მარვინ მინსკი
| მარვინ მინსკი | |
| ინგლ. Marvin Minsky | |
 მარვინ მინსკი 2008 წანას | |
| დაბადებაშ თარიღი: | |
|---|---|
| დაბადებაშ აბანი: | |
| ღურაშ თარიღი: |
ღურთუთა 24, 2016 (88 წანერი) |
| ღურაშ აბანი: |
ბოსტონი, მასაჩუსეტსი, ააშ |
| მენოღალობა: | |
| ომენცარე სფერო: | |
| სამუშაშ აბანი : | |
| ალმა-მატერი: | |
| ომენცარე ხემანჯღვერი: | |
| ჯოხოშინელი მოგურაფეეფი: |
მანუელ ბლუმი |
| ჯილდოეფი დო პრემიეფი: |
ტიურინგიშ პრემია (1969) |
მარვინ ლი მინსკი (ინგლ. Marvin Lee Minsky; დ. 9 მარაშინათუთა, 1927, ნიუ-იორკი, ნიუ-იორკი, ააშ — ღ. 24 ღურთუთა, 2016, ბოსტონი, მასაჩუსეტსი, ააშ) — ამერიკალი ინფორმატიკოსი, კოგნიტივისტიკაშ დო ხელუანური ინტელექტიშ სპეციალისტი, მასაჩუსეტსიშ ტექნოლოგიაშ ინსტიტუტიშ ხელუანური ინტელექტიშ ლაბორატორიაშ დუმარსხუაფალი დო ტიურინგიშ პრემიაშ ლაურეატი.
ბიოგრაფია
[რედაქტირაფა | წყუშ რედაქტირაფა]მარვინ მინსკიქ დებადჷ 1927 წანას 9 მარაშინათუთას, ნოღა ნიუ-იორკის ურიეფიშ ფანიას. გურაფულენდჷ ეთიკური კულტურაშ ფილდსტონიშ სკოლას, ბრონქსის მენცარობაშ სკოლას დო ფილიპსიშ აკადემიას. 1944-1945 წანეფს მინსკი მსახურენდჷ ამერიკაშ ოზუღე ნძალეფს. 1950 წანას მინსკიქ მიპალუ ბაკალავრიშ ხარისხი მათემატიკას, ჰარვარდიშ უნივერსიტეტის. ოდოქტორე დისერტაცია თხილუ 1954 წანას ფრინსთონიშ უნივერსიტეტის. გურაფაშ თებაშ უკული მუშენდჷ ჰარვარდიშ უნივერსიტეტის დო მასაჩუსეტსიშ ტექნოლოგიაშ ინსტიტუტის. 1958 წანას მინსკიქ ქაკათჷ მასაჩუსეტსიშ ტექნოლოგიაშ ინსტიტუტიშ ლინკოლნიშ ლაბორატორიას. 1959 წანას მინსკიქ დო ჯონ მაკარტიქ ქუდარსხუეს ინფორმატიკაშ დო ხელუანური ინტელექტიშ ლაბორატორია. მარვინ მინსკი რდჷ სტენლი კუბრიკიშ 1968 წანას გიშულირი ფილმიშ 2001: კოსმოსური ოდისეაშ კონსულტანტი. 2002 წანას მინსკიქ მიპალუ 100,000 დოლარიშ გრანტი ჯეფრი ეფშტეინიშ ფონდიშე. მარვინ მინსკიქ ღურუ 2016 წანაშ ფურთუთას, 88 წანერქ, მასაჩუსეტსიშ ნოღა ბოსტონს.
მენცარული კონტრიბუცია
[რედაქტირაფა | წყუშ რედაქტირაფა]მარვინ მინსკიქ გიმიგონჷ დუდიშა ეიოდვალარი გრაფიკული დისპლეი (1963) დო კონფოკალური მიკროსკოპი (1957). მარვინ მინსკიქ, სიმორ პაპერტიწკჷმა ართო, აკადგინჷ მაართა პროგრამირაფაშ ნინა ლოგოშ რობოტი "Turtle". 1951 წანას მინსკიქ ეიოგჷ მაართა ნეირონული რშვილური დაგურაფალი მანქანა SNARC. 1969 წანას მინსკიქ დო პაპერტიქ გჷმაბჟინეს წინგი "პერცეპტრონეფი", ნამუთ რე ფუნდამენტალური ნახანდი ხელუანური ნეირონული რშვილიშ ანალიზიშო. 1970-იან წანეფს მინსკიქ დო პაპერტიქ დიჭყეს ორთაშობური ინტელექტიშ თეორიაშ აზრიშ ჯარალუაშ გოვითარაფა. თეორია ოცადუ ენწყუმას თიში ნამდა, მუჭო შილებე ინტელექტი რდას ვაინტელექტური ნორთეფიშ ურთიართქიმინჯალაშ პროდუქტი. 1986 წანას მინსკიქ გჷმაბჟინუ წინგი "აზრიშ ჯარალუა", სოდეთ მუშ იდეეფს უმოს მარტივ ნინაშა ეთმონწყუნს. 2006 წანას მინსკიქ გჷმაბჟინუ წინგი "ემოციეფიშ მანქანა", სოდეთ მინსკი აკრიტიკენს ადრეიან თეორიეფს ადამიერიშ აზრიშ გეშა დო ალტერნატიულ თეორიეფს ეთმოჭარუნს.
ჯილდოეფი დო პრემიეფი
[რედაქტირაფა | წყუშ რედაქტირაფა]მარვინ მინსკი რდჷ შხვადოშხვა პრემიეფიშ დო ჯილდოეფიშ ლაურეატი. 1969 წანას მიპალუ ტიურინგიშ პრემია, 1990 წანას იაპონიაშ პრემია, 1995 წანას კომპიუტერული ტექნიკაშ პიონერიშ პრემია დო რანკიშ პრემია, 2000 წანას ვუდიშ პრემია, 2001 წანას ბენჯამინ ფრანკლინიშ მენდალი დო 2014 წანას დენ დევიდიშ პრემია. მინსკი რდჷ ამერიკაშ მენცარობეფიშ ერუანული აკადემიაშ დო ამერიკაშ ინჟინერიაშ აკადემიაშ მაკათური.
გიშნაგორა პუბლიკაციეფი
[რედაქტირაფა | წყუშ რედაქტირაფა]- 1967 – Computation: Finite and Infinite Machines, Prentice-Hall
- 1986 – The Society of Mind
- 2006 – The Emotion Machine: Commonsense Thinking, Artificial Intelligence, and the Future of the Human Mind
რესურსეფი ინტერნეტის
[რედაქტირაფა | წყუშ რედაქტირაფა]- მარვინ მინსკი ენციკლოპედია ბრიტანიკას
- Marvin Minsky tells his life story at Web of Stories (ვიდეო)