აბაშა — წყარმალუ ბჟადალ საქორთუოს, მარტვილიშ დო აბაშაშ მუნიციპალიტეტეფს, წყარმალუ ტეხირიშ კვარჩხანი ნადუ. სიგინძა რე 66 კმ, ღანჩოშ ფართობი - 370 კვ.კმ. ოდუდე უღჷ ასხიშ მასივიშ ობჟათე კართეეფს. მუშ ოდუდეს აკმოქიმინჷნა რეჩხიშწყარი დო ტობა, ნამუთ აკათუ ოფუტე ბალდაშ ჟი, ზუღაშ დონეშე 325 მეტრას. ასხიშ მასივიშ ობჟათე-ბჟადალ სუკიშე დო აბედათიშ გვალაშ ოორუე-ბჟაეიოლიშ ბოლოშ შქას, გოჭკადილწკჷმა, აბაშა ორჩქინანს 50-70 მეტრაშ სიტომბაშ ონჭირე (სიგანა 5-6 მ.) კანიონს, თე აბანს ეგაფილი რე აბაშაშ ჰესი. აბაშა ირდუ დიხაშთუდონი, ჭვემაშ დო თჷრიშ წყარით. გუმნაულა წყარი მეხოლაფირო ართმანგო ირთუ წანაშ მალობას.
