ბჟაეიოლი ტიმორიშ გეოგრაფია

ბჟაეიოლი ტიმორი — სახენწჷდო ობჟათე-ბჟაეიოლ აზიას, იდვალუაფუ ინდონეზიაშ დო ავსტრალიაშ შკას, იკენს კოკი ტიმორიშ ბჟაეიოლ ნორთის დო მორჩილ ექსკლავს (პროვინცია ოკუსი-ამბენო) კინე თე კოკიშ ბჟადალ ნორთის, თაშნეშე მორჩილ კოკეფს - ატაურუს (ოორუეშე) დო ჟაკუს (ბჟაეიოლშე). იდვალუაფუ ობჟათე-ბჟაეიოლ აზიას, ბჟაე. გან. 125°-შ დო 8° ობჟ. სიგ.-შ შკას

ბჟაეიოლი ტიმორიშ რელიეფი უმოსო გვალამი რე: ქიანაშ ტერიტორიაშ ოორუე-ბჟადალშე ობჟათე-ბჟაეიოლშახ გინმოჭკირუნს ძალიერო აკოწეწილი ქჷნდჷრი (ქიანაშ უმაღალაში კონკა — გვალა ტატამაილაუ (2963 მ)), ნამუთ აკათუ ოორუე წყარპიჯის. ქიანაშ ბჟაეიოლშე გოფაჩილი რე მორჩილი პლატო სიმაღალათ 500—700 მ. ობჟათე წყარპიჯიშ მანგას იდვალუაფჷნა უთირუე აკუმულირებული რზენეფი. ბჟაეიოლი ტიმორიშ დვალუა ალპურ-ჰიმალაიური გოხოლუაშ ყარაფონ ორტყაფუწკჷმა, გჷთმოთანჯუნს ქიანაშ მაღალ სეისმურობას დო კოკეფიშ ცუნამშე ოშქურანჯობას. ტიმორიშ ზუღაშ წყარპიჯი, შელფი დო გიშაკერძაფილო ქვინჯი დიდარი რე ნავთობით დო გაზით.

ქიანაშ კლიმატი სუბეკვატორული მუსონური რე სქირე დო ლამე სეზონეფით. ოშქაშეწანმოწანური ტემპერატურა 25-27 ºС. ნოლექეფიშ წანმოწანური მუდანობა 1500—2000 მმ (ქიანაშ ობჟათე ნორთი უმოსი ლამე რე). ქჷნდჷრეფიშ კართეფშე მოურს მორჩილი გვალაშ წყარლამუეფი ლოესი, ლაკიო, სეიკალი, ბე-ლულიო. ქიანას შხუ ტობეფი ვარე.

ქიანაშ ედომუშამი ფართობი — 14 954 კმ²^[1]. ქიანაშ წყარპიჯიშ ღოზიშ სიგჷნძა 6789 კმ.

ქიანას ასქილადირი რე ტროპიკულ ტყალეფიშ შანულამი მუნოკვათეფი, ნამუთ ქიანაშ ტერიტორიაშ ნასუმორს იკენა: ოორუეს მუთმოფხვადნა ფურცელმაციმე, ობჟათეშე — ლამე იროწვანე ტყალეფი.