შპიკეროოგი

კოკიშ აბანდვალა

აერო ფოტო ბჟადალშე

შპიკეროოგი (გერმ. Spiekeroog) — გერმანიაშ კოკი ოორუეშ ზუღას, ბჟაეიოლ ფრიზიშ კოკეფიშ აკოდგინალუას. იდვალუაფუ კოკეფს — ლანგეოოგის (ბჟადალშე) დო ვანგეროოგეს (ბჟაეიოლი) შქას. ორხველჷ თუდოლენ საქსონიაშ აკანიშ ვიტმუნდიშ რაიონს. კოკის დვალირ აკა ოფუტეს თაშნეშე შპიკეროოგი ჯოხო.

კოკიშ ფართობი 18,25 კმ² რე, მატერიკშე უხოლაში მეძენა რე 5,7 კმ. კოკი ავტომობილეფშე დუდიშული რე, ოხანძარე დო რესურსეფიშ გინმაზინდალი მანქანეფიშ მოხ. კონტინენტურ გერმანიაწკჷმა მიორსხუანს ირდღალური ობონარე მეულა-მოულა.

ჯოხო „შპიკეროოგიშ“ გორჩქინა სანირზო რე, მარა ამდღარშო მუში მახორობას წანს, ნამდა თინა ითანგუ მუჭოთ „ოწკარუე კოკი“.