გაიზერიხი
| გაიზერიხი | ||
| ვანდალეფიშ დო ალანეფიშ მაფა | ||
|---|---|---|
| პოსტის გერინაშ ბორჯი | ||
| 428 – 477 | ||
| წიმოხონი | გუნდერიხი | |
| მონძე | ჰუნერიხი | |
| დუნაბადი | დოხოლაფირო 389 ბალატონიშ გოხოლუას, პანონია პრიმა, ბჟადალი რომიშ იმპერია | |
| ნაღურა | 25 ღურთუთა, 477 (87 წანერი) კართაგენი, ვანდალეფიშ ომაფე | |
| მუმა | გოდიგისელი | |
| სქუალეფი | ჰუნერიხი გენტო | |
| რელიგია | არიანალობა | |
გაიზერიხი, თაშნეშე შინელი რე მუჭოთ გეიზერიხი, გენზერიხი (ლათ. Gaisericus, Geisericus; დ. დოხოლაფირო 389 — ღ. 25 ღურთუთა, 477) — ვანდალეფიშ დო ალანეფიშ მაფა 428-477 წანეფს.
გაიზერიხიქ ვანდალეფიშ მაფათ გინირთჷ 428 წანას, ჯიმაშ გუნდერიხიშ ღურაშ უკულ. ჸათე ბორჯიშო ვანდალეფი უკვე იხორუდეს ბეტიკას (თეხანური ანდალუსია, ესპანეთი). თე წანას გაიზერიხი აფრიკაშა ქიმიჭანუ აფრიკაშ პროვინციაშ მამართალქ ბონიფაციუსიქ, ნამუთ იმპერიაშ თარობას ოლიმუდჷ დო ოკოდჷ ვანდალეფიშ გჷმორინაფა იმპერიაშ ჯარეფიშ მეხჷ. გაიზერიხიქ გეგნოკვათჷ გიბრალტარიშ საროტი დო აფრიკაშა გეგნიჸონჷ დოხოლაფირო 80,000 კოჩი (შხვა, უმოსო რეალური ვერსიათ 20,000). თიში არმია ვანდალეფიშ მოხ, იკათუანდჷ ალანეფს დო გოთეფს.
აფრიკაშა გინულაშ უკულ გაიზერიხი დიო ბონიფაციუსის ალურდჷ მარა უკულ 430 წანას მიკართჷ დო დამარცხჷ ბონიფაციუსი, თაშნეშე ორჯგინჷ ბჟაეიოლი დო ბჟადალი იმპერიეფიშ გოართოიანაფილი ჯარეფს. 435 წანას გაიზერიხიქ რომალეფიწკჷმა ქუდოდვუ ოთინჩალე ხეკულუა, ნამუშ ნძალათ ვანდალეფს ქასკიდეს მავრეტანიაქ დო ნუმიდიაშ ნორთიქ, თაშნეშე ვანდალეფქ გინირთეს რომიშ ფედერატეფო.
439 წანაშ 19 გჷმათუთას გაიზერიხიქ გეჭოფუ კართაგენი. გაიზერიხიქ განძალიერჷ ფლოტი, ნამუთ რსულას აკონტროლენდჷ სქირონაშქა ზუღაშპიჯეთიშ ბჟადალი ტერიტორიეფს. უკულიანი პერიოდეფს გაიზერიხიქ ქიდეკინჷ ბალეარიშ კოკეფი, სარდინია, კორსიკა დო სიცილია. გაიზერიხიქ 455 წანაშ ივანობას, რომშა გემშეჭკირჷ, გორჩუ ნოღა დო მოჯალაგუ. რომალეფი ძალამს ოცადუდეს გაიზერიხიშ პრობლემაშ გინოჭყვიდუას. ჸათე ღანკით დიო იმპერატორი მაიორიანექ (460 წანას) დო უკულ ბასილისკოსიქ (468 წანას) წიმიჭყეს ოურდუმე ექსპედიცია, მარა უშედეგეთ. გაიზერიხიქ ღურუ 477 წანაშ 25 ღურთუთას. თიში მონძე რდჷ სქუა ჰუნერიხი.