ზევსიშ ნაწახნაკა ოლიმპიას
ზევსიშ ნაწახნაკა ოლიმპიას — მოსოფელიშ შკვითი სამანცარობაშე ართ-ართი, ღორონთ ზევსიშ გიგანტური ნაწახნაკა ზევსიშ ოხიდას, ნოღა ოლიმპიას. გაჭყჷ არქიტექტორი ფიდიასიქ ქრისოელეფანტური ტექნიკათ, ჯვ. წ. 430-იან წანეფს. იდვალუაფუდჷ ოხიდაშ ცელას. სიმაღალათ 12,4 მეტრი რდჷ. ნაწახნაკაშ გეშა 60-შე უმოსი ანტიკური ჩინება რე ჩქინდა მოჭირინაფილი, თიში მეჯინური სახე რეკონსტრუირაფილი რე პავსანიაშ ეჭარუაშ, სტრაბონიშ ჩინებეფს, თაშნეშე მონეტეფს რინელი ემნახანტეფიშ ოსხირშა: ზევსი, დუდს მინოდგუმილი ზეთიშხილიშ გურგინით დო გინაქუნალით, ნამუსჷთ ეხანტილი რდჷ ჩხოლარეფიშ დო შორიეფიშ, გეხედჷ ანდაღებულ მასალეფით აკნაგეფუ ხვისტას, კვარჩხან ხეს უკებუდჷ სფერო, ნამუსჷთ გერდჷ ნიკეშ ფიგურა, მარძგვანს — სკიპტრა კიღურაშ ფიგურათ. ხვისტა მოკვანეილი ტდჷ ანდა ფიგურათ, რელიეფით დო პინაქსით.
ლუკიანე სამოსატალიშ გინნაჩემუთ, ჯვ. წ. II ოშწანურას, დიხაშნწალუაშ შედეგო დეღამაკჷ, ნაწახნაკას რესტავრაცია იკეთეს მოწახნაკე დიმოფონტექ. ვარაუდენა, ნამჷ-და ზევსიშ ნაწახნაკაქ მიჯალაგჷ 425 წანას, ოხიდას გორჩქინელი დაჩხირიშ შედეგო. გიორგი კედრენეშ ჩინებათ, V ოშწანურაშ დაჭყაფუს, თინა კონსტანტინოპოლშა გეგნირეს, სოდე მიჯალაგჷ 475 წანაშ დაჩხირიშ შედეგო. თე ნაწახნაკაშ იკონოგრაფიაქ დუდი იძირჷ ჯვეშრომაულ ნაწახნაკეფს (სამან., I ოშწანურაშ ნაწახნაკა „იუპიტერი“, ერმიტაჟი, სანქტ-პეტერბურგი დო შხვ.).