კარლოს ფუენტესი

კარლოს ფუენტესი
ესპ. Carlos Fuentes
	კარლოს ფუენტესი; ესპ. Carlos Fuentes
	; ფუენტესი 2009 წანას
დაბადებაშ თარიღი:	11 გერგობათუთა, 1928
დაბადებაშ აბანი:	პანამა, პანამა
ღურაშ თარიღი:	მესი 15, 2012 (83 წანერი)
ღურაშ აბანი:	მეხიკო, მექსიკა
ერუანობა:	მექსიკარი
საქვარუა:	ჭარუ, ნოველისტი
პერიოდი :	1954–2012
Magnum opus:	სოდეთ სუფთა ჰაერი რე (1958); აურა (1962); არტემიო კრუზიშ ღურა (1962); Terra Nostra (1975); რჩინი გრინგო (1985); ქრისტოფერი უდუბადებუ (1987)
ნინა:	ესპანური ნინა
ჯილდოეფი:	ბრევეშ ბიბლიოთეკაშ პრემია (1967); ხავიერ ვილიაურუტიაშ პრემია (1976); რომულო გალიეგოსიშ პრემია (1977); ალფონსო რეიესიშ საირქიანო პრემია (1979); მექსიკაშ ხელუანობეფიშ დო მენცარობეფიშ ერუანული პრემია (1984); სერვანტესიშ პრემია (1987); ღრისებაშ ერუანული ორდენი (საფრანგეთი) (1992); მენენდეს პელაიოშ საირქიანო პრემია (1992); ღრისებაშ ერუანული ორდენიშ კომანდორი (ჩილე) (1993); გრინცანე-კავურიშ პრემია (1994); ავსტრიაშ პრინციშ პრემია (1994); პაბლო პიკასოშ მენდალი (1994); ბელისარიო დომინგესიშ მენდალი (1999); ესპანეთიშ ომაფე აკადემიაშ პრემია (2004); გალილეოშ პრემია (2005); ოთხი დუდიშალაშ პრემია (2006); იზაბელა კათოლიკეშ ორდენიშ დიდი ჯვარი (2009); ფორმენტორიშ პრემია (2011)

კარლოს ფუენტესი (ესპ. Carlos Fuentes Macías; დ. 11 გერგობათუთა, 1928, პანამა, პანამა — ღ. 15 მესი, 2012, მეხიკო, მექსიკა) — მექსიკარი ჭარუ დო ნოველისტი. შინელი რე რომანეფით: "სოდეთ სუფთა ჰაერი რე" (1958), "აურა" (1962), "არტემიო კრუზიშ ღურა" (1962), "Terra Nostra" (1975), "რჩინი გრინგო" (1985) დო "ქრისტოფერი უდუბადებუ" (1987). ფუენტესი რდჷ ლიტერატურული ჸარაფიშ ლათინოამერიკული ბუმიშ ართ-ართი თარი წჷმმარინაფალი. ბრიტანული გაზეთი The Guardian-იშ აზრით ფუენტესი რდჷ მექსიკაშ არძაშე უმოსო პოპულარული ნოველისტი.

კარლოს ფუენტესიქ დებადჷ პანამას, მექსიკარი დიპლომატიშ ფანიას. ირდუდჷ ლათინური ამერიკაშ შხვადოშხვა ქიანეფს. 1934-1940 წანეფს ფუენტესიშ მუმა ვაშინგტონს მუშენდჷ. ფუენტესი ვაშინგტონიშ სკოლას გურაფულენდჷ. 1940 წანას ფუენტესეფიშ ფანიაქ სანტიაგოშა (ჩილე) გეგნორთჷ, სოდეთ ახალგაზრდა ფუენტესიქ სოციალიზმით დეინტერესჷ. ფუენტესიქ უმაღალაში გონათაფა მიღჷ მექსიკაშ ავტონომიურ-ერუანულ უნივერსიტეტის. გურაფაშ თებაშ უკული დიჭყჷ დიპლომატიური კარიერა, მექსიკაშ გალენი საქვარეფიშ სამინისტროს. უკინებუდჷ შხვადოშხვა პოზიციეფი. 1958 წანას ფუენტესიქ გჷმაბჟინუ რომანი "სოდეთ სუფთა ჰაერი რე", ნამუქჷთ ავტორს დიდი პოპულარობა მუღუ. უკულიან წანეფს ფუენტესიქ დიპლომატიური კარიერა მიოტუ დო კუბაშა მიდართჷ. დაინტერესებული რდჷ კუბაშ რევოლუციათ დო რევოლუციაშ ლიდერით ფიდელ კასტროთ. 1975-1977 წანეფს ფუენტესიქ კინ დიპლომატიურ კარიერას დართჷ დო მუშენდჷ მექსიკაშ ელჩო საფრანგეთის. შხვადოშხვა პერიოდის ფუენტესი ლექციეფს ხოლო კითხულენდჷ: კემბრიჯიშ უნივერსიტეტის, ჰარვარდიშ უნივერსიტეტის, კოლუმბიაშ უნივერსიტეტის, კორნელიშ უნივერსიტეტის დო დართმუზიშ კოლეჯის. ფუენტესიშ მაჸალეეფი რდეს გიშარჩქინელი ავტორეფი უილიამ სტაირონი, ფრიდრიხ დიურენმატი, სიციოლოგი ჩარლზ რაიტ მილსი, კინორეჟისორი ლუის ბუნიუელი დო შხვეფი. კარლოს ფუენტესი რდჷ შხვადოშხვა პრემიეფიშ დო ჯილდოეფიშ ლაურეატი. ბრელშა რდჷ ნომინირაფილი ნობელიშ პრემიაშა ლიტერატურაშ დარგის, მარა პრემია დღას ვემუღებუ.

1959-1973 წანეფს ფუენტესიშ ოსური რდჷ პოპულარული მექსიკარი არტისტი რიტა მაკედო. ფუენტესიშ მაჟირა ოსური, ნამუთ ღურაშახ ჸუნდჷ რდჷ ჟურნალისტი სილვია ლემუსი. ფუენტესის სუმი სქუა ჸუნდჷ. ჟირქ ადრე დუღურჷ. კარლოს ფუენტესიქ ღურუ 2012 წანას 15 მესის, 83 წანერქ. ნთხორილი რე პარიზიშ მონპარნასიშ სასაფლას. 2012 წანას მექსიკაშ თარობაქ დარსხუ კარლოს ფუენტესიშ საირქიანო ლიტერატურული პრემია.