ლიონელ მესი
 | ||
.jpg) | ||
| ედომუშამი ჯოხო | ლიონელ ანდრეს მესი კუჩიტინი | |
| დაბ. თარიღი | 24 მანგი, 1987 | |
| დაბ. აბანი | როსარიო, სანტა-ფე,,  არგენტინა | |
| სიმაღალა | 170[1] სმ. | |
| შხვა ჯოხო | წყირი (ესპ. La Pulga)[2], | |
| პოზიცია | გემანთხაფალი | |
| კლუბი |  ინტერ მაიამი | |
| ნომერი | 10 | |
ლიონელ ანდრეს მესი კუჩიტინი[კომ. 1] (ესპ. Lionel Andrés Messi Cuccittini, ესპანური წჷმოთქუალა: [ljoˈnel anˈdɾez ˈmesi] (
მორჩქილა); დ. 24 მანგი, 1987, როსარიო, არგენტინა) – არგენტინალ მობურთე, ოკუჩხბურთე კლუბი MLS „ინტერ მაიამი“ გემანთხაფალ დო კაპიტანი, არგენტინაშ ერუანულ ოკუჩხბურთე ნაკორობაშ კაპიტანი. მოსოფელიშ ჩემპიონი, ამერიკაშ თასიშ ჟირზა მაპალუ, ოლიმპიურ ჩემპიონი. მოსოფელიშ არძა ბორჯიშ ართ-ართ საუჯგუშო მობურთეთ იკოროცხუ[7][8][9].
ესპანეთიშ ჩემპიონატიშ, „ბარსელონაშ“, „ინტერ მაიამიშ“ დო არგენტინაშ ოკუჩხბურთე ნაკორობაშ ისტორიას საუჯგუშო ბომბარდირი. „ორქოშ ბურთიშ“ ბრუორზა მაპალუ [კომ. 2] დო ამშვრზა — „ორქოშ ბუცეფიშ“. აკადემია „ბარსელონაშ“ გუმნარდი, სოდე თე კლუბწკჷმა ართო გიმორძგჷ ვით ესპანეთიშ ჩემპიონატი, ოთხ უეფაშ ჩემპიონეფიშ ლიგა, შკვით ესპანეთიშ თასი, ბრუო ესპანეთიშ სუპერთასი, სუმ უეფაშ სუპერთასი დო თაშნეშე სუმ მოსოფელიშ საკლუბო ჩემპიონატი. საფრანგეთიშ ჩემპიონატიშ ჟირზა გომორძგვილ დო „პარი სენ-ჟერმენიშ“ აკოდგინალუას საფრანგეთიშ სუპერთასიშ მაპალუ.
13 წანაშ ხანს, მასქერეფწკჷმა ართო გეგნორთჷ ესპანეთშა, „ბარსელონაშ“ ახალნორდულ ბუნაშ ოკათაფუშა, 2004 წანაშ გჷმათუთას, კლუბიშ თარ აკოდგინალუას დებიუტ უღუდჷ. „ბარსელონას“ მუშ ჸოფაშ პირველ წანეფს თიქ შილებუ სასტარტო აკოდგინალუაშ უთირუ მოლაჸაფეთ გინორთა, 2008/2009 ოკუჩხბურთე სეზონს მესიქ მუშ ბუნაწკჷმა ართო მიგჷ მუშ პირველ „ტრებლი“ დო „ორქოშ ბურთი“. გეჸვენჯი სუმ წანას „ორქოშ ბურთიშ“ მაპალუ რდჷ დო პირველ მობურთეთ გჷნირთუ, ნამუქჷთ თე ჯილდო გობუნაფილო ოთხშა მიპალჷნ[10]. „ბარსელონაშ“ 2011/2012 წანაშ სეზონს, მესიქ რეკორდ გაჭყჷ თი გოლეფიშ მუდანობათ, ნამუეფჷთ ესპანეთიშ ჩემპიონატიშ ართ სეზონს მითიღჷნ, თაშნეშე ედომუშამი ევროპას[11]. 2014/2015 წანეფიშ ოკუჩხბურთე სეზონს, ესპანეთიშ ჩემპიონატიშ ისტორიას გჷნირთუ საუჯგუშო ბომბარდირო დო მუშ ბუნაწკჷმა ართო მაჟირაშა მიპალჷ „ტრებლი“. 