ჰენრიკ იბსენი

ჰენრიკ იბსენი
	ჰენრიკ იბსენი
ფსევდონიმი:	Brynjolf Bjarme
დაბადებაშ თარიღი:	20 მელახი, 1828
დაბადებაშ აბანი:	შიენი, ტელემარკი, ნორვეგია
ღურაშ თარიღი:	მესი 23, 1906 (78 წანერი)
ღურაშ აბანი:	ქრისტიანია, ნორვეგია
ერუანობა:	ნორვეგიალი
საქვარუა:	ჭარუ, დრამატურგი
პერიოდი :	1850—1906
Magnum opus:	ბრანდი (1865); პერ გიუნტი (1867); იმპერატორი დო გალილეარი (1873); კენჯაშ ჸუდე (1879); მოძირაფეფი (1881); ხარხიშ ტერი (1882); ტყარი კვატა (1884); როსმერსჰოლმი (1886); ჰედა გაბლერი (1890); ორსანტი სოლნესი (1892); მუჟამს ჩქი, ღურელეფი გობკურცხუთჷ (1899)
ჟანრი:	ნატურალიზმი
ნინა:	ნორვეგიული ნინა; დანიური ნინა
დებიუტი:	კატილინა (1850)
ჯილდოეფი:	დანებროგიშ ორდენიშ დიდი ჯვარიშ კავალერი; პოლარული მურიცხიშ ორდენიშ დიდი ჯვარიშ კავალერი; წიმინდე ოლაფიშ ორდენიშ დიდი ჯვარიშ კავალერი; დანებროგიშ ორდენი

ჰენრიკ იოჰან იბსენი (ნორვ. Henrik Johan Ibsen; დ. 20 მელახი, 1828, შიენი, ტელემარკი, ნორვეგია — ღ. 23 მესი, 1906, ქრისტიანია, ნორვეგია) — ნორვეგიალი ჭარუ, პოეტი დო დრამატურგი. იბსენი რდჷ ართ-ართი პირველი, ნამუქჷთ მიშეღჷ მოდერნიზმი თეატრიშა. თინა მერჩქინელი რე რეალიზმიშ ართ-ართ დუმარსხუაფალო დო ართ-ართ უდიდაშ დო გოლინიან დრამატურგო. იბსენი შინელი რე პიესეფით: „ბრანდი“, „პერ გიუნტი“, „იმპერატორი დო გალილეარი“, „კენჯაშ ჸუდე“, „მოძირაფეფი“, „ხარხიშ ტერი“, „ტყარი კვატა“, „როსმერსჰოლმი“, „ჰედა გაბლერი“, „ორსანტი სოლნესი“ დო „მუჟამს ჩქი, ღურელეფი გობკურცხუთჷ“. იბსენი პიესეფს დანიურ ნინაშა ჭარუნდჷ.

ჰენრიკ იბსენიქ დებადჷ 1828 წანაშ 20 მელახის, დიდარი კომერსანტეფიშ ფანიას. იბსენიშ ფანიას 1830-იან წანეფს ფინანსურ პრობლემეფქ ქაშუ დო მალას გეკოტრეს. 1844 წანას იბსენიქ მუშობა ქიდიჭყჷ აფთიაქის. ჸათე პერიოდიშე დიჭყჷ ლერსეფიშ ჭარუა. იბსენიშ პირველი პიესა რდჷ „კატილინა“, ნამუქჷთ 1848-1849 წანეფს იჭარჷ დო 1850 წანას გიშართჷ. პიესა სცენას ვადოდგჷმე. იბსენიშ პირველი პიესა ნამუქჷთ დიდგინჷ რდჷ „ონთხორუეშ ზუგა“, მარა თის პოპულარობაქ ვეიაჭოფჷ. 1852-1857 წანეფს იბსენი ხემანჯღვერენდჷ ბერგენიშ პირველ ერუანულ თეატრის, 1857-1862 წანას იბსენი რდჷ ქრისტიანიაშ ნორვეგიული თეატრიშ ხემანჯღვერი.

1864-1891 წანეფს ჰენრიკ იბსენი ცხოვრენდჷ რომს, დრეზდენს დო მიუნხენს.

ჰენრიკ იბსენი რდჷ დანებროგიშ ორდენიშ დიდი ჯვარიშ, პოლარული მურიცხიშ ორდენიშ დიდი ჯვარიშ დო წიმინდე ოლაფიშ ორდენიშ დიდი ჯვარიშ კავალერი. 1902, 1903 დო 1904 წანეფს ნომინირაფილი რდჷ ნობელიშ პრემიაშა ლიტერატურაშ დარგის.

ჰენრიკ იბსენიქ დიდი გოლინა იღვენუ გიშარჩქინელი დრამატურგეფიშ დო ნოველისტეფიშ ჯორჯ ბერნარდ შოუშ, ოსკარ უაილდიშ, ართურ მილერიშ, მარგარიტ იურსენარიშ, ჯეიმზ ჯოისიშ, იუჯინ ო’ნილიშ დო მიროსლავ კრლეჟაშ ლიტერატურულ კარიერაშა.