დაბლა
დაბლა თაშნეშე პარალიჩი, გილარქია (ჯვ.-ბერძენ. παράλυσις-შე — მერყიება დო ჯვ.-ბერძენ. ψεῦδος — ტყურელე), ტყურელე დაბლა — კუთური ჭყანაშ დინაფათ გიმნაჭანებუ ნებათ ყარაფეფიშ უღვენობა ნერვული სისტემაშ დოღამაკაფაშ გეშა. დაბლა დოჸუნს ლახარაშ ბაძაძეფს დო თიშ რსხუს დუდიშ დო გაგაჩიშ ტვინიშ შხვადოშხვა გუმნართეფწკჷმა, პერიფერიულ ნერვეფწკჷმა ვარ-და კუთეფწკჷმა. გინორთი უღჷ პარეზიშე.[1]
გიშმერთჷ დაბლაშ გეჸვენჯი გვარობეფი: ბაღანეფიდ ცერებრიალური დაბლა; ლურიშ დაბლა (დგომარობა, მუჟანსჷთ ლურიშ ბორჯის ვე ფიქსირებუ დაბლა).
ცერებრული დაბლა შედეგი რე გოვითარაფონ დუდიშ ტვინიშ დოღამაკაფაშის, ნამუთ შილებე გორჩქინდას ნაყოფიშ ქვარაშრინაშ, ხალაშ ვარ-და თელარაშ პირველი ჟირი წანაშ გოვენაშ. თიში მოდვალაშ არანი დო სიშხირა უდუდასურებუ რე. სინთელუანობაშ მოსოფელიშ ორგანიზაციაშ დო შხვადოშხვა ლიტერატურული მუნაჩემეფიშ მეჯინათ, ოშქაშეთ თიში სიშხირა რე 2,5–4 ირ 1000 ჩქჷჩქჷშა.
ცერებრულ დაბლაშ მოტორული (ყარაფიშ) დისფუნქციაშ მოხ დახე ირო ალაჸუნს შხვა აკორცუაფასჷთ, თინეფს შქას, კოგნიტური (დოგურაფონი), რწყებაშ, რჩქინაშ, რაგადუაშ, თოჸუჯის, რჯებაშ. ცერებრული დაბლას შხირას ალაჸუნს ეპილეფსიათ. თაშნეშე შხირი რე რჯებაშ აკორციებეფი (წყათინი, კაბუხუა), ელაზჷმაფათ ქექე ფორმეფიშ ბორჯის – გურაფაშ სიძნელეეფი.
ლურიშ დაბლაშ მენცარული ენწყუმა ასეშო ვა რე, მარა, თეხანური ნეირომენცარობა თის REM (Rapid eye movement – თოლიშ ბიწორი ყარაფიშ) ფაზას ტვინიშით ნეირონეფუშ გინოჩამაშ აკორცუაფაშ მეთმურსხუანა.
ლურიშ დაბლაშ გინორთელი გიმმაჭანაფალი ბაძაძეფი შილებე ორდას: ინსომნია, ლურიშ აპნოე, გურეშე ლური, კანკალე მედიკამენტი, ნარკოლეფსია, დეპრესია, შონთაფი, ართამი სახეშ თირუეფი ხასიაღის, ახვადოშხვა ტიპიშ ლურიშ აკორცუაფა, გენეტიკური ფაქტორი, ფსიქიკური ლახარეფი, ცირკადული რითმაშ აკორცუაფა.
ადამიერი ლურიშ დაბლაშ ბორჯის გინაფულრნს ღურათ შქურინს, კონწარ რიებაშ გინაფას. თე ირფწლი გიმიჭანუანს ტვინიშ ვიზუალური დო ორჩქილე სტიმულეფიშ გიმომუშაფას დო ამუშებას, ნამუსჷთ ჰალუცინაცია მოჸუნს. სამანგათ, რუმე ფიგურაშ მინუკა ოთახშა ვარ-და თიშ მუკორჩქინა ოსინთუშ გალე. თაანეაწ, წარმოსახული ვათექიანური რინუეფი დო თინეფშე შქურინაფა. დუდს მიკმირჩქინანს შქვიდაფიშ, მოშქვუდაფაშ გინაფა, ნამუსჷთ ახასიათენს შურღალაშ გაჭირება. ათე ბორჯის დუდს მიკმირჩქინანს დორხველი რსხულიშ ჭკორო რინაშ გინაფა, მარა, დაბლა ხვალე მუსხირენ წამს იგჷნძორებუ დო ვა რე თელარაშო ოშქურანჯი.
ლახარაშ გიმმაჭანაფალი ბაძაძეფი[რედაქტირაფა | წყუშ რედაქტირაფა]
- ტრავმეფი
- ჩილათერი მეტაბოლიზმი
- ინფექციური ლახარეფიშ გოუფრაშაფა
- ორგანიზმიშ ჸონიერი ინტოქსიკაცია
- ონკოლოგიური ლახარეფი
- ჩამურუაშ აკორცუაფა
- გენეტიკური მენტება
- წოროდოჸუნელი გოუფრაშაფეფი
ლახარაშ სიმპტომეფი[რედაქტირაფა | წყუშ რედაქტირაფა]
- ულაშ თირუა, კუთეფიშ სიდაღარა, დონთხაფაშ უკული წჷმოდგინაშ შილებუამობაშ უღვენობა;
- თოლეფიშ ართ ვარ-და მაჟირაჸურე მიკორთა, სიელმიშ გოვითარაფა;
- გინობუნაფილი, ჩხვინდიშე რაგადუა;
- უგუგებუ რაგადუა, ნამუშ ბორჯის ნინა ინმოლუ პიჯიშე დო ელმიკინანს ელახშე.
დიაგნოსტიკა[რედაქტირაფა | წყუშ რედაქტირაფა]
ლახარაშ დიაგნოსტიკას მანჯენს ქიმი-ნევროლოგი. კურნალუაშ დაჭყაფალო ოხვილური რე: ზისხირიშ ართამ, ტოქსიკოლოგიური ანალიზი; ელექტრონეირომიოგრაფია; ელექტროენცეფალოგრაფია; დუდიშ დო გაგაჩიშ ტვინიშ კომპიუტერული ტომოგრაფია; დუდია დო გაგაჩიშ ტვინიშ მაგნიტო-რეზონანსული ტომოგრაფია; მაგნიტო-რეზონანსული ანგიოგრაფია.
რესურსეფი ინტერნეტის[რედაქტირაფა | წყუშ რედაქტირაფა]
სქოლიო[რედაქტირაფა | წყუშ რედაქტირაფა]
- ↑ გოგიჩაძე გ. „სამედიცინო ტერმინოლოგიის ქართულ-ინგლისურ-რუსულ-ლათინური განმარტებითი ლექსიკონი“. თბილისი. „მერიდიანი“. 2009. 496გვ. — გვ. 394-395. — ISBN 978-9941-10-174-8.