2018 წანას, „ბარსელონაშ“ კაპიტანო გჷირთუ, 2019 წანას, მაამშვაშა მიპალჷ „ორქოშ ბურთი“, ნამუშით ართ მობურთეშით ჯილდოშ მუდანობაშ ღვენაშ რეკორდ მონწყჷ. 2021 წანას, კატალანურ კლუბიშ ფინანსურ დგომარობაშ გეშა არგენტინალიშ „ბარსელონაწკჷმა“ კონტრაქტიქ გეთჷ. თეშ გეშა მესიქ გჷნირთუ დუდიშულ აგენტო დო უფასოთ გეგნორთჷ ფრანგულ ოკუჩხბურთე კლუბი „პარი სენ-ჟერმენშა“. 2022 წანას, გერმანალ მობურთე ლოთარ მატეუსიშ მოსოფელიშ ჩემპიონატეფს მატჩეფიშ მუდანობაშ რეკორდ მონწყჷ[12].
ლიონელ მესი მოსოფელიშ ართ-ართი არძაშე ჩინებული სპორტსმენო იკოროცხუ, 2006 წანაშე, სპორტული მუკაქუნალეფიშ გიშმაშქუმალარი კომპანია Adidas-იშ ართ-ართი უთარაში სარეკლამო პიჯი რე. 2008 წანაშე რე ართ-ართი არძაშე მაღალგინოგაფური მობურთე. 2019 წანას, Forbes-იქ არგენტინალი აღიარჷ მოსოფელიშ არძაშე მაღალგინიგაფური სპორტსმენო. ჟირნალქ Time 2011, 2012 დო 2023 წანეფიშ მოსოფელიშ 100 არძაშე გაულამი კათაშ ერკებულს ქუკათჷ. 2020 დო 2023 წანეფს, მესი აღიარაფილი რდჷ Laureus World Sports Awards-იშ ვერიათ წანაშ საუჯგუშო სპორტსმენი, თიქ პირველ მობურთეთ გჷნირთუ, ნამუქჷთ თე ჯილდო მიპალჷნ. თიმ წანას Forbes-იქ მესი მიშინჷ ისტორიას მაჟირა მობურთეთ, ნამუქჷთ კარიერას ართი მილიარდშე უმოსი იშჷნ[13].
ორდოიანი რინა
[რედაქტირაფა | წყუშ რედაქტირაფა]ლიონელ მესიქ დებადჷ 1987 წანაშ 24 მანგის, არგენტინაშ ნოღა როსარიოს. მუმა — ხორხე ორასიო მესი, ფაბრიკაშ მუშა რდჷ ლითონგინმამუშე ქარხანას, ნანა — სელია ამრია კუჩიტინი, ნორთობურო დაკებული დუმანწყუალი. ლიონელ მესის ჸუნს ჟირი უნჩაში ჯიმა: როდრიგო დო მატიასი, თაშნეშე და — მარია სოლი[14]. თიში ჟირი ბიძისკუა — ემანუელი დო მაქსიმილიანო ბიანკუჩეფი — თაშნეშე მობურთეეფი რენა[15]. მუამუშიშ ფანია მოურს იტალიაშ ნოღა რეკანატიშე, სოიშე თიში წიმოხონი, ანჯელო მესიქ, არგენტინაშა ემიგრაციაშა მიდართჷ 1883 წანას[16]. შხვა თიში წიმოხონი რდჷ კატალონიაშე; კერზოთ, თიში პაპუ რამონ ლობერა პერესი (დ. 1895 წანას ელ-პოალს). რამონიშ ჯიმა, გონსალ ლობერა პერესი (დ. 1904 წანას ელ-პოალს), რე მაჟირა მობურთე ბოიან კრკიჩიშ შამა[17]. ლიონელ მესის სკოლას ოშქაშე ფასება უღუდჷ, არძაშე უმოსო უჸორდჷ ფიზკულტურა დო მუსიკა. პროფესიონალი მობურთეთ გჷნირთუნ, სკოლას უჸიდჷ ხაბაკი, კომპიუტერეფი დო კჷრბეფი. სკოლას, სოდე გურაფულენდჷ მესჷნ, თიშ ჯოხოდვალაშ მუზეუმი რე გოჭყაფილი[18].
