ტანგანიიკა

ტანგანიიკა
ინგლ. Lake Tanganyika; ფრანგ. Lac Tanganyika; სუაჰ. ziwa Tanganyika
	; ტანგანიიკა კოსმოსშე
დოხასიათაფა
სიგჷრძა	650 კმ
ღანჩოშ ფართობი	224 000 კმ²
ინაკათუ	მალაგარასი; რუზიზი
ქიანეფი	კონგოშ დემოკრატიული რესპუბლიკა; ტანზანია; ზამბია; ბურუნდი

ტანგანიიკა (ინგლ. Lake Tanganyika, ფრანგ. Lac Tanganyika, სუაჰ. ziwa Tanganyika) — ტობა ბჟაეიოლ აფრიკას, კონგოშ დემოკრატიული რესპუბლიკაშ, ტანზანიაშ, ზამბიაშ დო ბურუნდიშ ტერიტორიეფს. სიგჷრძა დოხოლაფირო 650 კმ, სიგანა 40-80 კმ, ჟინპიჯიშ ფართობი — 34 ვითოში კმ². იდვალუაფუ ზუღაშ დონეშე 773 მეტრაშ სიმაღალას, ტექტონიკურ ფაქვილშე. მაქსიმალური სიტომბა — 1470 მ (ბაიკალიშ უკული მაჟრა რე მოსოფელს). წყარპიჯეფი უთარაშო თინღოზამი რე, აბან-აბან მაღალი დო გერთელი. ღანჩოშ ფართობი — 224 ვითოში კმ². ინაკათუ წყარმალუეფს მალაგარასი დო რუზიზი; წყარმალუ ლუკუგაშ საშუალებათ ტანგანიიკა მითმიარსხუ წყარმალუ ლუალაბას.

ტანგანიიკა წანმოწანას ოშქაშეთ 64,8 კმ³ წყარს ღებულენს. წყარიშ დონე მაღალი რე პირელს დო მესის, დაბალი — გჷმათუთას დო გერგობათუთას. კანკალეშა უჩქუ სეიშეფი. წყარი ლიგე რე. თიში ტემპერატურა ჟინპიჯის 23,6-23,8 °C-შე 26,5 °C-შახ რე. 400 მეტრაშ გიმე ტობაშ ქვინჯეშახ ტემპერატურა იროიანი რე, დოხოლაფირო 23 °C. იროიანი ტემპერატურული სტრატიფიკაციაშ გეშა ოთელარეთ მორგე რე ხვალე წყარიშ ჟილენი, 100-200 მ სისქაშ ფა. ფაუნაშ დოხოლაფირო 75 % ენდემური რე. ტობას ინოხე ბეჰემოთი, ნიანგი, მიარეთ რე წყარიშ მაფურინჯე. გოვითარაფილი რე მეჩხომალა დო ნიშობა. ნიშორინეფი რე: კიგომა (ტანზანია), ბუჟუმბურა (ბურუნდი), კალიმა (ზაირი). ტობას მიოგორეს 1858 წანას ინგლისარ მეშარეეფქ რ. ბერტონქ დო ჯონ სპიკიქ.