რადიო დუდიშული ევროპა/რადიო დუდიშალა

ვიკიპედიაშე
რადიო დუდიშალაშ ომაუჭყაფალე არეალი

რადიო დუდიშული ევროპა/რადიო დუდიშალა (ინგლ. Radio Free Europe/Radio Liberty (RFE/RL)) — ააშ-იშ კონგრესიშით დორსხუაფილი დო დოფინანსაფილი რადიოსადგიმი, ნამუთ მაუჭყაფულენს ევროპაშ, ცენტრალურ აზიაშ დო ხოლოშიან ბჟაეიოლიშ ქიანეფს. რადიო დუდიშული ევროპა/რადიო დუდიშალა გინმოჩანს ახალ ამბეეფს დო ანალიტიკურ გჷნოჩამეფს თი ქიანეფს, სოდეთ „ინფორმაციაშ ეჭოფუაშ დუდიშალა ედომუშამო ვა რე უნარღელჸოფილინ, ვარა აკოხურგილიე თარობაშ ხეშე“.[1]

რადიოსადგიმქ დირსხუ 1949 წანას, მუჭოთ ანტი-კომუნისტური ინფორმაციაშ წყუნ თეშ რგილი ლიმაშ ფარანს. თიში ოდუდე ოფისი ნოღა მიუნხენს იდვალუაფუდჷ 1949-1995 წანეფს, 1995 წანაშ უკული თიქ პრაღაშა გინილჷ. რგილი ლიმაშ თებაშ უკული ევროპას მაუჭყაფალობაშ მასშტაბეფქ ოგინაფალო მიირკჷ, ოდო თეშ გამათ ხოლოშიან ბჟაეიოლქ გინირთჷ რადიოსადგიმიშ პრიორიტეტულ ზონათ. პრაღაშ ოდუდე ოფისიშ მოხ, „რადიო დუდიშალას“ უღჷ 20 აბანობური ოფისი ომაუჭყაფალე რეგიონიშ ქიანეფს დო კორპორაციული შტაბ-ორენი ნოღა ვაშინგტონს. მაუჭყაფალობა მეურს 28 ნინაშა 21 ქიანას, თინეფ შქას რუსეთის, ირანს, ავღანეთის დო პაკისტანს.[2]

რადიო დუდიშალაშ ქორთული ოინალუშ მაართა გჷნოჩამაქ ეერშა 1953 წანაშ 3 მელახის გინიჩინჷ.[3]

რესურსეფი ინტერნეტის[რედაქტირაფა | წყუშ რედაქტირაფა]

სქოლიო[რედაქტირაფა | წყუშ რედაქტირაფა]