ამრიტა პრიტამი

ვიკიპედიაშე
ამრიტა პრიტამი

ამრიტა პრიტამი 1948 წანას
დაბადებაშ თარიღი:

31 მარაშინათუთა, 1919

დაბადებაშ აბანი:

გუჯრანვალა, პენჯაბი, ბრიტანეთიშ ინდოეთი (ასეიან პაკისტანი)

ღურაშ თარიღი:

გჷმათუთა 31, 2005 (86 წანერი)

ღურაშ აბანი:

დელი, ინდოეთი

ერუანობა:

ინდოარი

საქვარუა:

ჭარუ, ნოველისტი, ესსეისტი, პოეტი

პერიოდი :

1936–2005

Magnum opus:

ჩონჩხი (რომანი)
ამდღა ვეჩიებუქ ვარის შაჰის (პოემა)

ჟანრი:

პოეზია, პროზა, ავტობიოგრაფია

ნინა:

პენჯაბური ნინა
ჰინდი ნინა

ჯილდოეფი:

საჰიტია აკადემიაშ პრემია (1956)
პადმა შრი (1969)
ბჰარატია ჯნანპიტი (1982)
შათაბდი სამანი (2000)
პადმა ვიბჰუშანი (2004)

ამრიტა პრიტამი (პენჯ. ਅੰਮ੍ਰਿਤਾ ਪ੍ਰੀਤਮ; დ. 31 მარაშინათუთა, 1919, გუჯრანვალა, პენჯაბი, ბრიტანეთიშ ინდოეთი (ასეიან პაკისტანი) — ღ. 31 გჷმათუთა, 2005, დელი, ინდოეთი) — პენჯაბარი ჭარუ, ნოველისტი, ესსეისტი დო პოეტი. ჭარუნდჷ პენჯაბური დო ჰინდი ნინეფშა. მერჩქინელი რე პენჯაბური ლიტერატურაშ ართ-ართ უდიდაშ წჷმმარინაფალო. პრიტამი რე ავტორი ოშიშე უმოსი პოეტური კრებულიშ, რომანეფიშ, ბიოგრაფიეფიშ დო ესსეეფიშ. თიში ნაჭარეფი თანგილი რე ობჟათე აზიაშ დო შხვა ხარხეფიშ ნინეფშა.

პრიტამის დიდი პოპულარობა მოუღჷ პოემაქ "ამდღა ვეჩიებუქ ვარის შაჰის", ნამუთ მავითობრუო ოშწანურაშ პენჯაბარი პოეტიშ ვარის შაჰიშ ელეგია რე. პოემას ეჭარილი რე ტრაგიკული პერიოდი, ნამუქჷთ მაჸუნჷ პენჯაბიშ პოლიტიკურ დო ტერიტორიულ გორთუალას 1947 წანას. პრიტამიშ, მუჭოთ ჭარუშ დო ნოველისტიშ არძაშე უმოსო ჩინებული ნახანდი რე რომანი "ჩონჩხი", ნამუქჷთ 1950 წანას გიშართჷ. რომანს მოჩამილი რე ინდოარი ცირაშ, პუროშ ტრაგიკული რინა. ჸათე რომანიშ სიუჟეტის რე გერსხილი 2003 წანას გინოღალირი ინდური ფილმი.

ინდოეთიშ პოლიტიკური გორთუალაშ უკული, პრიტამიქ ოცხოვრებშა ლაჰორიშა გეგნორთჷ. რდჷ მუჭოთ ინდოეთის, თაშნეშე პაკისტანს პოპულარული ავტორი. პრიტამიშ პოეტური კრებულეფიშე შანულამი რე: "ქუალეფი დო კენჭეფი", "მა დო სი" დო შხვეფი. "ჩონჩხი"-შ გარდა პრიტამიშ ჩინებული რომანეფიე: "ექიმი დევი", "ძახინი", "გომორძგუა ანიტას", "მავითოსუმა ბჟა".

ამრიტა პრიტამი რდჷ შხვადოშხვა პრემიეფიშ დო ჯილდოეფიშ ლაურეატი. 1956 წანას მიპალუ საჰიტია აკადემიაშ პრემია. პრიტამი რდჷ მაართა ოსური ავტორი, ნამუსჷთ ჸათე ჯილდო გინოჩეს. 1969 წანას პრიტამიქ მიპალუ პადმა შრი დო 1982 წანას ბჰარატია ჯნანპიტი. 2004 წანას პრიტამის გინოჩეს ინდოეთიშ ართ-ართი უმაღალაში ჯილდო პადმა ვიბჰუშანი. ამრიტა პრიტამი რდჷ საჰიტია აკადემიაშ (ინდოეთიშ ლიტერატურული აკადემია) მაკათური. პრიტამი რდჷ დელიშ, ჯაბალპურიშ დო ვისვა-ბჰარატიშ უნივერსიტეტიშ საპატიო დოქტორი. 1979 წანას ბულგარეთიშ თარობაქ პრიტამის გინოჩჷ ვაპტსაროვიშ საირქიანო პრემია დო 1987 წანას საფრანგეთიშ თარობაქ - ხელუანობეფიშ დო ლიტერატურაშ ორდენი.

რესურსეფი ინტერნეტის[რედაქტირაფა | წყუშ რედაქტირაფა]

ვიკიოწკარუეს? რე ხასჷლა თემაშენ: