ლათინეფიშ იმპერია
|
ლათინეფიშ იმპერია | |||||||
| |||||||
|---|---|---|---|---|---|---|---|
| |||||||
 ლათინეფიშ იმპერია 1204 წანას | |||||||
| ნანანოღა | კონსტანტინოპოლი | ||||||
| ნინა | ლათინური, ჯვეში ფრანგული (ოფიციალური), ბერძენული | ||||||
| რელიგია | კათოლიციზმი, მართლმადიდებელობა | ||||||
| ფართობი | 179,000 კმ² (1204) 206,000 კმ² (1209) 47,000 კმ² (1228) 14,000 კმ² (1260) | ||||||
| დუდალაშ ფორმა | ფეოდალური ქირსიანული მონარქია | ||||||
| იმპერატორი | |||||||
| - 1204-1205 | ბალდუინ I | ||||||
| - 1205-1216 | ანრი I | ||||||
| - 1216-1217 | პიერ II | ||||||
| - 1217-1219 | იოლანდა დე ენო | ||||||
| - 1221-1228 | რობერ I | ||||||
| - 1229-1237 | იოანე | ||||||
| - 1228-1261 | ბალდუინ II | ||||||
ლათინეფიშ იმპერია, კონსტანტინოპოლიშ ლათინეფიშ იმპერია, თაშნეშე ჯოხოდჷ რომანია (ლათ. Imperium Constantinopolitanum, ფრანგ. Empire latin de Constantinople, ბერძ. Λατινική Αυτοκρατορία) — ფეოდალური სახენწჷფო, ნამუთ დარსხუეს მაანთხა ჯვაროსნული ლესქერობაშ მაკათური ჯვაროსანეფქ 1204 წანას.
ლესქერობაქ დიჭყჷ 1202 წანას. ჯვაროსანეფს ულამუდეს ოურდუმე ექსპედიციაშ დოჭყაფა ეგვიპტეშ მეხჷ. ვენეცია ჯვაროსანეფს ოპირუდჷ გემეფით გინოჸონაფას ეგვიპტეშა. მარა დუდშე ვენეციაშ დოჟიქ ენრიკე დანდოლოქ ჯვაროსანეფს მოთხუ უნგრეთიშ ნოღა ზადარიშ ეჭოფუა, ნამუთ ვენეციაშ კონკურენტი რდჷ. ზადარიშ ეჭოფუაშ უკულ, ვენეციარეფიშ ინიციატივათ ჯვაროსანეფქ ქიდიჭყეს ოურდუმე მოქმედალა ბიზანტიაშ მეხჷ. ჯვაროსანეფს, დუდშეიანი გეგმათ ოკოდეს ისააკ II ანგელოსიშა ხვისტაშ დორთინაფა. ისააკ II ხვისტაშე გითორაგვაფილი აფუდჷ მუში უნჩაში ჯიმას ალექსი III-ს. საგამათ ისააკიშ სქუა ალექსი IV ჯვაროსანეფს ფარათ დო აკოანჯარაფილი ნძალეფით ალარინას ოპირუდჷ. მარა ჯვაროსანეფს მუთუნნერი ფინანსეფი ვემუღებუნა. ჸათეშ გეშათ უკმაყოფილე ჯვაროსანეფქ გემშეჭკირეს, გეჭოფეს დო გორჩვეს კონსტანტინოპოლი. კონსტანტინოპოლიშ ეჭოფუაშ უკულ, ბიზანტიაქ აკოცუ ნიკეაშ, ტრაპიზონიშ დო ეპირიშ სახენწჷფოეფო. ჯვაროსანეფქ მუნეფიშ კონტროლირებადი ტერიტორიეფიშ - ლათინეფიშ იმპერიაშ იმპერატორო გეგშაგორეს ბალდუინ I ფლანდრიალი. თინა ითვალუ ახალდუნარსხუა ლათინეფიშ იმპერიაშ მაართა იმპერატორო. ბალდუინიშ კორონაციაქ იმანჯჷ 1204 წანაშ 16 მესის, აია-სოფიაშ ოხიდას. ლათინეფიშ იმპერიაშ აკოდგინალუაშა მიშმეშჷ ბიზანტიაშ ბჟადალი პროვინციეფი, თესალონიკიშ, მაკედონიაშ, თესალიაშ დო პელოპონესიშ ოლქეფი
ლათინეფიშ იმპერია ნძალიერი სახენწჷფო დღას ვაჸოფე. თიში არსებობაშო სერიოზული საფრთხეს წჷმარინუანდეს ბულგარალეფი დო ბიზანტიური სახენწჷფოეფი. ბორჯიშ გოძვენას, ლათინეფიშ იმპერიაქ ძალამს დედაღარჷ დო მიოდინუ შანულამი ტერიტორიეფი. 1261 წანას ნიკეაშ იმპერატორქ მიხეილ VIII-ქ, ვენეციარეფიშ მონირზე გენუარეფიშ ფინანსური დო ოურდუმე ალარინათ გეჭოფუ კონსტანტინოპოლი. ჸათე მოლინათ მიჯალაგჷ ლათინეფიშ იმპერიაქ დო თიში ტერიტორიეფქ კინ ბიზანტიაშ აკოდგინალუაშა მიშელჷ. ლათინეფიშ იმპერიაშ ეკონია იმპერატორქ ბალდუინ II-ქ ინტუ დო ხვალე საიმპერატორო ტიტულქ ქასკიდჷ.
ლიტერატურა[რედაქტირაფა | წყუშ რედაქტირაფა]
- Wolff, Robert Lee (1969) [1962]. "The Latin Empire of Constantinople, 1204–1261".