ორინჯეფიშ ფერმა

ვიკიპედია-შე
ნავიგაციაზე გადასვლა ძიებაზე გადასვლა
ორინჯეფიშ ფერმა
Animal Farm
Animal Farm - 1st edition.jpg
მაართა გჷშაშქუმალაშ გალენკაბრა
ავტორი

ჯორჯ ორუელი

ქიანა

აკოკათელი ომაფე

ნინა

ინგლისური

ჟანრი

სატირა

გჷშაშქუმალაშ თარიღი

17 მარაშნათუთა 1945 წ.

მათანგალი

გივი გ. ქარჩავა

ქორთულო/მარგალურო გჷშეშქვინჷ

2021 წ. (მარგალური გიშაშქუმალა)

მედია

ლიბუ დო მანგარი კაბრეფი

ხასჷლა

112 ხასჷლა (მაართა ბრიტანული გიშაშქუმალა)

oclc

53163540

გეჸვენჯი

1984

ISBN

ISBN 0-452-28424-4 (თეჟამო) ISBN 978-0-452-28424-1

ორინჯეფიშ ფერმა“ (ინგლ. Animal Farm) — ჯორჯ ორუელიშ სატირული ალეგორია სხუნუეფიშ ტოტალიტარიზმიშ გეშა. გიშაშქუმალირქ იჸუ 1945 წანას. წინგიშ თარი მონახვამილეფი გერსხილი რე სტალინიშ ეპოქაშ ამბეეფშა[1]. ორუელი, მით დუდო მუ რდუ დემოკრატიული სოციალისტი[2] დო ზოხომარენჯი ლეიბორისტული პარტიაშ მაკათურინ, აკრიტიკენდჷ სტალინს დო თიშ რეჟიმს. თინა უნდებუო მეურედჷ სტალინიზმის, მუშენ-და მუს მიკნაულა აფუდჷ ომენოღალე ლიმა ესპანეთის.

სიუჟეტი[რედაქტირაფა | წყუშ რედაქტირაფა]

ორუელიშ ნახანდის ჩიება მეურს ორინჯეფშენ, ნამნეფქით ებუნტეს დო ფერმაშე გეგნორაჸეს ადამიერეფი. თინეფქ გინოჭყვიდეს, მუნეფიშ უნჩალაშაშ სისტემა გაჭყანი დო მუნეფქ იდუდუანი ფერმასინ, მარა თეწკჷმა ართო, მუთუნით ვა აგურან ოკო ადამიერეფს. ართოიანი გინოჭყვადირუათ, მოვარაფილი რდჷ ბარგიშ მიკოქუნა, ადამიერცალო ნორჩალიშ მითონჯირა, ფარაშ გიმორინაფა დო შხვა თიცალი მუთუნი, მუშ ქიმინუასით ხვალე ადამიერი მეთხოზუნ. თეშ უმკუჯინუო, ჭე ხანიშ მიკულაშ უკული, ფერმა მუში წიმოძინაწკუმა ართო, „დუთმანთხუუდჷ ადამიერიშ დონეშა“ დო ეკონიას თიში აკა მადუდე — ღეჯი, მისით "ნაპოლეონი" ჯოხოდუნი, მითინს ვა გიშაგორედჷ ნანდული ადამიერეფიშე.

მაართა მარგალური გჷშაშქუმალაშ გალენკაბრა. ISBN 978-9941 829260

ფერმაშ ზუკოლეფი[რედაქტირაფა | წყუშ რედაქტირაფა]

რევოლუციაშ უკული ღეჯეფქ კიდალას ჯგირო იძირედუკონ თეშ ქიმკაჭარეს შქვითი ზუკოლი, ნამნეფშათ ფერმაშ არძა მახორუს ოკო მოუთხილუაფუდუკონ. მუჟამცით ღეჯეფქ ქიდიჭყეს თე წესეფიშ ხუალან, პარალელურო ზუკოლეფსით დეფორმაციაქ ქუმაჸუნჷ. თეშ უმკუჯინუო, ღეჯეფი იშენი ოჯერუანდეს დოსქილადირ ორინჯეფს, ნამდა ზუკოლეფიშ დინახალე მუთუნი ვა თირელე დო თინეფი ითამუ ირო ასე რენ თეშ ჸოფედუკონ.

