ნარმადა (წყარმალუ)

ვიკიპედიაშე
ნარმადა
ჰინ. नर्मदा
წყარმალუ ნარმადა ნოღა ომქარეშვარწკჷმა
წყარმალუ ნარმადა ნოღა ომქარეშვარწკჷმა
დოხასიათაფა
სიგჷრძა 1310 კმ
ღანჩო არაბეთიშ ზუღა
ინაკათუ არაბეთიშ ზუღა
ქიანეფი ინდოეთიშ შილა ინდოეთი
ნარმადა ვიკიოწკარუეს

ნარმადა, ვარდა ნარბადა (ჰინ. नर्मदा) — ინდოეთიშ ართ-ართი წიმინდე წყარმალუ[1][2]. მეხჷრჩანს ცენტრალურ ინდოეთის დო ინმაკათუ არაბეთიშ ზუღას. წყარმალუ ნარმადაშ ედომუშამი სიგჷრძა აკმადგინანს 1310 კმ-ს.

ნარმადაშ ოდუდე იდვალუაფუ ინდოეთიშ შტატი მადჰია-პრადეშიშ ოორუეშე, ნოღა ამარკანტაკის გოხოლუას. წყარმალუს მაართა 320 კმ-შ გოძვენას, მანდლაშ პლატოშ ქჷნდჷრეფს გჷშმახჷრჩანს, აკმოქიმინუნს გვალა სატპურაშ კართეფს. ნოღა ჯაბალპურწკჷმა წყარმალუ სქვამი მარმარილოშ კჷრდეეფს გჷშმახჷრჩანს, უკული რზენით გჷშმურს ვინდჰიაშ დო სატპურაშ გვალეფშე ობჟათე-ბჟადალი გეჸვენჯობათ მეხჷრჩანს. ნარმადაშ დელტა, ნამუთ არაბეთიშ ზუღაშ წყარპიჯშახ 20 კმ-შ გოძვენას იჭყაფუ, იდვალუაფუ ნოღა სურატიშ ოორუეშე, კამბეიშ ჸუჯის (შტატი ნარმადა).

ნარმადაშ ღანჩო სატპურაშ ოგვალე სისტემაშ ოორუე კართეფს იკენს, მარა ნამუშ აკოდგინალუაშათ ვენშმურს ვინდჰიაშ პლატო, ნამუშეთ წყარმალუეფი განგშა დო ჯამუნაშა დჷნმახჷრჩანს. ნარმადაშ უგჷრძაში ნოჸელა რე ტავა. წყარმალუს ხვალე აკანური ელმოლიშ ოწყარალო ვარინ, ონიშეთ ხოლო გჷმირინუანა. ჭვემეფიშ სეზონს, წყარმალუშ კანკალე ნორთეფს დიდი ნოშეფით ხოლო შილებე გჷლანჩურუა.

ნარმადა იხილუაფუ მუჭოთ არძოშე წიმინდე წყარმალუ ინდოეთის განგიშ უკული. თეშ გეშა წყარმალუშ ედომუშამი მალონას იდვალუაფუ მიარემუდანობაშ გჷთახვამალი აკანეფი, სამანგათ ნოღა მაჰაშვარი მადჰია-პრადეშიშ შტატის.

ნარმადაშ ლეხერიშ ცენტრის, ნოღა ჰოშანგაბადიშ ოორუე-ბჟადალშე 40 კმ-ს, იდვალუაფუ ნარმადაშ მიოგორუე (შტატი მადჰია-პრადეში)[3], სოდეთ მეგორელქ იყუ ჰომო ერექტუსიშ დუდიშ ხოკო (Narmada Skull Cap)[4], ნამუთ თაშნეშე გუ Homo helmei-ის[5].

რესურსეფი ინტერნეტის[რედაქტირაფა | წყუშ რედაქტირაფა]

სქოლიო[რედაქტირაფა | წყუშ რედაქტირაფა]