რესურსეფი ინტერნეტის
[რედაქტირაფა | წყუშ რედაქტირაფა]- ოფიციალური ვებ საიტი
- ბიოგრაფიული ფაქტეფი Archived 2012-05-12 ვებ-ხასჷლას Wayback Machine.
კომენტარეფი
[რედაქტირაფა | წყუშ რედაქტირაფა]- ↑ ესპანეთიშ ჩემპიონატიშ ოფიციალურ ვებ-ხასჷლას წჷმორინელ ინფორმაციაშ მეჯინათ, მობურთეშ გვარ რე ხვალე ზიტყვა „მესი“[4], მუჟანსჷთ შხვა წყუეფს, თინეფს შქას ფიფასჷთ, არგენტინალ მოშინელ რე ჟირ გვარით — „მესი კუჩიტინი“[5][6].
- ↑ ოთხშა — „ფიფაშ ორქოშ ბურთიშ“ დო ოთხშა — France Football-იშ „ორქოშ ბურთიშ“.
სქოლიო
[რედაქტირაფა | წყუშ რედაქტირაფა]- ↑ Lionel Messi. კითხირიშ თარიღი: 2021-08-16.
- ↑ Cummings, Michael (2012-12-10). 10 Best Nicknames in World Football. კითხირიშ თარიღი: 2021-01-23.
- ↑ Messi, La Pulga atómica que se convirtió en el mejor del mundo (2016-01-28). კითხირიშ თარიღი: 2021-01-23.
- ↑ Lionel Andrés Messi. კითხირიშ თარიღი: 2020-12-28.
- ↑ 2014 FIFA World Cup Brazil: List of Players (2014-06-10). კითხირიშ თარიღი: 2021-01-23.
- ↑ Marsden, Sam (2017-11-02). Lionel Messi donates €70k to charity after libel case win against newspaper. კითხირიშ თარიღი: 2020-12-29.
- ↑ Terry: Messi's the greatest (2012-04-06).
- ↑ დავიდ ვილია: „მესი — მოსოფელიშ საუჯგუშო მობურთე“ (2014-12-24).
- ↑ სერგეი ვეშჩენკო (2015-05-07). არიგო საკი: მესი — თეხანურ კუჩხბურთიშ აკა გენია.
- ↑ Messi makes it four FIFA Ballon d'Or wins in a row (2013-01-07). კითხირიშ თარიღი: 2020-12-30.
- ↑ Hollis, Cheyenne (2012-05-25). Lionel Messi: Ranking His Seasons so Far for Barcelona. კითხირიშ თარიღი: 2021-01-23.
- ↑ Месси побил рекорд Маттеуса по числу матчей на чемпионатах мира (2022-12-18). კითხირიშ თარიღი: 2022-12-18.
- ↑ Settimi, Christina (2020-09-14). World's Highest-Paid Soccer Players: Messi Wins, Mbappe Rises. კითხირიშ თარიღი: 2020-12-30.
- ↑ Arora, Mudeet (2018-01-04). Rodrigo and Maria Sol Messi Share Cute Retro Photos of Their Brother Lionel as a Baby. კითხირიშ თარიღი: 2021-01-16.
- ↑ Caioli 2012, ხსფ. 9–10.
- ↑ Las raíces italianas de Leo Messi (2005-10-07).
- ↑ მესი დო კრკიჩი ართიანიშ ბოგი ჸოფენა (2011-10-18).
- ↑ დელგადო 2016.
 |
თე სტატია პიჯიშ გეშა დიოდღარო მერკე რე. თქვა შეგილებუნა ქუმმეხვარათ დო აკაფშათ თინა. |