პრესტიჟი (ფილმი)
| პრესტიჟი | |
| რეჟისორი: | |
|---|---|
| პროდიუსერი: |
კრისტოფერ ნოლანი |
| სცენარიშ ავტორი: |
კრისტოფერ ნოლანი, ჯონათან ნოლანი, კრისტოფერ პრისტი (რომანი) |
| თარ როლეფს: |
ჰიუ ჯეკმენი |
| კომპოზიტორი: | |
| მონტაჟი: | |
| კინოსტუდია: | |
| გჷშულაშ თარიღი: |
20 გჷმათუთა, 2006 |
| ხანგჷნძარალა: |
130 წნ |
| ქიანა | |
| ნინა: | |
| მუშნალი: |
$ 109,676,311 მლნ |
| ვებხასჷლა: | |
პრესტიჟი — რეჟისორ კრისტოფერ ნოლანიშ 2006 წანაშ ხანტურული ფილმი, გინოღალირი კრისტოფერ პრისტიშ რომანიშ მეჯინათ.
სიუჟეტი
[რედაქტირაფა | წყუშ რედაქტირაფა]ორიგინალური რომანიშე გინორთით, სიუჟეტი მოჭირნაფილი რე ფრაგმენტულო, თ.ჩ. ’ფლეშბეკეფიშ’ მოხვარათ.
ჟირი ბრიტანალი ილუზიონისტი, რობერტ ენჯეირი (ჰიუ ჯეკმენი) დო ალფრედ ბორდენი (კრისტიან ბეილი) მაჸალენდეს თეიშა, სოიშა ბორდენიშ აშაჩილათაშ გეშა ენჯეირიშ ოსური ვაღურუ. ეთი ბორჯიშე მოუნაფიჸლი ჟირხოლოქ ართიანიშ ხორციშ მაჭკომალო დო კონკურენტო გინირთჷ. თინეფი ართიანს შხვადოშხვა დივერსიას უნწყჷნა, გიოძიცანა დო ჸოროფილეფსჷთ მეკურთხუანა.
ჟირხოლო ილუზიონისტიშ ოჸოროფე ფოკუსი რე ’ადამიერიშ გინოდგჷმა’ - წჷმმარინაფალი მიშურს ართ კარშა, მაჟიაშე, გვალო შხვა აკანს, თი მერქას გიმურს. ბორდენს უღუ თიში ოფულარი, მარა პოპულარობაშო არტისტიზმი ვაუბაღჷ. ენჯეირი გიმირინუანს გრიმამი ნაჟირუას დო წჷმოძინას მიოჭირინუანს. თიმწკჷმა ბორდენი ეშანწყჷნს თიში ონაფულეს. ენჯეირი გინოჭყვადჷნს ბორდენიშ ოფულარიშ მეკურთხუას.
ენჯეირიშ ჯვეში ალმარენჯიშ დო ათე ბორჯის ბორდენიშ ჸოროფილი ოლივია (სკარლეტ იოჰანსონი) ჯვეშ უნჩაშის (ნამუქჷთ თიში ჸოროფა ივარუ) ბორდენიშე ხირილ დღერს გინოჩანს. გასქვალი ზიტყვა ათე დღერს ეშაჩინებელო რე ’ტესლა’. ენჯეირი მეხვადჷ, ნამდა ბორდენი ტელეპორტაციაშო ხვარენს ნიკოლა ტესლაშ ღოლამირ ჩინებულ მანქანას. თინა ააშ-ს მეურს დო ტესლას (დევიდ ბოუი) ათეჯგჷრა მანქანაშ ღოლამას დავალენს. მარა თიში უკული, მუთ მანქანა გათენს, ენჯეირი ახვილუანს, ნამდა დღარი ტყურაია რდჷ - ხვალე თიში ონჯარებელო. ათეშ უმკუჯინუო, კონსტრუქცია ნანდული ტელეპორტაციაშ საშუალებას ირზენს.
ენჯეირი ტრიუმფალურო ირთუ ბრიტანეთშა. მანქანაშ მოხვარათ ნაძირეფუ ოძირეს ანშლაგეფი რდჷ. მარა ართ-ართი ათეჯგჷრა ოჯინეშ უკულ ენჯეირი ინწყუ დო იშქვიდუ შუშაშ კოლბას, თეში მუჭოთ თიში ალმასქუ. კონკურენტიშ ღურა ბორდენშა ეკუძჷნა (ითამი თიქი ტელეპორტაციას ეცილჷ წყარამი კოლბაშ დოდგჷმათ). თის ოღურუ განარჩქინს გიშუღანა.
