გეგეჭკორი

გეგეჭკორი — მარგალური გვარი, ჯინჯით შონური. ოხორანა სამარგალოშ ნოღეფს დო ოფუტეეფს: ზუგდიდის, მარტვილს, ინჩხურს, ცაიშის, ჭითაწყარს, ურთას, ნაგვაზაოს, დარჩელს, ნაჯახაოს, ახალკახათის, კახათის, ბანძას, ოქტომბერს, ნალეფსაოს, ონტოფოს, მანცხვარკარს, ნოჯიხევს.

ჯვეშ დოკუმენტეფს ბრელშა რენა შინელეფი, მარა შონეშე თინეფიშ გინულაშ დო სამარგალოს დოხორაშენ ხვალე მუნეფიშ ზეპირ გინნაჩემუთ შილებე ჩიება. გეგეჭკორეფიშ ნასხუნათ, ჯვეშო თინეფი დადეშქელიანეფი რდეს. გეგეშ დადეშქელიანს უხვამილუაფუ ოსური, მარა შონეფი ქოთხოზაფუნა და სამარგალოშა გეგნოლაფე, სოდეთ მარტვილიშ მონასტერშა ქუფორუაფჷ დუდ დო მალას ჟინოსქუალობა დუნტკიცებუ. თე გეგეშიშ გამნარყი ოკო რდას არძა გეგეჭკორი.

მაჟია ვერსიათ "გეგეჭკორი" ჟირი ზიტყვაშ კომბინაციათ აკონწყილი გვარი რე: შონური "გეგე" ("წმინდა გიორგი") დო მარგალურ "ჭკორი", თიშ მიონიშნებელო, ნამდა გეგეჭკორეფი სამარგალოშა მოულაშ უკული წმინდა გიორგიშ ჭკორეფი რდესინ.

სამარგალოს გეგეჭკორეფიშ მაართა ოხორუ მარტვილიშ რაიონიშ ოფუტე ინჩხურს ოკო რდჷკო. ამდღა ხოლო თე გვარიშ კათა არძაშე კომპაქტურო შინელი ოფუტეშ ლეგეგეჭკორეშ კუნთხუს ოხორანს (ტაბაკონიშ გვალაშ ჯინჯის).

გეგეჭკორეფი სამარგალოშ დო საქორთუოშ ისტორიას დო კულტურას ჯოხოშინელი კათა რე. არძაშ უმოსი გჷშარჩქინელი გეგეჭკორეფი რდეს:

• ევგენი გეგეჭკორი - საქორთუოშ მაართა დემოკრატიული რესპუბლიკაშ გალენი საქვარეფიშ მინისტრი
• საშა გეგეჭკორი - რევოლუციონერი, ბოლშევიკი.
• გოგი გეგეჭკორი - ქორთული თეატრიშ დო კინოშ არტისტი

ლიტერატურა

• ბაგრატიონი იოანე, შემოკლებითი აღწერა საქართველოსა შინა მცხოვრებთა თავადთა და აზნაურთა გვარებისა, თბ. 1997.
• ახუაშვილი იაკობ, ქართული გვარ-სახელები, თბ. 1994, ტ.1; ტ. 2 მესხეთი, თბ. 1999; ტ. 3, 2003, 2005.