ნანანოღა
ნანანოღა — სახენწჷფოშ ვარა შხვა ადმინისტრაციული ტერიტორიაშ (ოლქიშ, პროვინციაშ, ავტონომიური ართურიშ) თარი ნოღა, სოდეთ მუჭოთ წესინ დონწყილიე ხეშუულობაშ დო მმართველუაში უმაღალაში ორგანოეფი: პრეზიდენტიშ, მონარქიშ, გუბერნატორიშ რეზიდენცია, პარლამენტი, ცენტრალური სამინისტროეფი დო უჭყაფეფი, ქიანაშ უმაღალაში სასამარათლო დო შხვა.
ნანანოღა შხირას ზოხო ადმინისტრაციული ართურო რე გიმორთილი, სამანგათ ნოღა ვენას კონსტიტუციათ მესხვენილი აფუ აკანიშ სტატუსი.
ნანანოღა შილებე ვარდას ქიანაში უდიდაში ნოღა. თეშ სამანგეფი რე ანკარა თურქეთის, ვაშინგტონი ააშ-ს, კანბერა ავსტრალიას დო შხვა. უმოსჷთ ხოლო, ეკონია ვითწანურეფს კილმარჩქინდუ ტენდენციეფი ნანანოღაშ გინოღალა მორჩილი სიდიდაშ ნოღეფშა: (ასტანა ყაზახეთის, დოდომა ტანზანიას, იამუსუკრო კოტ-დ’ივუარს) ვარა რსულაშო ახალი ნანანოღეფიშ კიდუაშ: (ბრაზილია, ისლამაბადი).
ნამთინე ქიანას პრაქტიკულო აღიარაფილიე ჟირნანანოღალა: ნიდერლანდეფიშ ოფიციალური ნანანოღა რე ამსტერდამი, მარა თარალა დო უმაღალაში სასამართლო ჰააგაშა რე გინოღალირი, ანალოგიური სიტუაცია რე ბოლივიას (სუკრე - კონსტიტუციური ნანანოღა რე, ლა-პასი - ფაქტიური), კოტ-დ’ივუარს (იამუსუკრო დო აბიჯანი), შრი-ლანკას, ჩილეს, მალაიზიას, ობჟათე აფრიკაშ რესპუბლიკას.