დინორეშა გინულა

ლახარეფიშ მიკრობული თეორია

ვიკიპედიაშე
ქოლერაშ ვიბრიონიქოლერაშ ბაძაძი ბაქტერია

ლახარეფიშ მიკრობული თეორია — მენცარობას მეღებული თეორია ლახარეფიშ დო თინეფიშ ბაძაძეფიშ გეშა. ჸათე თეორიაშ მეჯინათ მიკროორგანიზმეფი (პათოგენეფი, მიკრობეფი) იჭანუანა ლახარას. მიკროორგანიზმეფი მიშმულა ადამიერეფიშ, ჩხოლარეფიშ დო შხვა სქილედეფიშ ორგანიზმიშა. თინეფი უკულ მენძელი ორგანიზმეფს იბრელებუნა დო გინმირთუნა შხვადოშხვა ლახარეფიშ ბაძაძო. ჸათეცალი მიკროორგანიზმეფი შილებე რდას ბაქტერიეფი, პროტისტეფი, სოკოეფი, თაშნეშე ვირუსეფი, პრიონეფი, ვიროიდეფი.

ლახარეფიშ მიკრობული თეორიაშ ორდოიანი ვერსია წჷმარინუ ჯიროლამო ფრაკასტოროქ 1546 წანას. მარა უკულიანი პერიოდის ჸათე თეორიას პოპულარიბაქ ვეიაჭოფუ. ევროპას უმოსო დომინანტური რდჷ გალენოსიშ მიაზმაშ თეორია. ჸათე თეორია ანტკიცენდჷ ნამდა ინფექციური ლახარეფიშ, მაგალთო ქოლერაშ, ქლამიდიოზიშ, უჩა ჭირიშ ბაძაძი რდჷ მიაზმა (ჯვ. ბერძ. μίασμα - ბუძღი) — გლახა ჰაერი. თეორიაშ მეჯინათ ეპიდემიეფი რჩქინდუდჷ მიაზმაშე — ჸორადილი ორგანული მატერიაშე.

მავითოჩხორა ოშწანურაშე, ლუი პასტერიშ დო რობერტ კოხიშ რკვიებეფით მიაზმაშ თეორიაქ პოზიციეფი დუთმუ ლახარეფიშ მიკრობული თეორიას, ნამუქჷთ ჭიეჭიეთ უმოსო მეღებული თეორიათ გინირთუ. 1890-იან წანეფს მიოგორეს ვირუსეფს, გევითარჷ ბაქტერიოლოგიაშ დისციპლინაქ, მენცარეფქ აკეთეს მიარე ლახარეფიშ ბაძაძი მიკროორგანიზმეფიშ იდენტიფიკაცია. ჸათაშ გინირთჷ ლახარეფიშ მიკრობული თეორიაქ დომინანტურო თეხანური მენცარობას.

რესურსეფი ინტერნეტის[რედაქტირაფა | წყუშ რედაქტირაფა]