კლეოპატრა
| კლეოპატრა | ||||||||||||||
Κλεοπάτρα Φιλοπάτωρ
| ||||||||||||||
 | ||||||||||||||
| კლეოპატრაშ რომაული ნოწახნაკუ ბერლინიშ მუზეუმიშე | ||||||||||||||
| ეგვიპტეშ ეკონია დიაფალი | ||||||||||||||
| დუდალ. დაჭყაფუ: | ჯვ. წ. 51 | |||||||||||||
|---|---|---|---|---|---|---|---|---|---|---|---|---|---|---|
| დუდალ. დათებუ: | ჯვ. წ. 30 | |||||||||||||
| წიმოხონი: | პტოლემე XII | |||||||||||||
| მონძე: | რომიშ იმპერია | |||||||||||||
| დაბ. თარიღი: | 2 გერგობათუთა, ჯვ. წ. 69 | |||||||||||||
| დაბ. აბანი: | ალექსანდრია, პტოლემეეფიშ ომაფე | |||||||||||||
| ღურ. თარიღი: | 12 მარაშინათუთა, ჯვ. წ. 30 (39 წანერი) | |||||||||||||
| ღურ. აბანი: | ალექსანდრია, რომიშ ეგვიპტე | |||||||||||||
| ალმასქუ: | პტოლემე XIII პტოლემე XIV მარკუს ანტონიუსი | |||||||||||||
| სქუალეფი: | ცეზარიონი ალექსანდრე ჰელიოსი კლეოპატრა სელენა II პტოლემე ფილადელფოსი | |||||||||||||
| დინასტია: | პტოლომეეფი | |||||||||||||
| მუმა: | პტოლემე XII | |||||||||||||
კლეოპატრა VII ფილოპატორი (ბერძ. Κλεοπάτρα Θεά Φιλοπάτωρ; დ. ჯვ. წ. 70/69 — ღ. ჯვ. წ. 12 მარაშინათუთა, 30) — პტოლემეეფიშ ომაფეშ ეკონია დიაფალი ჯვ. წ. 51-30 წანეფს, პტოლემეეფიშ დინასტიაშ წჷმმარინაფალი. კლეოპატრაშ მუმა რდჷ პტოლემე XII.
პტოლემე XII-შ მართუალაშ ბორჯის ეგვიპტეს არყებაქ ქუმოხვადჷ დო ხვისტა ხეშა ქაშეჸოთუ თიში უნჩაში ცირასქუაქ ბერენიკაქ. ჯვ. წ. 58 წანას პტოლემექ მიდართჷ რომიშა, სოდეთ დოხოლაფირო სუმი წანაშ გოძვენას ქუდოსქიდჷ. ჯვ. წ. 55 წანას, რომალეფიშ მოხვარათ, პტოლემექ ეგვიპტეშა დირთჷ, დამარცხჷ არყებულეფი დო დაჸვილაფუ ბერენიკა. ჯვ. წ. 51 წანას დოღურჷ პტოლემექ დო წორო-მამართალეფო გინირთეს კლეოპატრაქ დო თიში ჯიმა პტოლემე XIII-ქ, მარა მალას თინეფს შქას ქიდიჭყჷ ომენოღალე ლჷმაქ. დოხოლაფირო ჸათე პერიოდიშო, ფარსალოსიშ ლჷმას მარცხიშ უკულ, რომალი ოურდუმე დო პოლიტიკური მოღალექ გნეუს პომპეუსიქ ინტჷ ეგვიპტეშა, სოდეთ თინა პტოლემე XIII-შ ზოჯუათ დოჸვილეს. პომპეუსიშ ღურაშ უკულ, იულიუს კეისარქ ეგვიპტეშა ქუმორთჷ დო მინდომუ პტოლემეშ დო კლეოპატრაშ გარიგება. მარა პტოლემექ კეისარს ვენდუ დო თიშ მეხჷ ოურდუმე მოქმედალა წიმიჭყჷ. ჯვ. წ. 47 წანას, ნილოსიშ ლჷმას, კლეოპატრაშ დო კეისარიშ გოართოიანაფილი ჯარეფქ ორჯგინეს პტოლემეშ დო არსინოეშ (კლეოპატრაშ და) ნძალეფს. პტოლემე დოჸვილეს, არსინოე ოჭოფეს დო გეგნახორეს ეფესოშა. კეისარქ ეგვიპტეშ მამართალეფო წჷმარინუ კლეოპატრა დო თიში ჯიმა პტოლემე XIV. კეისარქ კლეოპატრა ქიჸოროფუ დო თიშე სქუა ხოლო ჸუნდჷ. ჯვ. წ. 46 დო 44 წანეფს კლეოპატრა სუმარენდჷ კეისარს დო თიში დოხორეს ცხოვრენდჷ.
