ესთერ კონუელი
| ესთერ კონუელი | |
| ინგლ. Esther M. Conwell | |
 ესთერ კონუელი 2010 წანას | |
| დაბადებაშ თარიღი: | |
|---|---|
| დაბადებაშ აბანი: | |
| ღურაშ თარიღი: |
გერგობათუთა 16, 2014 (92 წანერი) |
| ღურაშ აბანი: | |
| მენოღალობა: | |
| ომენცარე სფერო: | |
| სამუშაშ აბანი : | |
| ალმა-მატერი: | |
| ომენცარე ხემანჯღვერი: | |
| ჯილდოეფი დო პრემიეფი: |
ედისონიშ მენდალი (1997) |
ესთერ მარლი კონუელი (ინგლ. Esther Marley Conwell; დ. 23 მესი, 1922, ნიუ-იორკი, ნიუ-იორკი, ააშ — ღ. 16 გერგობათუთა, 2014, როჩესტერი, ნიუ-იორკი, ააშ) — ამერიკალი ფიზიკოსი დო ქიმიკოსი. შინელი რე კონუელ-ვაისკოპფიშ თეორიათ, ნამუთ ეთმოჭარუნს ელექტრონეფიშ ჸარაფის გვერდოგამტარეფიშ დინახალე. ჸათე მეჭირინაფა რევოლუციური რდჷ დო უღუდჷ კაბეტი შანულობა კომპიუტერული ტექნოლოგიაშო. კონუელიშ რკვიებეფი ორხველუდჷ გვერდოგამტარეფს, ელექტროგამტარი პოლიმერეფს, გიშაკერზაფილო ელექტრონ-ტრანსპორტული ჯაჭვის. თაშნეშე, კონუელი ირკვიენდჷ ელექტრონეფიშ ჸარაფის დნბ-ს. რდჷ ოთხი პატენტიშ დო დოხოლაფირო 270 ომენცარე სტატიაშ დო ოხემანჯღვერეშ ავტორი.
ესთერ კონუელი გურაფულენდჷ ფიზიკას ბრუკლინიშ კოლეჯის. უკულ გურაფა გაგინძორჷ როჩესტერიშ უნივერსიტეტის, სოდეთ თიში მაგურაფალი ვიქტორ ვაისკოპფი რდჷ. ოდოქტორე დისერტაცია თხილუ ჩიკაგოშ უნივერსიტეტის, 1948 წანას, ნობელიშ პრემიაშ ლაურეატიშ სუბრაჰმანიან ჩანდრასეკარიშ ხემანჯღვერობათ.
1946–1951 წანეფს კონუელი მუშენდჷ ბრუკლინიშ კოლეჯის, ფიზიკაშ ინსტრუქტორო, 1951–1952 წანეფს იმუშუ ბელიშ ლაბორატორიას. ჸათაქ თინა ირკვიენდჷ მაღალი ელექტრული ვეშ ეფექტის გვერდოგამტარეფიშ ელექტრონ-ტრანსპორტული ფუნქციაშო. 1972 წანას კონუელიქ ქაკათჷ Xerox-იშ უილსონიშ რკვიებეფიშ ცენტრის, სოდეთ 1998 წანაშახ ნინალენდჷ.
კონუელიქ 1997 წანას მიპალუ ედისონიშ მენდალი დო 2009 წანას პრესტიჟული მენცარობაშ ერუანული მენდალი. კონუელი რდჷ ინჟინერიაშ ერუანული აკადემიაშ, მენცარობეფიშ ერუანული აკადემიაშ დო ამერიკაშ ხელუანობეფიშ დო მენცარობეფიშ აკადემიაშ მაკათური.
2002 წანას ჟურნალი Discover-ქ კონუელი მიშეჸონჷ ჸათე პერიოდიშ 50 შანულამი ოსური-მენცარეფიშ ერკებულშა.
რესურსეფი ინტერნეტის
[რედაქტირაფა | წყუშ რედაქტირაფა]- ესთერ კონუელიშ ბიოგრაფია
- ბიოგრაფია Archived 2024-01-09 ვებ-ხასჷლას Wayback Machine. როჩესტერიშ უნივერსიტეტიშ ვებსაიტის
- ბიოგრაფიული ფაქტეფი