ათე განარჩქიიშ არსულებაშ ოწოხოლე თიშა მეურს ’გათელებური’ ენჯეირი, ნამუთ ოპირუდჷ, ნამდა თიში სქუას მიკაჯინედჷ. თისი შხვა მითინ ვეჩინენს დო ბორდენს ეშაფოტიშ დუდს ოშქვიდუანა. ენჯეირი გინოჭყვადუნს მანქანაშ მერეხუას, მარა გენკოლუ ბორდენი. ათაქ ირკვიებჷ სიმართალე: ბორდენი ირო ჟირი რდჷ - თისი ჸუნდჷ ნანდული ნაჟირალი ჯიმა. ტესლას მანქანა სინანდულას ტელეპორტაციას ვართუდჷ - თინა ორთუდჷ ადამიერიშ ნაჟირუს. გვალო ათე ნაჟირალი გიმურს დო ხეს ეუკუნან მაჯინეეფს, ანუ თინა პრესტიჟიშ როლს გიშურს, ორიგინალი წყარს ინანთხუ. არძა გიშულაშ ბოლოს ენჯეირი მუშ დუდიშ კლონირებას ორთჷ, მუ ღურუ. ფილმიშ ბოლოს ოძირანა დიდი დარბაზის მიარე შუშაშ კოლბათ დო თინეფს ნწყვილი ენჯეირეფით.
როლეფს
[რედაქტირაფა | წყუშ რედაქტირაფა]- ჰიუ ჯეკმენი — რობერტ ენჯეირი
- კრისტიან ბეილი — ალფრედ ბორდენი
- სკარლეტ იოჰანსონი — ოლივია უენსკომი
- რებეკა ჰოლი — სარა ბორდენი
- დევიდ ბოუი — ნიკოლა ტესლა
- მაიკლ კეინი — ჯონ კატერი
- პაიპერ პერაბო — ჯულია მაკ-კალოუ/ენჯირი
- ენდი სერკისი — მისტერ ელი, ტესლას თანაშემწე
ფაქტეფი
[რედაქტირაფა | წყუშ რედაქტირაფა]- ნოლანქ ათე ფილმიშ გინოღალა დიო ხოლო „ბეტმენი: დაჭყაფური“-შ დოგაფაშა დიჭყჷ.
- დუდშე ართ-ართი როლიშ მარსულებერო ირაგადჷ ჯუდ ლოუქ.
- ენდი სერკისი რდჷ ეკონია, ნამუქჷთ გიშაგორუა მიკორთჷ დო ქაკათჷ არტისტეფიშ დასის.
- გინოღალეფქ დიჭყჷ კალიფორნიას (ააშ), 2006 წანაშ ღურთუთას დო გეთუ თი წანაშ პირელს.
- ზიტყვა „პრესტიჟი“ ფილმიშ ორეკლამე რგოლს ნაშინუ რე, მუჭოთ ეფექტი, ნამუთ „მაგიურ ჟიმოქიმინუას ორთუ აუდიტორიას, ნამუთ, მუშ ჸურე, ვეიანწყინე თიში ოფულუ“. ორიგინალურ რომანს ათე ზიტყვას ხოლო შხვა, მისტიური ხასიათით უღუ.
- ფილმიშ „ამერიკული სისქვამე“ რეჟისორი სემ მენდეზის ულამუდჷ „პრესტიჟიშ“ ეკრანიზაცია, მარა თიშ ავტორი კრისტოფერ პრისტის მიოჩქუდჷ, ნამდა ათენა ნოლანს ოკო უღოლამუდკო თიშენ, ნამდა გურეფშა რდჷ თიში შხვა ფილმეფით.
- ილუზიონისტ მილტონიშ როლი არსულჷ ნანდულ ილუზიონისტიქ, რიჩი ჯეიქ. ირფელიშ მეტი, თინა ბეილს დო ჯეკმენს ნანდულ ფოკუსეფს ოგურუანდჷ.
- ტყვაშ ჭოფუაშ სცენას მარსულებერეფიშ შქას ნაშინუ „ჰარი დრეზდენი“. სინანდულას თენა რე გჷმოგონილი ჯადოქარი, ჯიმი ბატჩერიშ წინგეფიშ სერიაშ „დრეზდენიშ ინნაჭარეფი“ გერგეზი.
- ილუზიონისტი ჩან ლინ სუ ვარე გჷმოგონილი. თინა რეალური კოჩი რდჷ დო დოღურჷ სცენას, მუჟამსჷთ ოცადუდჷ ტყვიაშ ჭოფუას.
- კრისტოფერ ნოლანქ სცენარი მუშ ჯიმა, ჯონათანწკჷმა ართო ჭარჷ. წინგიშ სიუჟეტი უდუღორებუო იჸუ თირელქ - აშაღალირი რე ართჟამიშ სიუჟეტური ღოზი, ენჯეირი დო ბორდენი მაჸალუას დიო ხოლო კონკურენციაშა იჭყანა. წინგის თარი გერგეზეფი ართიანს ვეჩინენა, სოიშა ვეკართესჷნ.
- ორიგინალურ რომანქ მაართათ გიმიბჟინჷ ბრიტანეთის, 1995 წანას.