პლატონ ფანცულაია

პლატონ ფანცულაია (დ. 1898 – ღ. 1938) — დებადჷ 1898 წანას ოჩამჩირეშ რაიონიშ ოფუტე გუფის. 8 წანერი თინა მასქერეფქ სანაკიშ ოშურიელე ოგურაფუშა გემშეჸუნეს. თაქ თინაქ ქორთული გალობაშ მარდი ქიწისუ. ოგურაფუშ თებაშ უკული პლატონქ ქუთეშიშ გიმნაზიას ქენირიცხჷ, ნამუთ 1916 წანას გათუ დო სოხუმც ჩინებული ლოტბარი ძუკუ ლოლუას ქიმიოდირთ. ძუკუქ თინა ართ-ჰალამო მუში ბუნაშა გეჭოფჷ. 1925 წანას პლატონი მუში ოდაბადური ოჩამჩირეს უკვე მობირეეფიშ ბუნას ორსხუანს. ათე ბუნაქ მოსკოვც 1929 წანას მუსხირენი აფხაზური ბირა ხვალე გოსოფური მობირე დო ლოტბარი ვარინ, თაშნეშე _ ჯგირი მასხაპალით ორდ. ბიწკეფც გერინა ქორთული სხაპუას ართ-ართმა მაართაქ თიქ მიშეღჷ. 1934 წანას, ამიერკავკაციაშ თიიეფიშ პირველ ოლიმპიადას პლატონ ფანცულაიაშ ბუნაქ მაართა რანწკიშ სიგელი ეჭოფჷ. ოდო 1936 წანას ბუნას დიდო წჷმოძინელი გუშულა უღუდ ქართის, ოპერაშ დო ბალეტიშ თეატრის. რსულაშო უნელო მეჭყორდჷ პლატონ ფანცულაიაშ ქიმერონული რინაქ. ჩინებული პოლიტიკური ტერორიშ ბორჯის, 1938 წანას თინა უნელო დოღინჩეს დო გორხვეს. პლატონ ფანცულაიაქ დიდი ხანდა გედჷ მუჭოთ აფხაზური, თეში _ მარგალური ფოლკლორიშ პოპულარიზაციას. თის ჸოფიერი ქიმერონული მაჸალობა უღუდჷ აფხაზ ასტამურ მარღანიაწკჷმა, მარგალი ლოტბარეფწკჷმა: კიწი გეგეჭკორწკჷმა, ძუკუ ლოლუაწკჷმა; შური ქინუდგჷ ბრელი დოჭყოლადირი ბირას, თინეფ შქას _ `ოდოიაშ ძალამი ინტერესუანი ვარიანტის; დიდი თია მიშეღჷ ბჟადალუ ქორთული თიიშური სხაპუეფიშ დამუშება-გოვითარაფას. მუში აიარი დორხველური ანდეფქ თის დიდი პოპულარობა მოუღუ მუში მახანეფ შქას.