  • მუდგა ვა რენო ჟირ კუჩხის გერენ, ირფელ ნტერიე.
  • მუდგა ვა რენო ოთხი კუჩხის გერენ, ვარა ფსუა ჩანსინ, მაჸალე რე.
  • ნამთინ სქილედიქ ოკო ვემკიქუნას ბარგი.
  • ნამთინ სქილედიქ ოკო ვემთინჯირას ნორჩალს. (უკული ქიგიაძინჷ: ზენწარით გონწყილ ნორჩალს).
  • ნამთინ სქილედიქ ოკო ვა შვას ალკოჰოლი. (უკული ქიგიაძინჷ: დონთხაფაშა).
  • ნამთინ სქილედიქ ოკო ვა ჸვილას შხვა სქილედი. (უკული ქიგიაძინჷ: უსამანჯელეთ).
  • არძო სქილედი ართმანგი რე. (უკული ქიგიაძინჷ: მარა ნამთინე სქილედი შხვეფშე უმოსი ართმანგი რე).


პერსონაჟეფი[რედაქტირაფა | წყუშ რედაქტირაფა]

ღეჯეფი[რედაქტირაფა | წყუშ რედაქტირაფა]

  • გილარჩინელი მეიჯერი — რჩინუ ღეჯი, ნამუქით ორინჯეფს დუდშულობაშა მოუძახჷ დო მიქით გოურჩქინჷ ორინჯეფს არყებაშ ზალამინ. თინა წჷმმარინუანს კარლ მარქსიშ, მით კომუნიზმიშ ართ-ართი დუმარსხუაფალი რდჷნ, დო ვლადიმერ ლენინიშ ალეგორიულ კომბინაციას. თიშ დუდიშ ხოკო, გიმოფინილი არძა ორინჯიშ ოძირაფალო, მოშინანა ლენინს, მიდგაშ რსხული მავზოლეუმს რე მილადვალირინ.
  • ნაპოლეონი – დიდი, კონწარი მეჯინაშ ღეჯი. თინა რეპუტაციას მოხვარაშ უმუშო შიბულენს. თინა ალეგორია რე სხუნუეფიშ დიქტატორიშ, იოსებ სტალინიშ. ფრანგულ ვერსიას თის კეისარი ჯოხო, მარა თანგუაშ შვანს თინაქ დითირუ ნაპოლეონით.
  • სნოუბოლი – ნაპოლეონიშ მონირზე დო „ორინჯეფიშ ფერმაშ“ მაართა მოდუდე. თიშ პერსონაჟი ლევ ტროცკიშ პროტოტიპი რე, დო ხოლო გვერდო ლენინსით ქომოგენს.
  • სქუილერი – ჭიჭე, შხუ ღეჯი, ნაპოლეონიშ ართგური მოინალე. თიში ჩინიშ მეჯინათ მაკითხე ხათე ქიჩინენს ვიაჩესლავ მოლოტოვს.
  • მინიმუსი – ღეჯი პოეტი, მით ავტორი რე „ორინჯეფიშ ფერმაშ“ რესპუბლიკაშ მაჟირა დო მასუმა ჰიმნეფიშინ. თიშ უკული, მუთ მაართა ჰიმნი "ინგლისიშ სქილედეფი" (ნამუთ გილარჩინელი მეიჯერქ გაჩინებაფუ დო უჸოროფუ ორინჯეფსინ) მივარუესინ.
  • ჭიჭე თულეფი – განჩი რე ძირაფილი, ნამდა თინეფი ნაპოლეონიშ სქუალეფი რენან დო თეწკუმა ართო, ორინჯეფიშ უართმანგობაშ მოჭიშე მაართა მოითირი რე.
  • ახალნორდი თულეფი – ნაპოლეონიშ ფერმას ღურამესარჯებული მაართა ორინჯეფი, მინეფქით გეგმაარგამეს მუნეფიშ გითოჩამან. გერსხილი რე გრიგორი ზინოვიევიშ, ლევ კამენევიშ, ნიკოლოზ ბუხარინიშ დო ალექსეი რიკოვიშ დიდ რეპრესიეფშა.
  • ფინქი – ნახანდის ნაშინა რე ხვალა ართიშახ. თის ოწისაფუანს ნაპოლეონი მუშ ოჭკომალს, დუდშე გეიჩილითუას წამალუათ ჸვილუან თიშო.

