სოლტონიშ ზუღა
სოლტონიშ ზუღა (ინგლ. Salton Sea) — ენდორიკულ-რიფტული წყითე ტობა ააშს, ობჟათე კალიფორნიას, კალიფორნიაშ რივერსაიდიშ დო იმპირიალიშ ოლქეფიშ ტერიტორიას, კოლორადოშ ტიოზის. მილიონობათ წანაშ წოხოლე, ჸეთი ტერიტორიას სოდეთ ასე ტობა იდვალუაფუნჷ, წყარმალუ კოლორადო გიშმეშჷ. წყარმალუქ შხვადოშხვა ბორჯის კალაპოტი დითირუ დო აკოქიმინჷ ტობა ნამუქჷთ უკულ გესქირუ. თეხანური სოლტონიშ ზუღაქ იფორმირჷ 1905 წანას. 1900-იან წანეფს ამერიკალი ინჟინერეფქ დიჭყეს საირიგაციო პროექტეფი დო კოლორადოშ წყარმალუშე საირიგაციო არხეფი გონთხორეს. წყარალაშ ბორჯის კოლორადოშ წყარმალუშ არხეფიშე წყარქ გეგნორთჷ დო ქინიხვილჷ ორდოიანი ტობაშ ესქირაფილ აუზის. ჸათაშ იფორმირჷ თეხანური სოლტონიშ ზუღაქ. უკულიან წანეფს სოლტონიშ ზუღა ესქირაფაშ რისკიშ თუდო ბრელშა გერდჷ, მარა ფერმერეფი, წყარს ნამუთ ირიგაციაშო ვასაჭირუდეს, ტობაშა უტენდეს. ჸათაშ გინასქიდჷ ტობაქ ესქირაფას. 1950-იან დო 1960-იან წანეფს ტობაშ ტერიტორიაქ პოპულარულ ტურისტულ მარშრუტო გინირთჷ დო ტურისტულ ინფრასტრუქტურაქ ხოლო გევითარჷ. 1970-იან წანეფშე ტობაშ წყარიშ დონე ირკენს. 1990-იან წანეფშე ფერმერეფქ ირიგაციაშ წყარეფიშ უმოსი ეფექტური გიმორინაფა ქიდიჭყეს დო ჸათეშ გეშათ ტობაშა ჭიჭე მუდანობაშ წყარი მიშმურს. 2000-იან წანეფს ტობაშ გინასქილიდაფარო დირსხუ სოლტონიშ ზუღაშ მენეჯმენტიშ პროექტიქ.
სოლტონიშ ზუღაშ ფართობი დოხოლაფირო 889 კვ.კმ. რე. ტობა იდვალუაფჷ ზუღაშ დონეშე 72 მეტრაშ თუდო. ტობაშ მაქსიმალური სიტომბა 13 მ. რე. ტობაშ მიშმურს ჭიჭე წყარმალუეფი: ალამო, ნიუ-რივერი დო უიათვოთერი. სოლტონიშ ზუღაშ წყარპიჯიშ გოხოლუას იდვალუაფჷ ურბანული ცენტრეფი: ბომბეი-ბიჩი, ნორტ-შორი, სოლტონ-სითი დო სოლტონ-სი-ბიჩი.
რესურსეფი ინტერნეტის[რედაქტირაფა | წყუშ რედაქტირაფა]
Salton Sea, ტურისტული მანჯღვერე Wikivoyage-ს- ოფიციალური ვებ-ხასჷლა, California Natural Resources Agency
- Salton Sea Management Efforts, California Department of Fish and Wildlife
- Salton Sea Unit: California Department of Water Resources, supports the Salton Sea Management Program (SSMP)
- Salton Sea Community Outreach, Education & Engagement Program, partnership between Comite Civico del Valle, Inc. (CCV) & the California Department of Water Resources (DWR)
- Salton Sea, U.S. Bureau of Reclamation
- Salton Sea Photo Gallery, U.S. Bureau of Reclamation
