მუჸია

მუჸია თაშნეშე მუჸი, დურღენი, ძჷგირიში მუჸი, ომბოლი ძჷგირი, ომბოლი მუჸი (ლათ. Rubus fruticosus) — ჩანარი ვარდიშობურეფიშ ფანიაშე. მუჸია უმენტაშო კარკატია ბართვი რე. ჩანარს ძიგირეფით ვარდა ქეჩერეფით ფორილი გჷნძე ღერეფი უღუ. მაართა წანაშ ეშნაფალაშე — ტურიონეფშე — ხვალე ფურცელეფი რე, მაჟირა წანაშ გუნაფალაშე — პიოლეფი დო გუმნაღელი რე. მუჸიაშ პიოლეფი ხვალეხე რე, უმოს ოშა-გოშათ ბიბლეფო აკოშაყარელი. გუმნაღელი აკოშაყარელი რე დო აკმოდირთუ ჭითა ვარდა მოჭითე-მოუჩე ჭირხილი წვენამი წკალამიეფშე.

მუჸიაშ 200-შახ გვარობა გოფაჩილი რე ევრაზიას დო ოორუე ამერიკას. საქორთუოს 37 გვარობა ჩანს, თინეფშე 27 საქორთუოშ ენდემი რე. მუჸიაშ ღერი დო ფურცელეფი შანულამი მუდანობათ იკათუანს ორჩქალაფე ნიფთიარობეფს, გუმნაღელი — 4-8% შანქარს, 0,6—1,4% ბჟეეფს, C ვიტამინს დო კაროტინს. მუჸიას გჷმირინუანა ლადირო, აკეთენე მურაბას, ჯემს დო შხვა ნაწარმის. ჩინებული რე კულტურული მუჸიაშ დოხოლაფირო 300-შახ ჯიში.

ლიტერატურა

• ხინთიბიძე ლ., ქორთული სხუნუეფიშ ენციკლოპედია, ტ. 6, ხს. 507, ქართი, 1983 წანა.