ფერმაშ ობირეში[რედაქტირაფა | წყუშ რედაქტირაფა]

მეიჯერიშ ობირეში, ნამუთ თიქ ფერმაშ ორინჯეფს დაგურუნ: (ობირეშიშ ტექსტი ინგლისურშე მარგალურო გინიჸონჷ წინგიშ მათანგალქ, გივი გ. ქარჩავაქ).


ინგლისიშ სქილედეფი

ინგლისიშ სქილედეფი დო ირლანდიაშ სქილედეფი,
თელ ქიანაშ, არძო კუნთხუშ გურშე გიშნაზგილეტეფი,
ქუმურჩქილეთ ჩქიმ ნაბირას, ეგოფშანა ხიოლით,
სარკო დღალეფი მობძუნა დო ჰამას გილეხიორით.

კოჩიშ მუნოჩიკოტის გეგნიპჸოთანთ პუხუშე,
დუც გეგთვოჭოფუანთ ჩქი ჭკორალაშ უღუშე;
ბრელი ვა მეძუ ი დღაშა, არძო ართო ვურთ თიშა,
დო ინგლისიშ რძღელ ჸვანეფს ხვალე გილეპკურტიშათ.

დო ჩხვინდიშე გეგთიფსოფუნთ მაშქვიდაფალ კაღუეფს,
თქვან თოლით ქოძირუნთ ონანგერიშ ტახუეფს,
ღანჯამ ლაგამ-მუხამუზიშ ქიმეჭყორდუ ზინდაფა,
ჩქინ პუხუშე გეგნოლუ მართახეფიშ ზღვინდაფა.

იპუაფუთ ღმალიერეფი, ეიფშაფუ შური დო გური,
ჩქინ იჸუაფჷ ირფელ ართო, ჩქინი რინაშ ოფუჩური.
ქერი დო კაკალი ქობალიშ, ნაცალა დო მერყეთ რჩვია
ტოფური დო ჭაკუნტელი, ლებია დო სოტოლია.

დო ბჟალარა მუნულუანს ინგლისიშ დიხეფს რძღელს,
თიშ ღალეფი დიწკონდუ დო გეგშუბონუნს ძვალს დო ძელს;
მასქურ ჰამას ქიდირქენს დო შურს ეშე მიდეღანს
ჩქი უღუშე გითიბლენთინ, ეთი სქვამ დო ჰამო დღას.

დო ეთიმ დღაქ გოთანდასინ, ბჟაქ მუნაფა გოფაჩასინ,
გვალო დობღურათინ ხოლო, ღურუშ კიბირქ შურს ქაჩასინ,
ღორღონჯიქ დო კოკუჩეფქით, ცხენ დო ჩხოუქ, არძოქ ართო,
ქიმიპონათ ოკო აფუნი, სინთებუან დო დღაფართო.

ინგლისიშ სქილედეფი დო ირლანდიაშ სქილედეფი,
თელ ქიანაშ, არძო კუნთხუშ გურშე გიშნაზგილეტეფი,
ქუმურჩქილეთ ჩქიმ ნაბირას, ეგოფშანა ხიოლით,
სარკო დღალეფი მობძუნა დო ჰამას გილეხიორით.

