რონალდ რეიგანი
რონალდ უილსონ რეიგანი (ინგლ. Ronald Wilson Reagan; დ. 6 ფურთუთა, 1911 – ღ. 5 მანგი, 2004) — ააშ-შ მა-40 პრეზიდენტი (1981–1989) დო კალიფორნიაშ 33-ა გუბერნატორი (1967–1975).
რონალდ რეიგანი 30-ამი წანეფშე ლოს-ანჯელესის ოხორანდჷ, სოდეთ თიქ არტისტო გინირთჷ. რდჷ კინოარტისტეფიშ გილდიაშ პრეზიდენტი, უკული ფირმა "ჯენერალ ელექტრიკიშ" სპიკერი. პოლიტიკას თე ბორჯიშე ქაკათჷ. დუდშე რეიგანი დემოკრატიული პარტიაშ მაკათური რდჷ, 1962 წანაშე თიქ რესპუბლიკარო გინირთჷ. თეშ უკული თინა ჟირი ვადათ კალიფორნიაშ გუბერნატორი რდჷ. მუს ჟირშა, 1968 დო 1976 წანეფს უღუდჷ ოპრეზიდენტე ეშაგორუეფს რესპუბლიკარეფიშ ნომინაციაშ მოპალაფაშ უწჷმუძინუ ცადუა. 1980 წანაშ ეშაგორუეფს მუქ ნომინაცია მიპალუ დო უკული ჯიმი კარტერიშ დომარცხაფათ, 69 წანაშ ასაკის, ააშ-შ პრეზიდენტო გინირთჷ. მუ ამერიკაშ ისტორიას არძაშე ხანიერი კოჩი რდჷ, ნამუქჷთ პრეზიდენტიშ პოსტი დეკინჷ.
პრეზიდენტიშ რანგის რეიგანქ ახალი პოლიტიკური დო ეკონომიკური ინიციატივეფი წჷმარინუ. მუში ეკონომიკური პოლიტიკა, ნამუსჷთ რეიგანომიკას უძახჷდეს, ითოლწონენდჷ ბიზნესიშ რეგულაციაშ მორკებას, ინფლაციაშ კონტროლს, სათარობო ხარჯეფიშ მორკებას დო გინაგაფუეფიშ მორკებათ ეკონომიკაშ რდუალაშ სტიმულირაფას. მაართა ვადაშ ბორჯის რეიგანს ქიგიანთხეს ოჸვილარო, მუქ დიჭკირჷ, მარა ოღურალეთ ვარ. 1983 წანას მუქ გრენადაშა მიშაჭკირუა ზოჯჷ. მუქ სხუნუეფიშ რესპუბლიკას მაართათ გიოდუ „უბადობაშ იმპერია“.
1984 წანას ეშაგორუეფს მუქ დიდი უპირატესობთ გიმორძგუ. მუში მაჟირა ვადაქ უმოსო გალეიანი მოლინეფით ეიღანკჷ: ჩხურუ ლჷმაშ თებაშა გინოდგჷმილი დიდი ბიჯგი, ლიბიაშ ბომბუა დო ირან-კონტრაშ სკანდალიშ გოხონარაფა. რეიგანიშ პოლიტიკაშ უკული ნავთობიშ ფასიქ გენასუმორჷ, მუქჷთ სხუნუეფიშ ეკონომიკას დიდო ქიგიაშქუ.[1][2] მუქ სხუნუეფიშ ლიდერ მიხეილ გორბაჩოვწკჷმა მორაგადაფეფიშ სერია მანწყუ, ნამუშ კულმინაციატ ოშქარი დო კუნტა სიშორაშ რაკეტეფიშ ლიკვიდაციაშ აპიჯაფა დო ჟირხოლო ქიანაშ ბირთვული არსენალიშ მორკება რდჷ.
რეიგანქ პრეზიდენტიშ პოსტი 1989 წანას დიტუ. 1994 წანას მუს ალცეიმერიშ ლახარაშ დიაგნოზი ქუდუხუნეს. მუქ 2004 წანას, 93 წანაშ ხანს დოღურჷ. რეიგანი ააშ-შ ართ-ართ არძაშე წჷმოძინელ პრეზიდენტო მირჩქინუაფუ.
ინტერესუანი ამბეეფი
[რედაქტირაფა | წყუშ რედაქტირაფა]2011 წანაშ 23 გერგობათუთას საქორთუოს, ქართის, რიყეშ პარკის რონალდ რეიგანიშ ნოჭახნაკუქ გინწყჷ.[3][4]
ქოძირით თაშნეშე
[რედაქტირაფა | წყუშ რედაქტირაფა]სქოლიო
[რედაქტირაფა | წყუშ რედაქტირაფა]- ↑ Gaidar, Yegor (2007). Collapse of an Empire: Lessons for Modern Russia (Russian). Brookings Institution Press, 190–205 ხს.. ISBN 5824307598.
- ↑ Gaidar, Yegor. Public Expectations and Trust towards the Government: Post-Revolution Stabilization and its Discontents. კითხირიშ თარიღი: March 15, 2008.
- ↑ საქორთუოშ პრეზიდენტიქ რიყეშ პარკის რონალდ რეიგანიშ ნოჭახნაკუქ გონწყჷ // Information Agency 'PirWeli' Archived 2022-12-02 ვებ-ხასჷლას Wayback Machine.
- ↑ დევიდ დრეიერი: "რეიგანშე მუთუნი ვეჸიდჷ თიშე ამატოტებელი, ვინდარო თინა, ნამდა სტალინიშ ოდაბადურ ქიანას მუში ნოჭახნაკუქ ქჷდიდგჷ" // Information Agency 'PirWeli' Archived 2022-12-02 ვებ-ხასჷლას Wayback Machine.
რესურსები ინტერნეტში
[რედაქტირაფა | წყუშ რედაქტირაფა]- რონალდ რეიგანი (1981–1989) WhiteHouse.gov
- რონალდ რეიგანიშ ოპრეზიდენტე ბიბლიოთეკა
- რონალდ რეიგანიშ შანულამი გჷშულეფი Archived 2014-04-10 ვებ-ხასჷლას Wayback Machine.
- რონალდ რეიგანი Archived 2020-02-19 ვებ-ხასჷლას Wayback Machine. ევრიკაშ კოლეჯი
|
ათე სტატია მერკე რე. თქვა შეგილებუნა ქიმეხვარათ ვიკიპედიას დო გაგშათინათ დო გახვეიანათინ. |
