პოპოქიშობურეფი

პოპოქიშობურეფი (Fabaceae ანუ Leguminosae) — ჩანარი ჟირლებერამეფიშ ფანაიშე. პოპოქიშობურეფს გიშმერთუ 3 გიმენფანია: მიმოზაშობურეფი (Mimosoideae), ცეზალპინიშობურეფი (Caesalpinoideae) დო ფარვანაშობურეფი (Faboideae ანუ Papilionoideae) (კანკალე სისტემატიკოსი თე გიმენფანიეფს ზოხო ფანიეფო მირჩქინანს). ბართვეფი, მიარეწანიანი დო ართწანიანი ოდიარეეფი რე. ოშა-გოშათ ჯალეფი ვარდა ლიანეფი რე. პოპოქიშობურეფი აკმაშქვანს 500-შახ გვარიშ 12000 გვარობას. პოპოქიშობურეფს ჯინჯეფს ევითარბჷნა ხოშქოშქეფი — ატმოსფერული აზოტიშ მემაღებელი ხოშქოშქიშ ბაქტერიეფიშ გუმეფი, ნამუეფით დიხას ადიდარენა აზოტით.

პოპოქიშობურეფიშ კანკალე გვარი დო ზოხოიანი წჷმმარინაფალეფი (ლებია, მუხუდო, დიხაშ თხირი, ხაჯი, ბარდონი დო შხვა) ცილეფით დიდარი მარძღაფალი ოჭკომალი რე. დიხაშ თხირიშ დო მუხუდოშ თასიშე მეღებულ ზეთის ფართეთ გჷმირინუანა ოჭკომალიშ რეწუალას (ოკონდიტერე წარმება, კულინარია) დო ტექნიკური ღანკეფშო. ორინჯიშ ოჩამური ჩანარეფს შქას გიშაკერძაფილი აბანი უკებჷ ანჯას, სუმჸუჯას, ესპარცეტის, ხანჭკის, ძიძოს დო შხვა ჩანარეფს.

კანკალე პოპოქიშბურეფიშ (ჭითა სანდალოზიშ — Pterocarpus santalinus) მარქვას ანდაღებული ხაბაკიშ ოკეთებელო გჷმირინუანა. პოპოქიშობურეფიშ ქერქა იკათუანს მათალე დო ოღაფალი ნიფთიარობეფს; მიარე გვარობა (არღავანი, მალურია, ჸურზენიშ ვარდი, სოფორა, ყურდგელბუცხა დო შხვა) დეკორატიული რე. თაშნეშე გჷმირინუანა თელი ღობერეფო დო ბორიაოთხილე ღოზეფო. პოპოქიშობურეფიშ უმენტაშობა ჯგირი მეთოფურე ჩანარი რე.

ლიტერატურა

• ხინთიბიძე ლ., ქორთული სხუნუეფიშ ენციკლოპედია, ტ. 7, ხს. 691-692, ქართი, 1984 წანა.