ალარიხ I
| ალარიხ I | ||
 ალარიხი მიშმურს ათენიშა ნოღაშ ეჭოფუაშ უკულ. 1915 წანაშ არტისტული ილუსტრაცია | ||
| ვესტგოთეფიშ მაფა | ||
|---|---|---|
| პოსტის გერინაშ ბორჯი | ||
| 395 – 410 | ||
| წიმოხონი | ათანარიხი | |
| მონძე | ათაულფი | |
| დუნაბადი | დოხოლაფირო 370 პევკიშ კოკი, დუნაიშ დელტა | |
| ნაღურა | 411 (40 წანერი) კოზენცა, იტალია, რომიშ იმპერია | |
| ნთხორუ აბანი | წყარმალუ ბუზენტო, კალაბრია, იტალია | |
| მუმა | უჩინებუე | |
| რელიგია | არიანალობა | |
ალარიხ I (გოთ. 𐌰𐌻𐌰𐍂𐌴𐌹𐌺𐍃, დ. დოხოლაფირო 370 — ღ. 411) — ვესტგოთეფიშ მაართა მაფა 395-410 წანეფს, ბალტეფიშ დინასტიაშ წჷმმარინაფალი.
რდჷ გოთეფიშ ჯარეფიშ მანჯღვერთარი რომიშ არმიას. 395 წანას რომიშ იმპერატორი თეოდოსიუს I-შ ღურაშ უკულ, არმია ქიდიტუ დო ვესტგოთეფიშ მამართალო გინირთჷ. რომიშ პოლიტიკათ ოკმაყოფილე ალარიხიქ მანწყუ ოურდუმე კამპანია კონსტანტინოპოლიშ მეხჷ, მარა უშედეგეთ. უკულ გემშეჭკირჷ საბერძნეთიშა, გორჩუ პირეოსი (ათენიშ ონიშოლი), მოჯალაგუ კორინთი, მეგარა, არგოსი დო სპარტა. 397 წანას ბიზანტიაშ იმპერატორქ არკადიუსიქ ალარიხი ქუდარინუ ოურდუმე მაგისტრო რომიშ პროვინცია ილირიკუმს დო ჸათაშ დარჩქალჷ ვესტგოთეფი.
401 წანას ალარიხიქ გემშეჭკირჷ იტალიაშა, მარა დემარცხჷ დო აპენინიშ ჩქონიშე გეგშართჷ. იტალიაშა მაჟირა მიშაჭკირუაშ უკულ, რომიშ სენატიქ ვესტგოთეფს კაბეტი მუდანობათ სუბსიდია გინუგჷ. 408 წანას ვესტგოთეფქ კინ გემშეჭკირეს დო რომიშ ეჭოფუა მინდომეს. რომალეფქ ვესტგოთეფს კინ ახალი ფინანსური სუბსიდია გინუგეს. 409 წანას ალარიხიქ წიმიჭყჷ ახალი ოურდუმე კამპანია რომიშ მეხჷ, მარა უკულ რომიშ ბლოკადა მონწყუ დო რომიშ იმპერიაშ ახალი იმპერატორო გეგმაცხადჷ პრისკუს ატალუსი, ნამუქჷთ ლეგიტიმური იმპერატორს ჰონორიუსის გინორინა მოთხუ. ალარიხიქ დო ატალუსიქ ვემირიგეს დო 410 წანაშ ზარხულს ალარიხიქ ატალუსი გეგთარაგუ. 410 წანას ალარიხიქ რომი ქართას (ალყა) ქინახუნუ. ალარიხის რომიშ დინახალე მოხუჯეეფი ჸუნდჷ დო თინეფქ, 24 მარაშინათუთას, ალარიხიშ ჯარს ნოღაშ კარეფი გუნჯეს. ალარიხიქ ჸათაშ გეჭოფუ რომი, ნამუთ დოხოლაფირო 800 წანაშ გოძვენას ნტერს ვეუჭოფუ. ვესტგოთეფქ რომი გორჩვეს, ნამთინე დგჷმილეფი დოჭვეს მარა რომიშ მახორუეფიშა გლახათ ვამუქციებუნა.