ფილიპ IV (საფრანგეთი)
| ფილიპ IV სკვამი ფრანგ. Philippe IV le Bel | ||
 | ||
 საფრანგეთიშ მაფა | ||
|---|---|---|
| პოსტის გერინაშ ბორჯი | ||
| 5 გჷმათუთა, 1285 – 29 გერგობათუთა, 1314 | ||
| წიმოხონი | ფილიპ III | |
| მონძე | ლუი X | |
| პოსტის გერინაშ ბორჯი | ||
| 16 მარაშინათუთა, 1284 – 4 პირელი, 1305 | ||
| წიმოხონი | ჟანა I | |
| მონძე | ლუი I | |
| დუნაბადი | პირელი – მანგი, 1268 ფონტენბლო, საფრანგეთი | |
| ნაღურა | 29 გერგობათუთა, 1314 (46 წანერი) ფონტენბლო, საფრანგეთი | |
| ნთხორუ აბანი | სენ-დენიშ ბაზილიკა | |
| მუმა | ფილიპ III | |
| ნანა | იზაბელა არაგონალი | |
| ალმასქუ | ჟანა I | |
| სქუალეფი | მარგარეტი, ლუი X, ბლანში, ფილიპ V, შარლ IV, იზაბელა, რობერტი | |
ფილიპ IV სკვამი (ფრანგ. Philippe IV le Bel; დ. პირელი – მანგი, 1268 — ღ. 29 გერგობათუთა, 1314) — საფრანგეთიშ მაფა 1285-1314 წანეფს, ჟანა ნავარალიშ ოსურო მოჸონაფაშ უკულ ნავარაშ მაფა. თაშნეშე რდჷ შამპანიშ გრაფი. ფილიპე IV შინელი რე მეტჯოხოთ სკვამი (le Bel), მარა ავტოკრატიული დო კონწარი ხასიათიშ გეშა "რკინაშ მაფა"-ს (le Roi de fer) ხოლო უძახჷდეს.
ფილიპ IV ოცადუდჷ დიდებუანეფიშ, ოშურიელე პიჯეფიშ დო ვასალეფიშ გოლინაშ დოდაღარაფას. ფილიპიქ დოკონჩჷ თინეფიშ ფეოდალური პრივილეგიეფი დო შანულამო განძალიერჷ ოჯარალე მოხელეეფიშ, გიშაკერზაფილო გიიომ დე ნოგარეშ დო ანგერან დე მარინიშ როლი. გალენური პოლიტიკას, ფილიპი ოცადუდჷ მოჯგირეეფიშ, მუში დინასტიაშ წჷმმარინაფალეფიშ მოჸონაფას შხვადოშხვა სახენწჷფოეფიშ (მაგალთო საღორონთო რომიშ იმპერიაშ) ხეშუულებაშა. ფილიპიშ მართუალაშ ბორჯის, საფრანგეთი ოლიმუდჷ ინგლისის ედუარდ I-შ დიხეფიშ გურშენ. საფრანგეთი, თაშნეშე ლჷმეფს აწარმენდჷ ფლანდრიაშ მეხჷ. ინგლის-საფრანგეთიშ ლჷმაქ გეთუ 1303 წანას, პარიზიშ ოთინჩალე ხეკულუათ, ნამუშ ნძალათ გასკონიქ ინგლისის გეგნაჩჷ (ნამუქჷთ უკულ გინირთჷ ოშწანიანი ლჷმაშ ართ-ართი ბაძაძო). ხეკულუათ თაშნეშე გეგნოჭყორდჷ ნამდა ედუარდიშ ბოში ოსურო ქიმიჸონანდჷ ფილიპიშ ცირასქუას. ფლანდრიაწკჷმა კონფლიქტიქ გეთუ ფრანგეფიშ გომორძგუათ. შედეგო, საფრანგეთიქ მიპალუ ფლანდრიაშ მიარე ნოღეფი, ნამუეფქჷთ ომაფე დომენიშ აკოდგინალუაშა მიშელჷ.
ფილიპ IV-ს საფრანგეთიშო სერიოზული საფრთხეთ მიოჩქუდჷ ურიეფი დო ტამპლიერეფი, დო თვალუნდჷ ნამდა თინეფი წჷმარინუანდეს სახენწჷფოს სახენწჷფოშ დინახალე. ჸათეშ გეშათ 1306 წანას, თიქ ურიეფი საფრანგეთიშე გეგშარაჸუ დო ართი წანაშ უკულ რსულას მოჯალაგუ ტამპლიერეფი. მონარქიაშ ხოლო უმოსო განძალიერაფაშ ღანკით, ფილიპიქ გინოჭყვიდჷ სახენწჷფოშ რსული კონტროლიშ დოწესაფა საფრანგეთიშ კათოლიკური ეკლესიას. ჸათეს უკულ მაჸუნჷ შანულამი კონფლიქტური ურთიართალაქ პაპი ბონიფაციუს VIII-წკჷმა. 1303 წანაშ 7 ეკენიას, ფილიპიშ ზოჯალათ საფრანგეთიშ არმიაქ პაპი ბონიფაციუსი ოჭოფუ მუში რეზიდენციას - ანანის. ჸათე მოლინას უკულ მაჸუნჷ პაპეფიშ ავიონიშ ტყვეობაშ პერიოდიქ (1309-1376).