი დაჩხირიშ (ნამუქჷთ ლონდონს გორჩქინდჷ 1666 წანაშ 2-6 ეკენიას) უკულ, კრისტოფერ რენიქ დუდშე ეიოგჷ 52 ეკლესია. რენიშ არძაშე უმოსო რჩქინელ პროექტო მერჩქინელი რე წიმინდე პავლეშ კათედრალი, ნამუშ ეგაფაქ 1710 წანას ითუ დო ნამუთ იკოროცხუ რენიშ შედევრო.

კრისტოფერ რენი გურაფულენდჷ ფიზიკას დო ლათინურ ნინას ოქსფორდიშ უნივერსიტეტის. რენი რდჷ ლონდონიშ ომაფე ჯარალუაშ ართ-ართი დუმარსხუაფალი დო თიში პრეზიდენტი 1680–1682 წანეფს. თაშნეშე რენი რდჷ ინგლისიშ პარლამენტიშ მაკათური. რენიშ ომენცარე ნახანდეფს პოზიტიურო აფასანდეს გიშარჩქინელი მენცარეფი ისააკ ნიუტონი დო ბლეზ პასკალი.

რესურსეფი ინტერნეტის[რედაქტირაფა | წყუშ რედაქტირაფა]