ალეგორიეფი[რედაქტირაფა | წყუშ რედაქტირაფა]

ორინჯეფიშ ფერმაშ შილა. გადაჯვარო ჩორქო დო ქა ალეგორიულო სხუნუეფიშ სიმბოლოეფიშა — მაგანა დო უროშა რე მერსხილი
ვიკიციტატა
„არძო სქილედი ართმანგი რე, მარა ნამთინე სქილედი შხვეფშე უმოსი ართმანგი რე“
(ციტატა ნახანდიშე)

ნახანდიშ თარი პერსონაჟეფი ორინჯეფი რენა. ორინჯეფი დო მონახვამილეფი ეჭარილი რე სხუნუეფიშ რსხუს მიმალი ამბეეფიშა მეგურაფილო. მაგალითო, ღეჯი ნაპოლეონი გიშაჸონაფილი რე მუჭოთ სტალინი, მუდგაშენით ორუელი კონდაკო მითმიოწურუანს 1945 წანაშ 17 მარტიშ ჭარილს გიშმაშქუმალარწკუმა.

ნაპოლეონი ორინჯეფიშ ფერმაშ ლიდერი რე არყებაშ უკული. თიში პერსონაჟი გერსხილი რე იოსებ სტალინიშა. თის ჸუნს ონოფულე პოლიცია, ჯოღორეფი, ნამნეფით თის თხილანან. ნაპოლეონი დიქტატორო გინმირთუ დო ორინჯეფიშ კათუაშ დუდშეიანი კონცეფციას თირანს. ცხენეფი ნახანდის სიმბოლურო სუმ სოციალურ კლასიშა მითმიოწურუანა. ქოთომეფი, ნამნეფით გური მულირეფი რენა თიშენ, ნამდა არძა მარქვალქ ოკო გიმიჩინასინ, ალეგორიულო კულაკეფშა დო ყაზახეფშა მითმიოწურუანა, ნამნეფისთ სხუნუეფიშ რსხუს მუნეფიშ დორხველი ირფელი გეგლანწყესინ. უგურაფუ დო დაჩიჩიებული გიმენი ფინაშ სახეთ ნოხანდის გიშაჸონაფილი რენა შხურეფი. კატუეფი კრიმინალური ოქიანუშ დო რუსული მაფიაშ წჷმმარინაფალეფი რენა.

ორინჯეფიშ მოხ ნახანდის შხვა სიმბოლოეფი ხოლო რე, ნამნეფით ალეგორიულო სხუნუეფიშ რსხუშა რე მერსხილინ. მაგალითო თენერი რე ორინჯეფიშ შილა, ნამუსუთ გადაჯვარო გიმოხანტილი რე ქა და ჩორქო — სხუნუეფიშ სიმბოლოეფიშ, მაგანა დო უროშ მანგურო.

ინტერესუანი ფაქტეფი[რედაქტირაფა | წყუშ რედაქტირაფა]

„ორინჯეფიშ ფერმაქ“ გოლინა იღვენუ როკ-ბუნა პინკ ფლოიდიშ ალბომშა Animals. ღეჯეფი, ჯოღორეფი დო შხურეფი, ნამნეფიშ გეშა ბირეფი თე ალბომს თარი რენ, რენა „ორინჯეფიშ ფერმაშ“ თარი პერსონაჟეფი.

რესურსეფი ინტერნეტის[რედაქტირაფა | წყუშ რედაქტირაფა]

სქოლიო[რედაქტირაფა | წყუშ რედაქტირაფა]

  1. GCSE English Literature – Animal Farm – historical context (pt 1/3). BBC. დოარქივაფილი რე ორიგინალშე 3 იანარი 2012-ს.
  2. ორუელი, ჯორჯ „მუშენი ბჭარუნქ“ (1936) (The Collected Essays, Journalism and Letters of George Orwell Volume 1 – An Age Like This 1945–1950 ხს. 23 (Penguin))