პარაშუტ-ჯამფი
პარაშუტ-ჯამპი (ინგლ. Parachute Jump), თეჟამშო უფუნქციო ართუაფალი ატრაქციონი კონი-აილენდის, ბრუკლინი, ნიუ-იორკი, ნამუშ ჯოხოგოლაფირი ნჯაფილ კონსტრუქციაშ ლითონიშ სტრუქტურა ამდღანერშახ ბრუკლინიშ სიმბოლოთ სქიდუ. 262 ფუტიშ სიმაღალაშ დო 170 ტონაშ კონსტრუქციას ფშხირას ბრუკლინიშ ეიფელიშ ჸორშის უძახჷნა.
კონსტრუქცია ეიოგეს 1939 წანას ფლაშინგ მიდოუს პარკიშ (კუინზი) ნიუ-იორქიშ მოსოფელიშ გჷმოფინუაშო დო 1941 წანას თიშ თეჟამიშ აბანს გიმიღეს. თინა სტიპლჩეიზ პარკიშ კაკალია ნორთი რე, ნამუთ ამდღანერშახ სქიდუ. ატრაქციონქ მუშობა 1968 წანას მეჭყვიდჷ.
კონსტრუქციაშ დუდის მიკომანგარაფილი რდჷ ფუნქციური პარაშუტეფი, ნამუეფით ლითონიშ რგოლეფით ეშკუმალა-დოშკუმალაწკჷმა ნჯაფილო სქიდუდჷ. ედომუშამო ჸორშიშ დუდის გემანგარაფილი რდჷ 12 ლითონიშ ხუჯი დო ირი კაბელით პარაშუტის იმარგინუანდჷ. მეშარეეფს ორტყაფუეფით ამანგარენდეს ჟირაბანამ გიოხუნალს ფორილი პარაშუტიშ თუდო, გეჸვენჯო ჟიდო ეჭოფუნდეს, სოდგათ გოტებაშ მექანიზმი თინეფს გიმარაგუანდჷ, დო ლაფაშ პროცესის პარაშუტი არჩქალენდჸ. ირ პარაშუტის 3 კაბელიშ ოპერატორი ოხვილჸდჷ, მუთ თიშ ოპერირაფას დასაბაღო აძვირენდჷ.