დინორეშა გინულა

ჰენრი დრეიპერი

ვიკიპედიაშე
ჰენრი დრეიპერი
ინგლ. Henry Draper
დაბადებაშ თარიღი:

7 მელახი, 1837

დაბადებაშ აბანი:

პრინს-ედუარდი, ვირჯინია, ააშ

ღურაშ თარიღი:

გერგობათუთა 20, 1882 (45 წანერი)

ღურაშ აბანი:

ნიუ-იორკი, ააშ

მენოღალობა:

ამერიკაშ აკოართაფილი შტატეფიშ შილა ააშ

ომენცარე სფერო:

ასტრონომია

სამუშაშ აბანი :

ნიუ-იორკიშ უნივერსიტეტი

ალმა-მატერი:

ნიუ-იორკიშ უნივერსიტეტიშ მედიცინაშ სკოლა

ჯილდოეფი დო პრემიეფი:
ხეშმოჭარუა:

ჰენრი დრეიპერი (ინგლ. Henry Draper; დ. 7 მელახი, 1837, პრინს-ედუარდი, ვირჯინია, ააშ — ღ. 20 გერგობათუთა, 1882, ნიუ-იორკი, ააშ) — ამერიკალი ექიმი დო მოჸოროფე ასტრონომი, შინელი რე მუჭოთ ასტროფოტოგრაფიაშ პიონერი.

დრეიპერი გურაფულენდჷ ნიუ-იორკიშ უნივერსიტეტიშ მედიცინაშ სკოლას, ნამუთ გათუ 1857 წანას. გურაფაშ თებაშ უკული მუშენდჷ ექიმო ბელვიუშ ჰოსპიტალს. უკულიან პერიოდის რდჷ ნიუ-იორკიშ უნივერსიტეტიშ პროფესორი დო მედიცინაშ ფაკულტეტიშ დეკანი. 1862 წანაშ 31 მესიშე 8 გჷმათუთაშახ მონაწილენდჷ ამერიკაშ ომენოღალე ლჷმას, ოურდუმე ექიმო. 1867 წანას დრეიპერიქ ოსურო ქიმიჸუნჷ დინდარი არისტოკრატი მარი ანა პალმერი დო თიწკჷმა ართო დიჭყჷ ასტრონომიული რკვიებეფი. ჟირხოლო მოჸოროფე ასტრონომეფი რდეს.

ჰენრი დრეიპერი ითვალუ ასტროფოტოგრაფიაშ ართ-ართ ორდოიანი პიონერო. 1872 წანას თიქ გინიღჷ მურიცხული სპექტრიშ ფოტოეფი, სოდეთ იძირედჷ აბზორფციაშ ღოზეფი. 1873 წანას დრეიპერიქ უნივერსიტეტის სამედიცინო პოსტი ქიმიოტუ დო ბორჯი უმოსო დუთმუ ასტრონომიულ რკვიებეფს. 1874 წანას ხემანჯღვერენდჷ ექსპედიციას, ნამუშ ღანკი მორღაშ ტრანზიტიშ ფოტოგრაფირაფა რდჷ. დრეიპერი რდჷ მაართა ასტრონომი ნამუქჷთ აკეთჷ ორიონიშ ნირსეულიშ ფოტოგრაფირაფა 1880 წანაშ 30 ეკენიას. 1880 წანას გინიღჷ პლანეტა დიაშ სპექტრი.

ობსერვატორია, სოვრეშეთ დრეიპერის გინმუღუდჷ ფოტოეფი, იდვალუაფუდჷ ოფუტე ჰასტინგს-ონ-ჰადსონის (ნიუ-იორკიშ შტატი). ასე ჸეთი დგჷმილს ფუნქციონირენს ჰასტინგს-ონ-ჰადსონიშ ისტორიული ჯარალუა.

ჰენრი დრეიპერიქ ღურუ პლევრიტით, 1882 წანაშ 20 გერგობათუთას, 45 წანერქ. მარი ანა დრეიპერიშ ინიციატივათ დო დრეიპერიშ ფონდიშ ფინანსეფით, 1886 წანას დირსხუ ჰენრი დრეიპერიშ ჯოხონობაშ მენდალქ, ნამუთ ოთხი წანაშე ართიშა გინაჩამუ ასტროფიზიკაშ დარგის მოხანდე მენცარეფს.

ქოძირით თაშნეშე[რედაქტირაფა | წყუშ რედაქტირაფა]

რესურსეფი ინტერნეტის[რედაქტირაფა | წყუშ რედაქტირაფა]