კეისარიშ ღურაშ უკულ, რომიშ ჯვ. წ. 43-42 წანეფიშ ომენოღალე ლჷმას, კლეოპატრა ალურდჷ მაჟირა ტრიუმვირატის (მარკუს ანტონიუსი, ლეპიდუსი, ოქტავიანე). ჯვ. წ. 41 წანას კლეოპატრაქ ანტონიუსის ქეშეხვადჷ დო თინეფქ მალას ართიანი ქიჸოროფეს. კლეოპატრას ანტონიუსიშე სუმი სქუა ჸუნდჷ. კლეოპატრაქ ანტონიუსის არსინოე დაჸვილაფუ. მუჟამსჷთ ანტონიუსი აწარმენდჷ ოურდუმე კამპანიეფეს პართიაშ დო სომხეთიშ მეხჷ, თის ფინანსურო კლეოპატრა ოხვარუდჷ. ჯვ. წ. 34 წანას კლეოპატრაქ დო ანტონიუსიქ რომიშ დო პართიაშ ტერიტორიეფი კლეოპატრაშ სქუალეფს გეგნოჩეს. ანტონიუსიქ, ოქტავიანეშ და ოქტავია ჩეთხინუ დო ოსურო კლეოპატრა ქიმიჸონჷ. ჸათე ამბეეფიშ უკულ, ოქტავიანექ ქიმწიჭყჷ ოურდუმე პროპაგანდა, ანტონიუსიშ ალმარენჯი სენატორეფი რომიშე ონტინუ, კლეოპატრას ლჷმა გეგმუცხადჷ დო ჯვ. წ. 31 წანაშ 2 ეკენიას, აქციუმიშ ოზუღე ლჷმას ორჯგინჷ ანტონიუსიშ დო კლეოპატრაშ გოართოიანაფილი ფლოტის. უკულ ოქტავიანექ გაგინძორჷ ოურდუმე კამპანია, ეგვიპტეშა გემშეჭკირჷ დო დამარცხჷ ანტონიუსიშ ნძალეფი. შედეგო, ანტონიუსიქ დო კლეოპატრაქ დუდი დიჸვილეს. კლეოპატრაშ ღურაშ უკულ, ეგვიპტექ რომიშ ართ-ართი პროვინციათ გინირთჷ.
კლეოპატრა ანტიკური პერიოდიშ ართ-ართი პოპულარული ოსური რდჷ. თიში რინაშ გეშა იჭარუდჷ ლერსეფი, პოემეფი, ოპერეფი, პიესეფი. თეხანური პერიოდის, გინოღალირი რე კინო-ფილმეფი ხოლო.
ლიტერატურა[რედაქტირაფა | წყუშ რედაქტირაფა]
- Chauveau, Michel (2004). Cleopatra: Beyond the Myth. Cornell University Press.
- Jones, Prudence J. (2006). Cleopatra: The Last Pharaoh. American University in Cairo Press.
- Nardo, Don (1994). Cleopatra. Lucent Books.