ლუციუს სერგიუს კატილინა
| ლუციუს სერგიუს კატილინა | |
| ლათ. Lucius Sergius Catilina | |
 | |
| მოღალობა |
პოლიტიკოსი, ოურდუმე მოღალე |
|---|---|
|
ბიოგრაფიული ჩინებეფი
| |
| დაბადებაშ თარიღი |
დოხ. ჯვ. წ. 108 |
| ღურაშ თარიღი | |
| ღურაშ აბანი | |
| მენოღალობა | |
| მუმა |
ლუციუს სერგიუს სილუსი |
| ნანა |
ბელიენა |
| ალმასქუ |
1. გრატიდია |
ლუციუს სერგიუს კატილინა (ლათ. Lucius Sergius Catilina; დ. დოხოლაფირო ჯვ. წ. 108 — ღ. ღურთუთა, ჯვ. წ. 62) — რომალი პოლიტიკოსი დო ოურდუმე მოღალე. დებადჷ პატრიციეფიშ ფანიას. რდჷ სულაშ ალმარენჯი დო თიში მართუალაშ ბორჯის დინდარი ადამიერო გინირთჷ. ჯვ. წ. 60-იან წანეფს მოღალენდჷ პრეტორო დო აფრიკაშ პროვინციაშ მამართალო. რომიშა დორთაშ უკულ, აქტიურო ქაკათჷ პოლიტიკას დო კონსულობა ულამუდჷ, მარა გიშაგორუეფს დემარცხჷ. უკმაყოფილე კატილინაქ ქელირინუ მოხუჯეეფი: ღარიბი პლებეეფი, სულაშ ვეტერანეფი დო უკმაყოფილე სენატორეფი. კატილინაშ ღანკი რდჷ ოურდუმე არყებაშ მონწყუალა, კონსულეფიშ: ციცერონიშ დო გაიუს ანტონიუს ჰიბრიდაშ გინორაგვაფა დო ხეშულობაშ ხეშა ეშაჸოთამა.
ციცერონქ, აგენტეფიშე დო ინფორმატორეფიშე ქიგეგჷ კატილინაშ კონსპირაციაშ გეშა. ჯვ. წ. 63 წანაშ 21 გჷმათუთას, რომიშ სენატის, ციცერონქ ოფიციალურო ბრალი ქჷმწჷრინუ კატილინას დო გითოჩამა ქეკადვუ. 8 გერგობათუთას, კატილინაქ რომშე ინტუ დო მუში მოხუჯეეფიშ აკოშაყარუა ქიდიჭყჷ. ციცერონიშ ზოჯალათ ოჭოფეს კატილინაშ კონსპირაციაშ მაკათურეფი დო სასამართალოშ გინოჭყვიდირიშ უმუშო ღურათ დასაჯეს. უკულ, სენატიქ ქიდიჭყჷ ჯარეფიშ მობილიზაცია კატილინაშ მეხჷ. ჯვ. წ. 62 წანაშ ღურთუთას, პისტორიაშ ლჷმას რომიშ აკოანჯარაფილი ნძალეფქ გაიუს ანტონიუს ჰიბრიდაშ მანჯღვერალათ დამარცხეს კატილინა, ნამუქჷთ ბურჯაფიშ მიმალობას დოღურჷ.