ალფრედ რასელ უოლესი

ალფრედ რასელ უოლესი
	ალფრედ რასელ უოლესი
	ინგლ. Alfred Russel Wallace
	; უოლესი 1895 წანას
დაბადებაშ თარიღი:	8 ღურთუთა, 1823
დაბადებაშ აბანი:	ლანბადოკი, მონმუტშირი, უელსი
ღურაშ თარიღი:	გერგობათუთა 7, 1913 (90 წანერი)
ღურაშ აბანი:	ბროდსტონი, დორსეტი, ინგლისი
მენოღალობა:	გოართოიანაფილი ომაფე
ომენცარე სფერო:	ბიოლოგია, ზოოლოგია, ბიოგეოგრაფია, ანთროპოლოგია
ალმა-მატერი:	ბირკბეკი
ჯილდოეფი დო პრემიეფი:	ომაფე მენდალი (1868); საფრანგეთიშ გეოგრაფიული ჯარალუაშ ორქოშ მენდალი (1870); დარვინიშ მენდალი (1890); ლინეშ მენდალი (1892); გეოგრაფიაშ ომაფე ჯარალუაშ ორქოშ მენდალი (1892); ლონდონიშ ომაფე ჯარალუაშ მაკათური (1893); კოპლიშ მენდალი (1908); Order of Merit (1908); დარვინი-უოლესიშ მენდალი (1908)
ხეშმოჭარუა:

ალფრედ რასელ უოლესი (ინგლ. Alfred Russel Wallace; დ. 8 ღურთუთა, 1823, ლანბადოკი, მონმუტშირი, უელსი — ღ. 7 გერგობათუთა, 1913, ბროდსტონი, დორსეტი, ინგლისი) — ბრიტანალი ბოტანიკოსი, ბიოლოგი, გეოგრაფი, ანთროპოლოგი დო ილუსტრატორი, ჩარლზ დარვინიწკჷმა ართო, ორთაშობური სელექციაშ თეორიაშ დუმარსხუაფალი.

ალფრედ რასელ უოლესიქ გიმირკვიუ ამაზონიშ აუზი დო უკულ მალაიშ არქიპელაგი, სოდეთ აკეთჷ უოლესიშ ღოზიშ იდენტიფიკაცია. უოლესიშ ღოზი ინდონეზიაშ არქიპელაგის გუთმორთჷნს ჟირო: ბჯადალი რეგიონო, სოდეთ ჩხოლარეფი ჯინჯიერო უმოსო აზიური რე დო ბჟაეიოლი რეგიონო, სოდეთ ფაუნა ავტრალაზიურს მოგენს. უოლესი მერჩქინელი რდჷ XIX ოშწანურაშ უდიდაშ ექსპერტო ჩხოლარეფიშ გეოგრაფიული გოფაჩუაშ რკვიებაშ დარგის დო უოლესის ბიოგეოგრაფიაშ მუმას ხოლო უძახუდეს. უოლესიქ მიშეღჷ დიდი მენცარული კონტრიბუცია ევოლუციური თეორიაშ გოვითარაფაშა. უოლესიქ წჷმარინუ აპოსემატიზმიშ დო უოლესიშ ეფექტიშ კონცეფციეფი. 1904 წანაშ უოლესიშ წინგი "ადამიერიშ აბანი ოქიანუს", ეთმოჭარუნს თელარაშ არსებობაშ იდეეფს შხვა პლანეტეფს. უოლესი რდჷ ართ-ართი მაართა მენცარი, ნამუთ სერიოზულო რდჷ დაინტერესებული მოროხის თელარაშ არსებობაშ იდეეფით. ალფრედ რასელ უოლესი მენცარული აქტივობეფიშ გარდა დაინტერესებული რდჷ სოციალური აქტივობათ ხოლო დო რდჷ XX ოშწანურაშ ბრიტანეთიშ კაპიტალისტური სისტემაშ ოპონენტი. უოლესის სპირიტუალიზმიშ წანდჷ დო ჸათეშ გეშაშ შხვა მენცარეფიწკჷმა კონფლიქტეფი ხოლო უღუდჷ. უოლესი რდჷ შინელი ავტორი დო თიშ არძაშე უმოსო პოპულარულიე წინგი რდჷ მალაიშ არქიპელაგი, სოდეთ უოლესი ეთმოჭარუნს მუშ მენცარულ რკვიებეფს სინგაპურს, ინდონეზიას დო მალაიზიას. უოლესი რდჷ შხვადოშხვა პრემიეფიშ დო ჯილდოეფიშ ლაურეატი. 1866 წანას უოლესი რდჷ ბრიტანეთიშ მენცარობაშ ასოციაციაშ ანთროპოლოგიაშ სექციაშ პრეზიდენტი დო 1870 წანაშე ლონდონიშ ენტომოლოგიური ჯარალუაშ პრეზიდენტი. 1893 წანაშე უოლესი რდჷ ბრიტანეთიშ ასოციაციაშ ბიოლოგიაშ სექციაშ დირექტორი. უოლესიშ ჯოხონობაშ რე კრატერეფი თუთას დო პლანეტა მოროხის. 1895 წანას უოლესიშ ჯოხოქ გიადჷ ართი გვალას სიერა-ნევადაშ გვალეფიშ სისტემას, კალიფორნიაშ შტატის.