ჟოზე სარამაგუ

ჟოზე სარამაგუ
	ჟოზე სარამაგუ
	; ჟოზე სარამაგუ 2008 წანას
დაბადებაშ თარიღი:	16 გერგობათუთა, 1922
დაბადებაშ აბანი:	აზინიაგა, სანტარენი, პორტუგალია
ღურაშ თარიღი:	მანგი 18, 2010 (87 წანერი)
ღურაშ აბანი:	ტიასი, კანარიშ კოკეფი, ესპანეთი
ერუანობა:	პორტუგალიარი
საქვარუა:	ჭარუ, ნოველისტი, პოეტი, ესსეისტი
პერიოდი :	1947–2010
Magnum opus:	გოშინეფი მონასტერიშ გეშა (1982); რიკარდო რეისიშ ღურაშ წანა (1984); იესო ქირსეშ ოხარებუ (1991); სიჸვერე (1995); არძო ჯოხოეფი (1997); ნაჟირალი (2002); ღურა ინტერვალეფით (2005)
ჟანრი:	რომანი დო მაგიური რეალიზმი
ნინა:	პორტუგალიური ნინა
ჯილდოეფი:	კამოენსაშ პრემია (1995); ნობელიშ პრემია ლიტერატურაშ დარგის (1998)

ჟოზე დე სოუზა სარამაგუ (პორტ. José de Sousa Saramago; დ. 16 გერგობათუთა, 1922, აზინიაგა, სანტარენი, პორტუგალია — ღ. 18 მანგი, 2010, ტიასი, კანარიშ კოკეფი, ესპანეთი) — პორტუგალიარი ჭარუ, ნოველისტი, პოეტი დო ესსეისტი, ნობელიშ პრემიას ლაურეატი ლიტერატურაშ დარგის 1998 წანას. შინელი რე რომანეფით: "გოშინეფი მონასტერიშ გეშა", "რიკარდო რეისიშ ღურაშ წანა", "იესო ქირსეშ ოხარებუ", "სიჸვერე", "არძო ჯოხოეფი", "ნაჟირალი" დო "ღურა ინტერვალეფით".

ჟოზე სარამაგუშ ნაჭარეფი თანგილი რე მოსოფელიშ 25 ნინაშა. ხვალე პორტუგალიას გიმიჩინჷ სარამაგუშ წინგეფიშ 2 მილიონ ეგზემპლარქ. სარამაგუ რდჷ ლიბერტარიანული კომუნიზმიშ პროპონენტი დო ხშირას აკრიტიკენდჷ რომიშ კათოლიკური ეკლესიას, ევროპაშ რსხუს დო საირქიანო სავალუტო ფონდის. 1992 წანას რელიგიური თემეფიშ გეშა, პორტუგალიაშ თარობაქ პრემიერ-მინისტრიშ ანიბალ კავაკუ სილვაშ ხემანჯღვერობათ, არისტეიონიშ პრემიაშა ნომინირაფილი წინგეფიშ ერკებულიშე გეშეღჷ სარამაგუშ რომანი "იესო ქირსეშ ოხარებუ". ჸათე პოლიტიკური ცენზურაშ გურშენ, სარამაგუქ პორტუგალია ქიდიტუ დო ოცხოვრებშა ესპანეთიშა გეგნორთჷ. ესპანეთის, სარამაგუ ლანსაროტეშ კოკის ცხოვრენდჷ მუში ალმასქუ პილარ დელ რიოწკჷმა ართო. ჟოზე სარამაგუქ ღურუ 2010 წანაშ 18 მანგის, 87 წანერქ.

სარამაგუ რდჷ კულტურაშ თხილუაშ ერუანული ფრონტიშ დუმარსხუაფალი-მაკათური დო თურქი ნოველისტი ორჰან ფამუქიწკჷმა ართო რდჷ ევროპაშ ავტორეფიშ პარლამენტიშ დუმარსხუაფალი.